មិនមែនលំៗទេ តារាប្រុសបូលីវូដទាំងនេះ ម្នាក់ៗមានទ្រព្យសម្បត្តិរាប់សិបលានដុល្លារអាមេរិកឯណោះ

2017-05-03 08:02:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយបានចូលរួមសម្ដែងក្នុងភាពយន្តជាច្រើន តារាបូលីវូដទាំងនេះអាចរកចំណូលបានដល់ទៅខ្ទង់រាប់លានដុល្លារឯណោះក្នុងមួយឆ្នាំៗ។ ដោយសារតែមានតារាល្បីៗ និងមានទ្រព្យសម្បត្តិច្រើននៅបូលីវូដ ដូច្នេះយើងនឹងលើកយកពីតារាប្រុសល្បីៗ ចំនួន១០រូប។ ចាំមើលថាតើក្នុងឆ្នាំ ២០១៧ នេះតើតារាណាខ្លះដែលមានទ្រព្យសម្បត្ដិច្រើនជាងគេ?

១០. តារាសម្ដែង Hrithik Roshan: ទ្រព្យសម្បត្តិ ៤៥លានដុល្លារ

Hrithik Roshan កើតនៅថ្ងៃទី ១០ ខែមករា ឆ្នាំ ១៩៧៤ គឺជាតារាសម្ដែងរឿងជនជាតិឥណ្ឌាដែលទទួលបានជោគជ័យពីការសម្ដែងក្នុងបូលីវូដ។ លោកទទួលបានពានរង្វាន់ចំនួន ៦ ពីកម្មវិធីប្រគល់ពាន Filmfare Awards និងជាប់ឈ្មោះក្នុងចំណោមជាតារាប្រុសដែលសង្ហាជាងគេនៅប្រទេសឥណ្ឌា។ ដោយសារតែលោក គឺជាតារាល្បីបែបនេះហើយ ទើបអាចរកប្រាក់ចំណូលបានច្រើនរហូតមានទ្រព្យសម្បត្តិ ៤៥លានដុល្លារគិតត្រឹមឆ្នាំនេះ។

៩. តារាសម្ដែង Irrfan Khan: ទ្រព្យសម្បត្តិ ៥០លានដុល្លារ

Irrfan Khan កើតនៅថ្ងៃទី ៧ ខែមករាឆ្នាំ ១៩៦៧ មានឈ្មោះពេញថា "Sahabzade Irrfan Khan” ជាតារាសម្ដែងឥណ្ឌា ដែលល្បីឈ្មោះខ្លាំងក្នុង រឿងប្រភេទ Hindi។ លោកក៏ធ្លាប់ចូលសម្ដែងក្នុងរឿងហូលីវូដផងដែរ។ លោកបានចូលរួមសម្ដែងក្នុងរឿង Jurrasic World ដែលបំបែកឯកត្តកម្ម ដោយរកចំណូលបាន ៥១១លានដុល្លារទូទាំងពិភពលោកពេលដាក់បញ្ចាំងលើកដំបូង។ ដោយសារតែសមត្ថភាព និងជំនាញក្នុងការសម្ដែង តារារូបនេះអាចរកចំណូលបានដល់ទៅ ៤លានដុល្លារក្នុងមួយរឿង។

៨. តារាសម្ដែង John Abraham: ទ្រព្យសម្បត្តិ ៥៥លានដុល្លារ

John Abraham ជាតារាសម្ដែងឥណ្ឌា កើតនៅថ្ងៃទី ១៧ ខែ ធ្នូ ឆ្នាំ ១៩៧២។ លោកក៏ជាផលិតករ និងធ្លាប់ជាតារាម៉ូដែលទៀតផង។ លោកបានចាប់ផ្ដើមប្រលូកក្នុងវិស័យសម្ដែងក្នុងរឿង "Jism” ដែលធ្វើឲ្យលោកជាប់ឈ្មោះក្នុងការដណ្ដើមពានរង្វាន់ Filmfare សម្រាប់ការសម្ដែងលើកដំបូង។ តារាវ័យ ៤៥ ឆ្នាំរូបនេះអាចរកចំណូលដល់ជាង ២លានដុល្លារសម្រាប់ការសម្ដែងមួយរឿង។

៧. តារាសម្ដែង Ranbir Kapoor: ទ្រព្យសម្បត្តិ ៦៦លានដុល្លារ

Ranbir Kapoor កើតនៅថ្ងៃទី ២៨ ខែ កញ្ញា ឆ្នាំ១៩៨២។ លោកជាតារាជួរមុខឥណ្ឌាម្នាក់ ដោយបានសម្ដែងក្នុងរឿងបូលីវូដជាច្រើន និងក្លាយជាតារាម្នាក់ក្នុងចំណោមតារាដែលរកចំណូលបានច្រើនជាងគេបំផុតនៅប្រទេសឥណ្ឌា។ លោកទទួលបានពានរង្វាន់ជាច្រើនក្នុងនោះ លោកបានទទួលបានពាន Filmfare ចំនួន ៥ ពានផងដែរ។ ចំពោះចំណូលវិញតារាល្បីម្នាក់នេះអាចរកប្រាក់បានដល់ទៅជាង ៣លាន ឫ៤លានដុល្លារឯណោះក្នុងមួយរឿង។

៦. តារាសម្ដែង Dharmendra: ទ្រព្យសម្បត្តិ ៧០លានដុល្លារ

លោក Dharmendra កើតនៅថ្ងៃទី ៨ ខែ ធ្នូ ឆ្នាំ ១៩៣៥។ លោកជាតារាសម្ដែងល្បីម្នាក់ ដែលទទួលបានពានរង្វាន់ Filmfare Lifetime Achivement Award កាលពីឆ្នាំ ១៩៩៧។ លោកបានដើរតួ ក្នុងរឿងប្រភេទ វាយតប់បាញ់បោះ (Action) និងទទួលបានងារថាជា "Action King” និង "He-Man”។ បើគិតត្រឹមពេលនេះ លោកសម្ដែងច្រើនជាង ១០០ រឿងហើយ ដែលធ្វើឲ្យលោកក្លាយជាតារាម្នាក់ដែលមានកេរ្តិ៍ឈ្មោះល្បីខ្លាំងនៅបូលីវូដ។

៥. តារាសម្ដែង Akshay Kumar: ទ្រព្យសម្បត្តិ ១៨០លានដុល្លារ

លោក Akshay Kumar កើតនៅថ្ងៃទី ៩ ខែ កញ្ញា ឆ្នាំ១៩៦៧ ដែលមានឈ្មោះដើមថា "Rajiv Hari Om Bhatia”។ លោកគឺជាតារាសម្ដែង ផលិតករ ព្រមទាំងអ្នកចេះក្បាច់គុនផងដែរ ដែលបានចូលរួមសម្ដែងរាប់រយរឿង។ លោកទទួលបានពានរង្វាន់ Filmfare ចំនួនពីរ ហើយសព្វថ្ងៃទ្រព្យសម្បត្តិរបស់លោក គឺដល់ទៅ ១៨០លានដុល្លារអាមេរិកឯណោះ។ មិនត្រឹមតែប៉ុណ្ណោះ តារាជើងចាស់ម្នាក់នេះមាន ផ្ទះកម្សាន្ត ឡានរាប់សិបគ្រឿង និងម៉ូតូល្អៗជាច្រើនទៀតផង។

៤. តារាសម្ដែង Aamir Khan: ទ្រព្យសម្បត្តិ ១៨៥លានដុល្លារ

តារាសម្ដែងឥណ្ឌាលោក Aamir Khan កើតនៅថ្ងៃទី ១៤ ខែមីនា ឆ្នាំ១៩៦៥។ លោកជាតារាសម្ដែង អ្នកដឹកនាំរឿង និងជាផលិតករមួយរូប។ លោក គឺជាតារាល្បីម្នាក់ និងមានឥទ្ធិពលផងដែរក្នុងវិស័យភាពយន្តឥណ្ឌា។ លោកមានលទ្ធភាពរកបានប្រាក់ចំណូលដល់ទៅជាង ៨លានដុល្លារក្នុងមួយរឿង ដោយសារតែភាពល្បីល្បាញ និងការចូលរួមការងារសង្គមផ្សេងៗ។

៣. តារាសម្ដែង Salman Khan: ទ្រព្យសម្បត្តិ ២០០លានដុល្លារ

Salman Khan កើតនៅថ្ងៃទី ២៧ ខែ ធ្នូ ឆ្នាំ ១៩៦៥ ដែលមានឈ្មោះដើមថា "Abdul Rashid Salman Khan”។ លោក គឺជាតារាសម្ដែង ផលិតករ និងជាតារាទូរទស្សន៍ម្នាក់។ លោកទទួលបានពានរង្វាន់ធំៗ ជាច្រើនដូចជាពាន National Film Awards ចំនួន ៤ និង Filmfare Awards ចំនួន៧។

២. តារាសម្ដែង Amitabh Bachchan: ទ្រព្យសម្បត្តិ ៤០២លានដុល្លារ

Amitabh Bachchan កើតនៅថ្ងៃទី ១១ ខែតុលា ឆ្នាំ ១៩៤២។ លោក Amitabh “Harivansh” Bachchan គឺជាតារាសម្ដែងឥណ្ឌាម្នាក់ ដែលទទួលបានការគាំទ្រខ្លាំងនៅដើមទសវត្ស ទី ៧០ សម្រាប់រឿង "Zanjeer” និង "Deewarm”។ មិនត្រឹមតែប៉ុណ្ណោះ លោក គឺជាគំរូសម្រាប់តារាជំនាន់ក្រោយនៅប្រទេសឥណ្ឌាទៀតផង។

១. តារាសម្ដែង Shah Rukh Khan: ទ្រព្យសម្បត្តិ ៦០០លានដុល្លារ

Shah Rukh Khan ឫហៅកាត់ថា SRK កើតនៅថ្ងៃទី ២ ខែ វិច្ឆិកា ឆ្នាំ ១៩៦៥ គឺតារាសម្ដែង ផលិតករ និងជាតារាទូរទស្សន៍។ ជាមួយនឹងភ្នែកពណ៌ត្នោត និងថ្ពាល់ខួច Shahrukh Khan គឹមិនត្រឹមតែជាតារាដែលមានជាងគេនៅ Bollywood ប៉ុណ្ណោះទេ លោក គឺរាប់បញ្ចូលក្នុងបណ្តាតារាដែលមានទ្រព្យសម្បតិ្តច្រើនជាងគេទូទាំងពិភពលោកទៀតផង។ បើគិតត្រឹមពេលនេះ លោកបានសម្ដែងជាង ៣០០ រឿងទៅហើយ។ លោកបានជាប់ឈ្មោះដណ្ដើមពានរង្វាន់ដល់ទៅ ២២៦ ដង និងឈ្នះពានចំនួន ២០៧ ពាន។ ហេតុដូច្នេះហើយ ទើបលោកជាតារាម្នាក់ដែលមានទ្រព្យសម្បត្តិដល់ទៅ ៦០០លានដុល្លារអាមេរិក៕

ប្រភព៖ top10reviewof ប្រែសម្រួល៖ ធារ៉ូ