ម្ចាស់ពុម្ពអក្សរខ្មែរអាក្បាលធំ ប្រកាសដាក់លក់ស្នាដៃ ក្រោយគ្មានអ្នកគិតគូរឲ្យតម្លៃ

2017-05-05 03:14:34
ចំនួនមតិ 0 | ចំនួនចែករំលែក 0

ចន្លោះមិនឃើញ

"មកដល់ពេលនេះខ្ញុំត្រូវការលក់ពុម្ពអក្សររបស់ខ្ញុំ ក្នុងតម្លៃពិតប្រាកដ តម្លៃដែលជាកិត្តិយសរបស់ខ្ញុំ ដែលខ្ញុំជាអ្នកបង្កើត គិតថាអាចលក់បាន ដោយគិតពីភាពលំបាក ពេលវេលា ការចំណាយផ្សេង។ នៅ សំណាង ម្ចាស់ពុម្ពអក្សរខ្មែរអាក្បាលធំ/ AKbalthom បញ្ជាក់។

លោក នៅ សំណាង(រូបទី១ រាប់ពីឆ្វេង)

លោក នៅ សំណាង ដែលជាសមាជិកម្នាក់ក្នុងក្រុមអ្នករចនាពុម្ពអក្សរខ្មែរ បានប្រកាសដាក់លក់ស្នាដៃរចនាពុម្ពអក្សរផ្ទាល់ខ្លួនកាលពីពេលថ្មីៗ នៅលើគណនី Facebook របស់លោកភ្ជាប់ជាមួយពាក្យពេចន៍ **អរុណសួស្ដី ពេលព្រឹកស្រទន់ ២៥អង្សាសេ ខ្ញុំមានរឿងចង់និយាយនិងចង់ប្រាប់ អស់កាលជាច្រើនឆ្នាំមកហើយ ដែលដាក់ឲ្យទាញយកពុម្ពអក្សរខ្មែរ សម្រាប់ប្រើប្រាស់ក្នុងផ្លូវមិនពាណិជ្ជកម្ម តែសម្រាប់អ្នកប្រើក្នុងផ្លូវពាណិជ្ជកម្មគឺត្រូវទិញឬបង់លុយថ្លៃសិទ្ធិប្រើប្រាស់ពុម្ពអក្សរស្របច្បាប់។**

ចំពោះតម្លៃវិញខ្ញុំបានលក់ក្នុងតម្លៃ ធូរថ្លៃពី២០$ទៅ៣០$ រាប់សិបឆ្នាំមកហើយ ហើយក៏គ្មានអ្នកភ្ញាក់រម្លឹក គិតគូរពីភាពថ្លៃថ្នូរនៃការប្រើប្រាស់ស្នាដៃរបស់គេទេ ។ ត្រង់ចំណុចនេះខ្ញុំមិននិយាយពីភាពហិនហោចនៃការលួចចម្លងស្នាដៃគេទេ ទុកឲ្យគិតដោយខ្លួនឯងចុះថាវាមានទំហំប៉ុណ្ណា។

មកដល់ពេលនេះខ្ញុំត្រូវការលក់ពុម្ពអក្សររបស់ខ្ញុំ ក្នុងតម្លៃពិតប្រាកដ តម្លៃដែលជាកិត្តិយសរបស់ខ្ញុំ ដែលខ្ញុំជាអ្នកបង្កើត គិតថាអាចលក់បាន ដោយគិតពីភាពលំបាក ពេលវេលា ការចំណាយផ្សេងៗ។

ម្ចាស់ពុម្ពអក្សរអាក្បាលធំរូបនេះ បានឲ្យ Sabay ដឹងថា ការលក់ពុម្ពអក្សរផ្ទាល់ខ្លួនដែលខំរចនាដោយខ្លួនឯងជាច្រើនឆ្នាំមកនេះ ដោយសារមានតែការគាំទ្រស្នាដៃ តែគ្មានអ្នកផ្ដល់តម្លៃលើពុម្ពអក្សរ ពោលគឺ បើលោកធ្វើបាន គេគាំទ្រ តែបើដាក់លក់វិញគេរិះគន់ថា ហេតុអ្វីបានជាដាក់លក់ គ្រាន់តែពុម្ពអក្សរសោះ?

ចំពោះលក្ខខណ្ឌក្នុងការលក់ពុម្ពអក្សរខ្មែរអាក្បាលធំលោក សំណាង បានបន្ថែមថា បើទិញជាកញ្ចប់ ២០០$ និងមានសិទ្ធិប្រើប្រាស់ពុម្ពក្រោយៗទៀត ប៉ុន្តែឥឡូវលោកលក់តែ ១០០$ ប៉ុណ្ណោះជាតម្លៃពិតប្រាកដ។

ប្រិយមិត្តដែលចង់បន្តប្រើប្រាស់ស្នាដៃរចនាពុម្ពអក្សរខ្មែរអាក្បាលធំ អាចទាក់ទងរកជាវដោយផ្ទាល់តាមរយៈលេខ 069 556 887 ឬ Facebook Page: អាក្បាលធំ / AKbalthom៕