សម្ដេចតេជោ ហ៊ុន សែន៖ បច្ចេកវិទ្យាកាន់តែជឿនលឿន អាចបង្កហានិភ័យដល់វិស័យការងារ

2017-05-11 05:20:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្លែងនៅក្នុងសន្និសីទសារព័ត៌មាន ក្នុងកិច្ចប្រជុំសេដ្ឋកិច្ចពិភពលោក ស្ដីពីអាស៊ាន ក្រោមប្រធានបទយុវជន បច្ចេកវិទ្យា និងកំណើន សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ថា បច្ចេកវិទ្យាកាន់តែដើរលឿនទៅ ក៏អាចបង្កហានិភ័យដល់វិស័យការងារដូចគ្នា។

សម្ដេចនាយករដ្ឋមន្ត្រី ថ្លែងបន្តទៀតថា សម្រាប់ប្រជាជននៅគ្រប់ប្រទេសទាំងអស់មិនថា តែក្នុងតំបន់អាស៊ានប៉ុណ្ណោះទេ បច្ចេកវិទ្យាកាន់តែជឿនលឿន គឺអាចកាត់បន្ថយមនុស្សធ្វើការ ការបាត់បង់ការងារធ្វើ ក៏ដូចជាពិបាកក្នុងការស្វែងរកការងារ។ ដូច្នេះហើយ ត្រូវតែរកដំណោះស្រាយ ចំពោះបញ្ហានេះ កុំឱ្យមានហានិភ័យទៅដល់យុវជនក្នុងវិស័យការងារ។

សម្ដេចតេជោ ហ៊ុន សែន បានបញ្ជាក់ទៀតថា សម្រាប់កម្ពុជា យុវជនកំពុងស្រេកឃ្លានចំណេះដឹង ការស្រវាប្រទាញ ចាប់យកឱកាសជាខ្លាំង ក្នុងការប្រកួតប្រជែងជាមួយយុវជនប្រទេសដទៃទៀត។ ទន្ទឹមនឹងនោះរាជរដ្ឋាភិបាល ក៏ចេញគោលនយោបាយ ជាមួយការដាក់ចេញជំរុញការបណ្ដុះបណ្ដាល ការកែប្រែប្រព័ន្ធអប់រំឱ្យកាន់តែជឿនលឿន ការបណ្ដុះបណ្ដាលជំនាញវិជ្ជាជីវៈ ដើម្បីឱ្យយុវជនកម្ពុជា ក្លាយជាធនធានមនុស្ស ដែលមានគុណភាពពិតប្រាកដ។

សម្ដេច នាយករដ្ឋមន្ត្រី ក៏សង្ឃឹមថា យុវជនកម្ពុជាអាចនឹងដើរទាន់យុវជនដទៃទៀតក្នុងតំបន់ ជាមួយបច្ចេកវិទ្យាកំពុងតែរីកចម្រើនខ្លាំង ហើយគោលដៅដែលកម្ពុជាចង់បាន គឺចង់ឃើញយុវជនមានលទ្ធភាពប្រកួតប្រជែង នៅក្នុងសមាហរណកម្មសេដ្ឋកិច្ចអាស៊ាន។ បន្ថែមលើពីនេះ កម្ពុជានឹងខិតខំ បន្ថែមទៀតដើម្បីឱ្យ ប្រាក់ចំណូលសរុបប្រចាំឆ្នាំរបស់ប្រជាជន អាចប្រកួតប្រជែងជាមួយប្រទេសក្នុងតំបន់នាថ្ងៃអនាគត៕

អត្ថបទ៖ វឌ្ឍនៈ