គូររូបតាមទម្រង់មុខ មួយផ្ទាំង ៣ដុល្លារ ទាក់ទាញការចាប់អារម្មណ៍នៅឥណ្ឌា

2017-05-12 02:08:42
ចំនួនមតិ 0 | ចំនួនចែករំលែក 0

ចន្លោះមិនឃើញ

វេលាល្ងាច វាយោរំភើយបក់បោកមកពីបឹងធំមួយ ឈ្មោះថា Sukhna Lake ក្រុង Chandigarh ប្រទេសឥណ្ឌា ធ្វើឲ្យមនុស្សជាច្រើនមកលេងត្រៀបត្រា ប៉ុន្តែគ្រប់គ្នាបានចោលនេត្រាទៅកាន់វិចិត្រករ៥នាក់ ដែលកំពុងញាប់ដៃគូររូបតាមទម្រង់មុខ ក្នុងតម្លៃមួយផ្ទាំង ២០០រូពី(៣ដុល្លារ)។

លោក Vivaan ដែលជាវិចិត្រករមួយរូបប្រចាំតំបន់ Sukhna Lake បានប្រាប់ Sabay ថា ការគូររូបបែបនេះ គឺបានរៀនតាមក្បួនខ្នាតត្រឹមត្រូវ មិនមែនចេះតែគូរឡើយ ហើយបូករួមនឹងទេពកោសល្យទើបអាចធ្វើឲ្យរូបចេញមកទាក់ទាញដូចទម្រង់មុខពិតៗ។ លោក Vivaan បាននិយាយបែបនេះថា៖ "ដំបូងគេគូរចេញពីភ្នែក ហើយមាត់ និងច្រមុះ រួចហើយបានគូរទម្រង់មុខព័ទ្ធជុំវិញ បើគូរខុសក្បួន ចេញមកមិនដូចទម្រង់មុខទេ ហើយម្ចាស់រូបក៏មិនសប្បាយចិត្តដែរ"។

ចំពោះការគូររូបនេះ លោក Vivaan ប្រាប់ថា យកតម្លៃ ២០០រូពី(៣ដុល្លារ) ប្រសិនបើមនុស្សមកអង្គុយឲ្យមើលមុខ ដើម្បីគូរដោយផ្ទាល់។ ប្រសិនបើ គូរទម្រង់មុខ តាមរូបដែលមានលើទូរសព្ទដៃ យកតម្លៃ ១០០០រូពី(១៥ដុល្លារ)។ វិចិត្រកររូបនេះ បានប្រាប់ថាក្នុងមួយថ្ងៃអាចរកចំណូលបានប្រហែល ២០ ទៅ ៣០ដុល្លារ ប៉ុន្តែបើជាថ្ងៃឈប់សម្រាកវិញ អាចបានគុណនឹង២។ យ៉ាងណាក្ដី លោកថា បច្ចុប្បន្នកំពុងជួបការប្រឈមខ្លាំង ព្រោះអ្នកចាប់យករបរនេះមានកាន់តែច្រើន ដែលជាហេតុធ្វើឲ្យចំណូលធ្លាក់ចុះ៕