ចម្លាក់បុរាណរាប់រយប្រភេទ កំពុងជ្រកក្រោមដំបូលសារមន្ទីរមួយនៅប្រទេសឥណ្ឌា

2017-05-04 02:31:30
ចំនួនមតិ 0 | ចំនួនចែករំលែក 0

ចន្លោះមិនឃើញ

សារមន្ទីរ Museum and Art Gallery នៅទីក្រុង Chandigarh បានក្លាយជាកន្លែងប្រមូលផ្ដុំវត្ថុបុរាណ និងចម្លាក់ច្រើនបំផុតលំដាប់ទី២ នៅប្រទេសឥណ្ឌា ហើយវាបានរំឭកឡើងវិញនូវអតីតកាលដ៏អស្ចារ្យប្រចាំតំបន់អច្ឆរិយនៃដែនដីអាស៊ីមួយនេះ។

សារមន្ទីរ Museum and Art Gallery ត្រូវបានរចនាប្លង់ឡើងចន្លោះឆ្នាំ ១៩៦០-១៩៦២ និងសាងសង់ពីឆ្នាំ ១៩៦២-១៩៦៧ ហើយសម្ពោធប្រើប្រាស់ជាផ្លូវការនៅឆ្នាំ១៩៦៨។ តាមឯកសារនៅសារមន្ទីរបានបង្ហាញថា វត្ថុបុរាណ និងចម្លាក់ទាំងអស់ចាប់ផ្ដើមប្រមូលពីតំបន់នានាតាំងពីឆ្នាំ១៩៤៧ ហើយភាគច្រើនវាមានអាយុកាលរហូតដល់រាប់ពាន់ឆ្នាំ គឺមុនគ្រិស្តសករាជទៅទៀត។

នៅក្នុងសារមន្ទីរបានចែកជាផ្នែកផ្សេងៗ ដោយមានដាក់តាំងគំនូរបុរាណជាច្រើនផ្ទាំង រួមទាំងរបស់ប្រើប្រាស់ប្រចាំថ្ងៃរបស់ប្រជាជនសម័យមុន។ លើសពីនេះ សៀវភៅអាយុកាលរាប់រយឆ្នាំ ដែលរំលេចដោយអក្សរបុព្វបុរសឥណ្ឌា ក៏បានប្រមូលផ្ដុំនៅក្នុងសារមន្ទីរផងដែរ។ អ្វីដែលរឹតតែពិសេស គឺនៅក្នុងសារមន្ទីរ Museum and Art Gallery មានចម្លាក់បុរាណជាច្រើន រួមមានទាំងបដិមាព្រះពុទ្ធ និងបដិមាបែបសាសនានៅឥណ្ឌា រហូតដល់រាប់រយប្រភេទផ្សេងគ្នា។

សារមន្ទីរ Museum and Art Gallery ស្ថិតនៅក្រោមការគ្រប់គ្រងរបស់អាជ្ញាធរក្រុង Chandigarh ហើយជាស្ថាប័នមួយមិនរកប្រាក់ចំណេញ ប៉ុន្តែយកតម្លៃចូលទស្សនាបន្តិចបន្តួចដើម្បីរដ្ឋបាលទូទៅ។ អ្នកចូលទស្សនាត្រូវចំណាយប្រាក់ ១០រូពី(៦០០រៀល) ហើយបើមានកាមេរ៉ាថត ត្រូវចំណាយ ៥រូពី(៣០០រៀល) បន្ថែមទៀត៕

ទស្សនារូបភាព ដែលផ្ដិតដោយក្រុមការងារ Sabay៖