រឿងភាគកូរ៉េល្បីទាំង ៨ ដែលត្រូវប៉ាន់អ្នកទស្សនាដែលចូលចិត្តញ៉ាំ
- 2017-05-13 02:08:09
- ចំនួនមតិ 0 | ចំនួនចែករំលែក 0
រឿងភាគកូរ៉េល្បីទាំង ៨ ដែលត្រូវប៉ាន់អ្នកទស្សនាដែលចូលចិត្តញ៉ាំ
ចន្លោះមិនឃើញ
រឿងភាគកូរ៉េជាច្រើន ដែលបានធ្វើឲ្យអ្នកទស្សនាជក់ចិត្តដិតអារម្មណ៍ ចង់តាមដានម្ដងហើយម្ដងទៀត។ ប៉ុន្តែកត់សម្គាល់ថា ក្នុងចំណោមនោះ រឿងដែលទស្សនិកជនហាក់មានការចាប់អារម្មណ៍ គឺជាប្រភេទរឿងដែលបង្ហាញពីការធ្វើម្ហូប និងមានឈុតញ៉ាំច្រើន។
ខាងក្រោមជារឿងភាគចំនួន ៨ ដែលត្រូវចិត្តអ្នកទស្សនា ជាពិសេសអ្នកចូលចិត្តញ៉ាំ៖
១. រឿង "Oh My Ghostess"
រឿងនេះបាននិយាយពីចុងភៅនារីដ៏គួរឲ្យស្រលាញ់ម្នាក់ (តារាសម្ដែង Park Bo Young) ដែលលង់ស្រលាញ់មេចុងភៅរូបសង្ហា (តារាសម្ដែង Jo Jung Suk)។ ថ្វីត្បិតជារឿងបែបមនោសញ្ចេតនា ប៉ុន្តែស្ទើរគ្រប់ឈុត គឺមានបង្ហាញការធ្វើម្ហូបគួរឲ្យចាប់អារម្មណ៍ណាស់។
២. រឿង "Jewel in the Palace"
ភាពយន្តភាគបែបបុរាណមួយនេះ ជារឿងដ៏ល្បីមួយរបស់កូរ៉េ ដែលបានបង្ហាញពីស្នាដៃធ្វើម្ហូបប្រពៃណីក្នុងព្រះរាជវាំង លាយឡំនឹងរបៀបផ្សំថ្នាំតាមបែបបុរាណ ពេលទស្សនាក៏អាចទទួលបានចំណេះដឹងថ្មីដែរ។
៣. រឿង "Weightlifting Fairy Kim Bok Joo"
ថ្វីត្បិតមិនមែនជារឿងដែលបង្ហាញពីការធ្វើម្ហូប ប៉ុន្តែស្ទើរគ្រប់ភាគក្នុងរឿង "Weightlifting Fairy Kim Bok Joo” សុទ្ធតែមានឈុតញ៉ាំ ពេលមើលហើយក៏ឃ្លានតាមដែរ។
៤. រឿង "My Name Is Kim Sam Soon"
រឿងនេះពោរពេញទៅដោយ សកម្មភាពធ្វើនំ និងបង្អែម។ វាអាចត្រូវចិត្តខ្លាំង សម្រាប់អ្នកដែលចូលចិត្តញ៉ាំបង្អែម ដូច្នេះទស្សនារឿងនេះគឺមិនខុសបំណងទេ។
៥. រឿង "Baker King, Kim Tak Goo"
ភាពយន្តកូរ៉េមួយនេះ ត្រូវបានចាត់ទុកថាជារឿងល្អមើលមួយ ក្នុងប្រវត្តិសាស្ត្ររឿងភាគកូរ៉េដែលបង្ហាញពីរបៀបដុតនំប៉័ង។ រឿងនេះមិនមែនល្បីតែនៅក្នុងប្រទេសកូរ៉េទេ ពោលគឺស្ទើរគ្រប់ប្រទេសជុំវិញអាស៊ី សូម្បីតែក្នុងប្រទេសកម្ពុជាក៏ធ្លាប់លើកយករឿងនេះមកបញ្ចាំងដែរ ហើយទទួលបានការគាំទ្រខ្លាំងណាស់។
៦. រឿង "Boys Over Flowers"
ដោយឡែក រឿងដែលសម្ដែងដោយតារាសម្ដែងដ៏ល្បី Lee Min Ho និង Ku Hye Sun នេះវិញក៏សម្បូរឈុតញ៉ាំដែរ ជាពិសេសពេលដែលតួទាំង២ទៅភិកនិក។ ពួកគេបានបង្ហាញអាហារជាច្រើនមុខ ធ្វើឲ្យអ្នកមើល ទស្សនាហើយឃ្លានតាមតែម្ដង។
៧. រឿង "Pasta"
រឿង Pasta ខុសពីរឿងដទៃ ដោយសារ បានបង្ហាញពីរបៀបធ្វើអាហារបែបអ៊ីតាលី ដូច្នេះអាចត្រូវប៉ាន់អ្នកដែលនិយមអាហារអឺរ៉ុប។
៨. រឿង "The Legendary Witch"
ក្រៅពីនិយាយពីទំនាក់ទំនងបងប្អូនស្រី រឿងនេះក៏បានបង្ហាញពីរបៀបដុតនំប្រកបដោយភាពប៉ិនប្រសប់លក្ខណៈគ្រួសារ ដែលពួកគេបានធ្វើរួមគ្នា៕