តារាចម្រៀងអាមេរិកម្នាក់ចងកធ្វើអត្តឃាតខ្លួនឯងមិនដឹងមូលហេតុ

2017-05-19 03:51:46
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង និងជាតន្ត្រីពោរពេញដោយទេពកោសល្យ របស់អាមេរិក Chris Cornell បានទទួលមរណភាពហើយ កាលពីថ្ងៃ ១៧ ខែឧសភា ដោយសារធ្វើអត្តឃាតខ្លួនឯង។

តារាចម្រៀងវ័យ ៥២ឆ្នាំរូបនេះ ត្រូវបានរកឃើញថាបានស្លាប់ បន្ទាប់ពីបញ្ចប់ការសម្ដែងជាមួយក្រុមតន្ត្រីរបស់លោកដែលមានឈ្មោះថា Soundgarden ក្នុងទីក្រុង Detroit កាលពីល្ងាចថ្ងៃពុធ។

បើយោងតាម ខាងមន្ទីរកោសល្យវិច័យ "The Wayne County Medical Examiner” បានបញ្ជាក់ថា តារាប្រុសរូបនេះពិតជាអ្នកដែលបញ្ចប់ជីវិតខ្លួនឯង។ រីឯអ្នកតំណាងរបស់ Cornell លោក Brian Bumbery បានលើកឡើងមុននេះថា ការស្លាប់របស់តារារូបនេះ គឺកើតឡើងលឿនពេកនឹកស្មានមិនដល់។ ចំណែកឯខាងគ្រួសាររបស់លោក ក៏កំពុងធ្វើការយ៉ាងជិតស្និទ្ធជាមួយក្រុមការងារកោសល្យវិច័យ ហើយបានស្នើសុំរក្សាការសំងាត់ផងដែរ។

អ្នកនាំពាក្យខាងប៉ូលិសក្រុង Detroit បានបង្ហាញទៅកាន់សារព័ត៌មាន BBC ថាពួកគេបានទទួលការហៅទូរស័ព្ទនៅពាក់កណ្ដាលយប់ថ្ងៃពុធ និងបានបន្ថែមថា Cornell ត្រូវបានរកឃើញថាបានស្លាប់នៅក្នុងបន្ទប់ទឹក។

ក្រោយមកនៅថ្ងៃព្រហស្បតិ៍ក្រុមកោសល្យវិច័យ បាននិយាយថា៖ "មូលហេតុនៃការស្លាប់ ត្រូវបានកំណត់ថា ដោយសារចង កធ្វើអត្តឃាតខ្លួនឯង។ ចំពោះការធើ្វរបាយការណ៍បង្ហាញពីកោសល្យវិច័យទាំងស្រុង មិនទាន់ត្រូវបានបញ្ចប់ទេ ហើយក្នុងពេលនេះក៏មិនទាន់មានព័ត៌មានអ្វីផ្សេងទាក់ទងនឹងការស្លាប់របស់លោកដែរ”។

មរណភាពរបស់តារាចម្រៀងក្នុងក្រុមតន្ត្រីរ៉ុករូបនេះ ធ្វើឲ្យគ្រួសារ មិត្តភ័ក្ដិ និងអ្នកគាំទ្រមានការភ្ញាក់ផ្អើលស្រឡាំងកាំងជាខ្លាំង នឹកស្មានមិនដល់ នឹងហេតុការណ៍ដ៏អាក្រក់នេះ ព្រោះវាកើតឡើងលឿនពេក៕

ប្រភព៖ BBC ប្រែសម្រួល៖ យី សុធារី