ជំនួយចិនមកលើកម្ពុជា កើនដល់ជាង ៤ពាន់ លានដុល្លារ
- 2017-05-22 08:45:21
- ចំនួនមតិ 0 | ចំនួនចែករំលែក 0
ជំនួយចិនមកលើកម្ពុជា កើនដល់ជាង ៤ពាន់ លានដុល្លារ
ចន្លោះមិនឃើញ
ជំនួយផ្ទាល់ពីប្រទេសចិន សម្រាប់ជួយអភិវឌ្ឍន៍ប្រទេសកម្ពុជា បានកើនឡើងជាង ៤ ០០០ លានដុល្លារអាមេរិក បើគិតត្រឹមរយៈពេលជិត ២០ឆ្នាំចុងក្រោយនេះ។
លោកទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃអង្គារនេះ បានឲ្យដឹងថា ជំនួយពីប្រទេសចិនមកលើកម្ពុជា មានទឹកប្រាក់សរុប ៤ ២៩៧ លានដុល្លារអាម៉េរិក។ ជំនួយដែលផ្ដល់ចាប់ពីឆ្នាំ២០០១ ដល់ខែមីនា ឆ្នាំ២០១៧នេះ មានទាំងជំនួយហិរញ្ញប្បទានឥតសំណង ឥណទានឥតការប្រាក់ ដើម្បីយកមកអភិវឌ្ឍន៍ហេដ្ឋារចនាសម្ពន្ធនៅកម្ពុជា។
លោកទេសរដ្ឋមន្ត្រី មានប្រសាសន៍ថា ប្រទេសចិននៅតែជាដៃគូនាំមុខគេមួយ ក្នុងការផ្ដល់ហិរញ្ញប្បទានឥតសំណង និង ឥណទានសម្បទានដល់កម្ពុជា។ លោក អូន ព័ន្ធមុនីរ័ត្ន បានបញ្ជាក់ថា «ប្រទេសចិនបាន ផ្ដល់ជំនួយដ៏ច្រើនសន្ធឹកសន្ធាប់លើគ្រប់វិស័យ និងរាយប៉ាយសឹងគ្រប់អង្គភាព និងស្ថាប័នរបស់រាជរដ្ឋាភិបាលកម្ពុជា»។ លោកទេសរដ្ឋមន្ត្រី បន្តថា ការរីកចម្រើនរបស់កម្ពុជានាពេលបច្ចុប្បន្ន គឺកើតឡើងដោយសារការជួយយ៉ាងធំធេងពីសំណាក់រដ្ឋាភិបាល និងប្រជាជនចិន ទាំងនយោបាយ សេដ្ឋកិច្ច បច្ចេកទេស និងហិរញ្ញវត្ថុ។
លោក ស្យុង ប៉ូ (Xiong Bo) ឯកអគ្គរដ្ឋទូតចិនប្រចាំកម្ពុជា បាននិយាយថា ទំនាក់ទំនង និងកិច្ចសហប្រតិបត្តិការរវាងរាជរដ្ឋាភិបាលកម្ពុជា និងរដ្ឋាភិបាលប្រទេសចិន កំពុងតែស៊ីជម្រៅពីមួយថ្ងៃទៅមួយ ថ្ងៃ និងកាន់តែគ្រប់ជ្រុងជ្រោយ ហើយកំពុងឈានទៅរកគោលនយោបាយនៃការសហប្រតិបត្តិការ ស្ដីពី «ផ្លូវមួយ ខ្សែក្រវ៉ាត់» ដែលផ្ដួចផ្ដើមឡើងដោយប្រមុខដឹកនាំរបស់ប្រទេសចិន។ លោកឲ្យដឹងថា រដ្ឋាភិបាលចិននៅតែបន្តកិច្ច សហប្រតិបត្តិការជាមួយកម្ពុជានៅក្នុងវិស័យសំខាន់ៗ ដើម្បីជួយជំរុញឲ្យ ប្រទេសកម្ពុជាអភិវឌ្ឍន៍កាន់តែឆាប់រហ័ស ដែលនឹងនាំមកនូវសុខុមាលភាពប្រជាជនកាន់តែប្រសើរ។
រដ្ឋាភិបាលចិន តែងផ្ដល់ជំនួយអភិវឌ្ឍន៍ប្រទេសកម្ពុជា ដើម្បីតបស្នងរាជរដ្ឋាភិបាលកម្ពុជា ដែលប្រកាន់ជំហរគោលនយោបាយចិនតែមួយឥតងាករេ បើទោះបីជារងការរិះគន់ពីក្រុមគណបក្ស ប្រឆាំង។
រាជរដ្ឋាភិបាលកម្ពុជាបាបានប្រើប្រាស់លុយទាំងនោះទៅលើការអភិវឌ្ឍផ្លូវថ្នល់ ស្ពាន ថាមពលអគ្គិសនី ប្រព័ន្ធធារាសាស្ត្រ សង្គមកិច្ច កងទ័ព ធនធានមនុស្ស ជាដើម៕