ធ្វើការនៅ CTN សុខៗ យុគ ចិន្តា ត្រូវប្រកាសជា CEO ក្រុមហ៊ុនថ្មីមួយមុននេះ

2017-05-23 10:02:20
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅរសៀលនេះ អ្នកនាង យុគ ចិន្តា ត្រូវបានប្រកាសឲ្យដឹងថា ជានាយកប្រតិបត្តិ (CEO) របស់ក្រុមហ៊ុនថ្មីមួយ ក្នុងពេលដែលអ្នកនាងកំពុងកាន់ការមួយចំនួនរួចស្រេចនៅ CTN ដូចជាពិធីការិនី និងអ្នកគ្រប់គ្រងកម្មវិធី។

អ្នកនាង យុគ ចិន្តា និងលោក Dennis Garcia Arce Head of TMS Music

ក្រុមហ៊ុនថ្មីនោះ មានពាណិជ្ជនាមថា TMS(Talent Management Service) ដែលធ្វើការជិតស្និទ្ធក្នុងឧស្សាហកម្មកម្សាន្តក្នុងស្រុក។ តាម CEO ខាងលើប្រាប់ថា ក្រុមហ៊ុនអ្នកនាង គឺជាបុត្រសម្ព័ន្ធថ្មីមួយទៀតអង្គភាពដែលអ្នកនាងកំពុងបម្រើការសព្វថ្ងៃ គឺ CTN ដែលប្រើប្រាស់ទុនរួមសុទ្ធពីអង្គភាពធំមួយនេះ។

ក្រៅពីតំណែងធំខាងលើ បុគ្គលមានសក្ដានុពលក្នុងសិល្បៈរូបនេះ បញ្ជាក់ថា អ្នកនាងមិនមាន ភាគហ៊ុនណាមួយទេនៅក្នុងក្រុមហ៊ុន ក្រៅពីទទួលកម្រៃរបស់តួនាទីនោះ។ យ៉ាងនេះក្ដី អ្នកនាងសុំសិទ្ធិមិនអធិប្បាយពីតួលេខនៃប្រាក់កម្រៃដែលអ្នកនាងទទួលបានពីតួនាទីខាងលើ។

TMS ត្រូវបានប្រកាសដំណើរនៅរសៀលនេះ ដោយមានផ្ដល់សេវាសិល្បៈកម្សាន្តជាច្រើនដូចជា ចម្រៀង ភាពយន្ត និងក្រុមរាំជាដើម។ ដូច្នេះហើយទើបក្រុមហ៊ុនថ្មីមួយនេះ បានប្រមូលផ្ដុំដោយសិល្បករមានទេពកោសល្យមួយចំនួន ដូចជា អួន បឋម សេម ម៉ា ច័ន្ទបញ្ញា អតីតជយលាភីលេខ៣កម្មវិធី "ស្ដាប់ចម្រៀងរបស់ខ្ញុំ" រដូវកាលទី២ កញ្ញា រុន ស៊ីរ៉ា រួមទាំង ម្ចាស់បទ "ទេវតា" P-Sand, MC Bull និងកញ្ញា អ៊ីងអ៊ីង ជាដើម។

ថ្នាក់ដឹកនាំ និងសមាជិក TMS

ក្រៅពីតារាចម្រៀងវ័យក្មេងប៉ុន្មានដួងខាងលើ TMS នៅមានក្រុមរាំយុវវ័យ២ក្រុមទៀត។ ទាំងក្រុមរាំ និងសិល្បករផ្នែកចម្រៀង សុទ្ធជាបុគ្គលមានទេពកោសល្យឆ្នើមផ្នែកសិល្បៈ។ អ្នកនាង យុគ ចិន្តា ជានាយកប្រតិបត្តិ ប្រាប់ថា ក្រៅពីផ្គត់ផ្គង់សេវាសិល្បៈដូចខាងលើ TMS ក៏មានផ្ដល់ការបណ្ដុះបណ្ដាលបន្ថែមលើជំនាញរបស់ពួកគេដែរ ដើម្បីឲ្យពួកគេកាន់តែឆ្នើម និងមានទីផ្សារខ្ពស់។

ដោយសារទើបនឹងចាប់ដំណើរការ អ្នកនាង យុគ ចិន្តា ប្រាប់ថា ក្រុមហ៊ុនអ្នកនាង គ្រោងនឹងជ្រើសរើស សិល្បករចូលបន្ថែមទៀត ដើម្បីបំពេញនូវតម្រូវការសេវាកម្សាន្តនានាក្នុងស្រុក ដែលបច្ចុប្បន្នអ្នកនាងឃើញថា ទីផ្សារនៅធំ តែការផ្គត់ផ្គង់នៅមានតិច។ "យើងមានគម្រោងនឹងរើសបន្ថែមទៀត ដោយពេលនេះមានតែក្រុមចម្រៀង តែបន្ទាប់ទៀត នឹងជ្រើសផ្នែកសម្ដែង ដើរម៉ូដ។ ប៉ុន្តែមិនមែនថា អ្នកណាក៏អាចចូលបានទេ ទាល់តែពួកគេ មានសមត្ថភាពគ្រប់គ្រាន់ដែរ"។

ដោយធ្លាប់ជាតារាចម្រៀងមិនមានទ្រនំច្បាស់លាស់ សិល្បករវ័យក្មេងបានប្រាប់ថាពួកគេប្រាប់ថា មានភាពកក់ក្ដៅ។ លោក ម៉ា ច័ន្ទបញ្ហា ថ្លែងថា លោករីករាយ និងមានជំនឿចិត្តថា ការសម្រេចចិត្តចូល TMS គឺជាជម្រើសត្រឹមត្រូវ ដោយហេតុថាលោកមានកន្លែងមួយរឹងមាំទាំងសេដ្ឋកិច្ច និងខ្លាំងខាងប្រព័ន្ធផ្សព្វផ្សាយសម្រាប់ជ្រកកោន ជាក់ស្ដែងពីក្រោយ TMS គឺមានទូរទស្សន៍៣រួចស្រេច គឺ CTN, MyTV និង CNC ។

ដូច្នេះហើយ លោកមានជំនឿថា អាជីពរបស់លោកកាន់តែមានផ្លែផ្កា។ មិនខុសពី បញ្ញា លោក អួន បឋម រុន ស៊ីរ៉ា សេម អះអាងដូចគ្នាថា ពួកគេជឿថា ក្រុមហ៊ុនខ្លួនអាចជួយយោងសមត្ថភាព និងទីផ្សាររបស់ពួកគេបាន។

ដោយសារសមាជិករើសចូលដំបូងសុទ្ធជាតារាចម្រៀង អ្នកនាង យុគ ចិន្តា បញ្ជាក់ថា នឹងរៀបឲ្យពួកគេបានបញ្ចេញស្នាដៃចម្រៀងរបស់ពួកគេបន្តបន្ទាប់នាពេលខាងមុខ ដើម្បីឲ្យពួកគេកាន់តែល្បីល្បាញ៕