បម្រាមដូនតាខ្មែរ! ផ្សំដំណេក សង់ផ្ទះ កប់ខ្មោច ដាច់ខាតកុំធ្វើក្នុងថ្ងៃទាំងនេះ
- 2017-05-24 03:01:13
- ចំនួនមតិ 0 | ចំនួនចែករំលែក 0
បម្រាមដូនតាខ្មែរ! ផ្សំដំណេក សង់ផ្ទះ កប់ខ្មោច ដាច់ខាតកុំធ្វើក្នុងថ្ងៃទាំងនេះ
ចន្លោះមិនឃើញ
តាមទំនៀមពីបុរាណ ដូនតាខ្មែរ តែងជឿថា តាមថ្ងៃនីមួយៗ មានថ្ងៃល្អ និងមិនល្អ ហាមប្រាមកូនចៅមិនឱ្យធ្វើកិច្ចការ ឬពិធីផ្សេងៗនៅក្នុងថ្ងៃទាំងនោះទៀតផង។ ជាក់ស្ដែងក្នុងពិធីបុណ្យសព ការកប់ខ្មោច ឬដុតខ្មោច មិនមែនចេះតែធ្វើផ្ដេសផ្ដាសនោះទេ។ ខាងក្រោមនេះ ជាបម្រាមមួយចំនួនរបស់ដូនតាខ្មែរ ហាមធ្វើដាច់ខាត ទៅតាមថ្ងៃនីមួយ៖
ថ្ងៃអាទិត្យ៖ ជំនឿពីបុរាណ ថ្ងៃអាទិត្យមានន័យថា ចុះក្ដៅ។ ដូច្នេះហាមកប់ខ្មោចក្នុងថ្ងៃអាទិត្យ ព្រោះអាចនាំរឿងហេតុមិនល្អ កើតឡើង ព្រលឹងខ្មោចមិនអាចទៅកាន់សុគតិភពនោះទេ។
ថ្ងៃអង្គារ៖ តាមទំនៀមទម្លាប់ ជំនឿតាំងពីបរមបុរាណ ថ្ងៃអង្គារ មានន័យថា ចុះភ្លើង។ ហាមដុតខ្មោច ដាច់ខាត ក្នុងថ្ងៃអង្គារ។
ថ្ងៃច័ន្ទ៖ មានន័យស្មើនឹងចុះផ្លូវ។ តាមបម្រាមពីបុរាណ ហាមដាច់ខាតលើកផ្លូវក្នុងថ្ងៃច័ន្ទ។
ថ្ងៃពុធ៖ មានន័យស្មើនឹងចុះភូមិ។ តាមជំនឿ ហាមដាច់ខាត លើកភូមិធ្វើលំនៅឋានក្នុងថ្ងៃពុធ។
ថ្ងៃព្រហស្បតិ៍៖ មានន័យស្មើនឹងចុះព្រៃ។ បម្រាមពីបុរាណ ហាមដាច់ខាត កាប់ឈើ ឬទិញឈើព្រៃសង់ផ្ទះ ក្នុងថ្ងៃព្រហស្បតិ៍។
ថ្ងៃសុក្រ៖ មានន័យស្មើនឹងចុះដំណេក។ បម្រាមពីបុរាណ ហាមផ្សំដំណេក ដាច់ខាតក្នុងថ្ងៃសុក្រ។
ថ្ងៃសៅរ៍៖ មានន័យស្មើនឹង ចុះទឹក។ ហាមចុះរកស៊ីតាមផ្លូវទឹក ដាច់ខាតក្នុងថ្ងៃសៅរ៍។
តាមទំនៀមទម្លាប់ពី បុរាណហាមនេះ បើចង់លើកផ្លូវ ឬទិញឈើ ឬផ្សំដំណេកជាដើម មិនមែនហាមដាច់ខាត ក្នុងថ្ងៃនេះទេ គឺមានន័យថា ចាប់ផ្ដើមក្នុងថ្ងៃដំបូង កុំឱ្យចំថ្ងៃនេះ ក្រោយៗមកទៀតចំថ្ងៃនេះ ក៏មិនអីដែរ៕