មានអ្នកដឹងទេ Apple បានបរាជ័យផ្ទួនគ្នាលើផលិតផល ៥ នេះ ព្រោះទាក់ចិត្តអតិថិជនមិនបាន

2017-05-25 02:52:36
ចំនួនមតិ 0 | ចំនួនចែករំលែក 0

ចន្លោះមិនឃើញ

Apple គឺជាក្រុមហ៊ុនបច្ចេកវិទ្យាអាមេរិកដ៏ធំមួយ ដែលមានការទទួលស្គាល់ច្រើនពីការចេញលក់ផលិតផលនានារបស់ខ្លួន។ ដោយឡែកទន្ទឹមនឹងភាពជោគជ័យ ពួកគេក៏ធ្លាប់បានប្រកាសចេញលក់នូវផលិតផលចំនួន ៥ ដែលពុំបានផ្ដល់ភាពទាក់ទាញនិងទទួលការចាប់អារម្មណ៍ពីសំណាក់អតិថិជនឡើយ។

១.iPod Suffle (ជំនាន់ទី ៣)

ជាច្រើនឆ្នាំមកហើយ Apple បានរុករកនូវវិធីសាស្ត្រក្នុងការច្នៃប្រឌិតឧបករណ៍របស់ខ្លួន ឱ្យមានភាពទាក់ទាញតាមរយៈការកាត់បន្ថយកម្រាស់ខ្លួន និងវិមាត្រម៉ាស៊ីន។ ត្រលប់ថយក្រោយមកឆ្នាំ ២០០៩ ក្រុមហ៊ុនអាមេរិកមួយនេះ បានបរាជ័យជាមួយឧបករណ៍ស្ដាប់ចម្រៀង iPod Suffle ជំនាន់ទី ៣ ខណៈពួកគេបានដកចោលនូវប្រភេទប៊ូតុងបញ្ជាឡើងចុះ ឆ្វេងស្ដាំដែលធ្លាប់តែមាននៅលើ iPod Suffle ជំនាន់ទី ១ និងទី ២ ហើយជំនួសដោយប្រភេទប៊ូតុងបង្កប់វិញ។ កត្តានេះហើយបានធ្វើឱ្យមនុស្សជាច្រើន សឹងតែមិនបានស្គាល់ពីវត្តមាន iPod Suffle ជំនាន់ទី ៣ ផង ព្រោះពុំមានការចាប់អារម្មណ៍នៅលើទីផ្សារ។

២.Apple G4 Cube:

កាលពី ១៧ ឆ្នាំមុន Apple បានប្រកាសចេញលក់នូវប្រភេទកុំព្យូទ័រលើតុរាងប្លែកបន្តិចម៉ូដែល G4 Cube ។ តម្លៃរបស់វាត្រូវបានគេដឹងថាប្រហែល ១,៧៩៩ ដុល្លារឯណោះ ប៉ុន្តែមិនគ្រាន់តែកត្តាតម្លៃមួយប៉ុណ្ណោះទេ ទាំងការរចនាមិនជាសូវស្អាតផង ក៏ការចេញលក់មានភាពរាំងស្ទះ រហូតដល់ក្រុមហ៊ុនត្រូវសម្រេចឈប់លក់ផលិតផលនោះតែម្ដង។

៣.Bandai Pippin:

នាអំឡុងឆ្នាំ ១៩៩០ ក្រុមហ៊ុន Apple បានប្រឡូកចូលក្នុងវិស័យផលិតឧបករណ៍ហ្គេមដូចទៅនឹង Nintendo, SEGA និង Commodore ដែរ ដោយបានបញ្ចេញឧបករណ៍ហ្គេមម៉ូដែល Bandai Pippin ។ កាលនោះពួកគេផលិតបាន ១០ មុឺនគ្រឿង លក់ក្នុងមួយគ្រឿងតម្លៃ ៥៩៩ ដុល្លារ ប៉ុន្តែត្រូវបានគេដឹងថា មានប្រមាណ ៥ មុឺនគ្រឿង ពុំមាននរណាអើពើទិញវាទៅប្រើប្រាស់ឡើយ។

៤.Macintosh TV:

ប្រភេទទូរទស្សន៍ដែលអាចតភ្ជាប់ជាមួយខ្សែទៅជាកុំព្យូទ័រ Desktop បាន ក្រុមហ៊ុន Apple ធ្លាប់បានដាក់លក់ក្នុងតម្លៃដល់ទៅ ២ ពាន់ដុល្លារកាលពីឆ្នាំ ១៩៩៣ ប៉ុន្តែវាពុំបានរង្គោះរង្គើចិត្តអតិថិជនអ្វីនោះទេ ហើយ Apple ក៏ត្រូវបរាជ័យជាមួយឧបករណ៍នោះ។

៥.Apple's Original USB Mouse:*

នាពិព័រណ៍ Macworld កាលពីឆ្នាំ ១៩៩៨ លោក Jony Ive អ្នកDesign ល្បីឈ្មោះមួយរូប របស់ Apple បានរចនាបង្កើតឡើងនូវប្រភេទ Mouse បញ្ជាភ្ជាប់ជាមួយខ្សែ USB ដែលត្រូវបានគេដឹងថា វាអាចធ្វើការចង្អុលទៅទីតាំងណាមួយ មានល្បឿនលឿនបំផុតក្នុងលោក នាអំឡុងឆ្នាំនោះ។ យ៉ាងណាមិញមិនដឹងជាហេតុអ្វីឱ្យច្បាស់ដែរ ឫអាចថាមកពីរូបរាងរបស់វាមិនទាក់ទាញក៏ថាបាន ផលិតផលមួយនោះក៏ជួបវិបត្តិនៃការលក់ដូចគ្នា។

ប្រភព៖ idropnews ប្រែសម្រួល៖ កៅ រក្សា