ចោរលួចឆ្កែ ៦នាក់ ត្រូវតុលាការវៀតណាមកាត់ទោសឲ្យជាប់ពន្ធនាគារខ្លះដល់ ៧ឆ្នាំ

2017-05-29 06:55:08
ចំនួនមតិ 0 | ចំនួនចែករំលែក 0

ចន្លោះមិនឃើញ

តុលាការខេត្តតៃនិញ ភាគខាងត្បូង ប្រទេសវៀតណាម បានកាត់ទោសមនុស្ស ៦នាក់ឲ្យជាប់ពន្ធនាគារចាប់ពី ៣ ដល់ ៧ឆ្នាំកាលពីថ្ងៃសៅរ៍កន្លងទៅ ក្រោយរកឃើញថាបានលួចឆ្កែជាច្រើនក្បាល។

ជនល្មើស ៤នាក់ ក្នុងចំនោម ៦នាក់

មនុស្ស ២នាក់ក្នុងចំណោមទាំង ៦នាក់ ជាមេខ្លោងជួញដូរសាច់ឆ្កែ និងបានបើករបរនេះរយៈពេលប្រមាណ ១ខែហើយ មុនពេលចាប់ខ្លួន។ លោក Nguyen Anh Tuan និងប្រពន្ធនាង Ngoc ត្រូវរងការចោទប្រកាន់ថា ជួញដូរសាច់ឆ្កែ និង ៤នាក់ទៀតរងបទចោទលួចឆ្កែ។

កាលដើមខែធ្នូ ឆ្នាំ ២០១៦ ចោរលួច ២នាក់ក្នុងចំណោម ៤នាក់ខាងលើ បានទៅនិយាយបញ្ចុះបញ្ចូលប្ដីប្រពន្ធទាំងពីរឲ្យទិញសាច់ឆ្កែ ដែលគ្នីគ្នាពួកគេដើរលួច និងទាក់បាន។

បើតាមប្រភព នៅពេលយប់ក្រុមចោរខាងលើបានចេញធ្វើសកម្មភាពលួចឆ្កែអ្នកភូមិដោយប្រើប្រាស់ម៉ូតូចំនួន ២គ្រឿង កាំភ្លើងឈើកែច្នៃ និងឧបករណ៍ទាក់មួយចំនួន រួចដាក់ក្នុងថង់ប្លាស្ទិក។ ពេលលួចបានពួកគេលក់ឲ្យប្ដីប្រពន្ធដដែល ក្នុងតម្លៃចាប់ពី ១,៥ ទៅ ១,៦ដុល្លារក្នុងមួយគីឡូក្រាម រួចប្ដីប្រពន្ធលក់ឲ្យពាណិជ្ជករបន្តទៀតក្នុងតម្លៃ ២,២ដុល្លារក្នុងមួយគីឡូក្រាម។

នៅចុងខែធ្នូ ឆ្នាំ ២០១៦ ប៉ូលិសវៀតណាមបានលួចឆ្មក់ចាប់កន្លែងលក់ដូរ និងរកឃើញឆ្កែចំនួន ៤៧ក្បាល ក្នុងនោះមាន ៣២ក្បាលបានងាប់ បើគិតថាទឹកប្រាក់នៃឆ្កែទាំងអស់តម្លៃប្រមាណ ១១០០ដុល្លារ។

អ្នកទាំង ៦នាក់បានសារភាពកំហុសដោយ ២នាក់ត្រូវជាប់ពន្ធនាគារ ៧ឆ្នាំ, ២នាក់ទៀត ៥ឆ្នាំ និង ២នាក់ផ្សេងទៀត ៣ឆ្នាំ។ បើតាមរបាយការណ៍ ឆ្កែប្រមាណ ៥លានក្បាល ត្រូវបានសម្លាប់ជារៀងរាល់ឆ្នាំនៅវៀតណាម ដោយជាប់ចំណាត់ថ្នាក់ទីពីរ បន្ទាប់ពីចិនដែលមាន ២០លានក្បាល៕