មើលកុំព្យូទ័រគ្រប់ម៉ូដែល ASUS ទើបប្រកាស មានទាំងថ្លៃ ទាំងថោក

2017-05-29 11:35:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ASUS ទើបបានបញ្ចប់សន្និសីទ Computex Taipei ឆ្នាំ ២០១៧ កាលពីមុននេះបន្តិច ដោយបានបង្ហាញចេញកុំព្យូទ័រយួរដៃជាច្រើនម៉ូដែលមានទាំងតម្លៃថ្លៃផុតលេខ និង ធូរថ្លៃមធ្យម ដែលសុទ្ធតែមានសមត្ថភាពខ្លាំង។ ខាងក្រោមជាការបង្ហាញត្រួសៗពីកុំព្យូទ័រទាំងអស់៖

Zenbook Flip S

Flip S ជាកុំព្យូទ័រយួរដៃអាចបង្វិលអេក្រង់បានដែលមានកម្រាស់ស្ដើងជាងគេបំផុតក្នុងលោកដោយមានកម្រាស់ត្រឹម ១០,៩ ម.ម ស្ដើងជាង MacBook ២០% ហើយមានទម្ងន់ត្រឹម ១,១ គីឡូក្រាមប៉ុណ្ណោះ។ ASUS អះអាងថាថ្មអាចប្រើបាន ១១,៥ ម៉ោង តាមរយៈការបំពាក់ CPU Core i7 (ក្រុមហ៊ុនមិនបញ្ជាក់ច្បាស់ពី Spec របស់ CPU ឡើយ)។ Flip S មានអេក្រង់ ១៣,៣ អ៊ីញ កម្រិត 4K ដែលអាចបង្វិលបាន ៣៦០ ដឺក្រេ និង មានរន្ធតភ្ជាប់ប្រភេទ USB Type-C ចំនួនមួយ។ ចំណែកតម្លៃវិញមានចាប់ពី ១ ០៩៩ ដុល្លារ។

Zenbook Pro

ជាម៉ូដែលមានសមត្ថភាពខ្លាំងជាងគេដោយប្រើសុទ្ធតែ GPU Nvidia GTX 1050Ti, អេក្រង់ ១៥,៦ អ៊ីញ កម្រិត 4K, មានបំពាក់ CPU Core i7 ប្រភេទ H-Series និង មានកម្រាស់ ១៨,៩ ម.ម។ Asus អះអាងថាថ្មអាចប្រើបាន ១៤ ម៉ោង ហើយតម្លៃ Zenbook Pro នេះមានចាប់ពី ១ ២៩៩ ដុល្លារ ឡើងទៅ។

Zenbook 3 Deluxe

ASUS ហៅ Zenbook 3 Deluxe នេះថាជាកុំព្យូទ័រអេក្រង់ ១៤ អ៊ីញ ដែលមានកម្រាស់ស្ដើងជាងគេក្នុងលោកត្រឹម ១២,៩ ម.ម ប៉ុណ្ណោះ។ មានរន្ធតភ្ជាប់ប្រភេទ Thunderbolt 3 ចំនួនពីរ, CPU Core i7, អេក្រង់កម្រិត 1080p និង មានតម្លៃចាប់ពី ១ ១៩៩ ដុល្លារ។

VivoBook S

ជាកុំព្យូទ័រដែលមានតម្លៃចាប់ពី ៤៩៩ ដុល្លារ ប៉ុន្តែមានបំពាក់ដោយ CPU Core i7, GPU Nvidia GTX 940MX, មានកម្រាស់ ១៧,៩ ម.ម និង មានអេក្រង់ ១៥,៩ អ៊ីញ។ តម្លៃមិនថ្លៃទេ ប៉ុន្តែលក្ខណៈសម្បត្តិខ្លាំងមិនគួរជឿ។