៥ ចំណុចគួរឱ្យសោកស្ដាយ ដែលទូរសព្ទបច្ចុប្បន្នមិនមានដូចអតីតកាល

2017-06-01 04:23:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តើអ្នកបានប្រឡូកប្រើប្រាស់នូវទូរស័ព្ទដៃអស់រយៈពេលប៉ុន្មានឆ្នាំហើយ? កាលពីជាង ១០ ឆ្នាំមុនយើងធ្លាប់ទទួលបានទស្សនីយភាពប្លែកៗមួយចំនួន នៅលើពពួកទូរស័ព្ទ ហើយក្រោយមកក៏មានការវិវត្តបន្តិចម្តងៗ ទាំងដែលការបន្ថែមលក្ខណៈសម្បត្តិខ្លះល្អ ហើយការដកចោលខ្លះទៀត វាជារឿងអាក្រក់ ដែលគួរឱ្យសោកស្ដាយជាទីបំផុត។

១.ការបិទសម្បកមិនឱ្យដោះថ្មបាន

ទូរស័ព្ទដែលដាក់ឱ្យប្រើប្រាស់ដំបូងៗក្នុងលោក សុទ្ធសឹងតែអាចដោះថ្មចេញដោយផ្ទាល់ដៃទាំងអស់ ព្រោះវាមានភាពងាយស្រួលសម្រាប់អ្នកប្រើប្រាស់ ករណីបើចង់ផ្លាស់ប្ដូរថ្ម ដោយមិនចង់សាក គឺវាលឿនបំផុត។ ក្រោយមកអំឡុងពេល Apple ប្រកាសបង្ហាញ iPhone ដែលពុំអាចដោះថ្មបាន មានក្រុមហ៊ុនជាច្រើន ក៏ចាប់ផ្ដើមអនុវត្តវិធីសាស្ត្រនោះតរៀងមក។ ទាំងម៉ូដែល Android មួយចំនួនសព្វថ្ងៃ សុទ្ធតែដោះថ្មមិនបានទាំងអស់ ករណីបើចង់ដោះទល់តែមូលខ្ចៅចេញពីតួម៉ាស៊ីនតែម្ដង។

២.ក្ដារចុចប្រភេទ QWERTY

យើងទទួលស្គាល់ថាក្រុមហ៊ុន BlackBerry នៅបន្តបំពាក់ក្តារចុច QWERTY លើស្មាតហ្វូនខ្លួន ប៉ុន្តែវាពិបាកត្រង់ថា បើរកស្មាតហ្វូនដែលមានកម្លាំងម៉ាស៊ីនធន់ធ្ងន់ ហើយបំពាក់នូវក្តារចុចមកជាមួយគឺពុំមានឡើយ។ មូលហេតុនេះហើយ ធ្វើឱ្យមនុស្សមួយចំនួនក៏មានការមិនពេញចិត្តដែរ ព្រោះអ្នកខ្លះមិនទម្លាប់ក្នុងការវាយលើអេក្រង់ Touch Screen ហើយត្រូវបង្ខំដើរតាមបច្ចេកវិទ្យាទាំងដែលខ្លួនមិនចង់។

៣.មិនមានប្រព័ន្ធវិទ្យុ FM

រលកបញ្ជូនសញ្ញានៃវិទ្យុ FM មិនបានបំពាក់ទៀតឡើយនៅលើស្មាតហ្វូនបច្ចុប្បន្ន ហើយបើកាលណាចង់ស្ដាប់គឺតម្រូវទល់តែទាមទារប្រព័ន្ធអ៊ីនធឺណិត។ ការគិតរបស់មនុស្សអាចថាខុសគ្នា ព្រោះមនុស្សមួយចំនួនតូច គាត់ចង់រក្សាការប្រើប្រាស់នៅលើស៊េរី Nokia ចាស់ដូចជា X7 ជំនាន់មុនដដែល ព្រោះវាយស្រួលក្នុងការស្ដាប់វិទ្យុ។

៤.លេងហ្គេមដែលមិនចំណាយលុយ

ទន្ទឹមនឹងវិស័យកម្សាន្តហ្គេមបច្ចេកវិទ្យាឆ្ពោះទៅមុខ ក្រុមហ៊ុនមួយចំនួនក៏បង្កើតគំនិតថ្មី តម្រូវឱ្យអ្នកលេងបង់លុយទិញរបស់របរពីហ្គេមខ្លួន ដើម្បីការលេងមានលក្ខណៈលេចធ្លោ។ ងាកទៅមើលកាលពីជាង ១០ ឆ្នាំមុន គឺវាគ្មាននោះទេ ប៉ុន្តែយើងទទួលស្គាល់ថាហ្គេមសម័យមុន វាមិនសប្បាយដូចបច្ចុប្បន្ន គ្រាន់ការវិវត្តបែបនេះ ជាផលមិនល្អមួយ ដែលបញ្ចុះបញ្ចូលឱ្យអ្នកលេងត្រូវខាតបង់ថវិកាផ្ទាល់ខ្លួន។

៥.គ្មានអង់តែនមើលទូរទស្សន៍

ជឿថាប្រិយមិត្តកំពុងអាន អាចមានច្រើនធ្លាប់ប្រើនៅទូរសព្ទដែលមានទាញអង់តែនអាចមើលទូរទស្សន៍បាន នោះហើយជាចំណុចក្ដៅគគុក ដែលបច្ចុប្បន្នស្មាតហ្វូនទាំងអស់បានដកចោល។ មិនខុសពីចំណុចទី ៣ ការមើលទូរទស្សន៍ក្ដី ការស្ដាប់វិទ្យុក្ដី សុទ្ធសឹងតែតម្រូវនៅប្រព័ន្ធអ៊ីនធឺណិត ហើយវាក៏បន្ថែមលើការចំណាយមួយដំណាក់កាលទៀតផងដែរ។

សរុបមកចំណុចទាំង ៥ ខាងលើ យើងចង់ប្រៀបធៀបទៅនឹងស្មាតហ្វូនបច្ចុប្បន្ន សូមមិននិយាយប្រភេទទូរស័ព្ទធម្មតាដែលមានតម្លៃខ្ទង់ ២០ ទៅ ៣០ ដុល្លារ ព្រោះទូរស័ព្ទទាំងនោះមួយចំនួនតូច ក៏នៅបន្តរក្សាមុខងារកាលពីអតីតដែរ ប៉ុន្តែវាមិនមែនជាទីផ្សារទូទៅ ខុសពីស្មាតហ្វូនដែលមនុស្សសព្វថ្ងៃកាន់សឹងតែគ្រប់គ្នា។

ប្រភព៖ PhoneArena ប្រែសម្រួល៖ កៅ រក្សា