បងប្អូនស្រីភ្លោះស្រស់ស្អាត ល្បីមួយរំពេច ក្រោយប្រើពេលដ៏ខ្លី បញ្ចប់ការសិក្សានៅ Harvard

2017-06-01 07:12:41
ចំនួនមតិ 0 | ចំនួនចែករំលែក 0

ចន្លោះមិនឃើញ

បងប្អូនស្រីភ្លោះមានសម្រស់ស្រស់ស្អាតមួយគូ មកពីប្រទេសចិន ទទួលបានឈ្មោះល្បីល្បាញភ្លាមៗមួយរំពេច នៅលើបណ្ដាញសង្គមចិន បន្ទាប់ពីអាចបញ្ចប់ការសិក្សារបស់ពួកគេ នៅឯសកលវិទ្យាល័យ Harvard University ត្រឹមតែរយៈពេលដ៏ខ្លីមួយ។

បងប្អូនស្រីភ្លោះ ឈ្មោះ Sun Yumeng និង Sun Yutong នេះ បានទាក់ទាញចំណាប់អារម្មណ៍ អ្នកប្រើប្រាស់បណ្ដាញសង្គមចិនយ៉ាងខ្លាំង មិនមែនដោយសារតែសម្រស់ឡើយ ប៉ុន្តែគឺចំណេះដឹងដ៏អស្ចារ្យរបស់ពួកនាង។

ពួកនាងទាំង ២ នាក់ បានរស់នៅ និងធំធាត់ជាមួយគ្នា នៅក្នុងខេត្ត Jiangsu ទីក្រុង Nanjing ប្រទេសចិន។ ពួកនាងបានចំណាយពេលសិក្សា នៅឯវិទ្យាល័យ Nanjing Foreign Language School។ រហូតដល់ឆ្នាំ២០១២ ពួកនាងបានចូលសិក្សានៅឯសកលវិទ្យាល័យ Fudan University ក្នុងទីក្រុងសៀងហៃ។

គួរបញ្ជាក់ថា ពួកនាងធ្លាប់បានលេចធ្លោម្ដងរួចមកហើយ កាលពីឆ្នាំមុន បន្ទាប់ពីទទួលបានសិទ្ធិចូលរៀន នៅឯសាលា Harvard Graduate School of Education ស្ថិតក្នុងទីក្រុង Cambridge រដ្ឋ Massachusetts សហរដ្ឋអាមេរិក។

លើសពីនេះទៅទៀត បងប្អូនស្រីភ្លោះ អាយុ ២៣ ឆ្នាំនេះ អាចបញ្ចប់ការសិក្សាផ្នែក «អប់រំ» នៅសាលាដ៏ល្បីឈ្មោះខាងលើ រយៈពេលត្រឹមតែ ១ ឆ្នាំប៉ុណ្ណោះ បន្ទាប់ពីពួកនាងបានបញ្ចប់ការសិក្សា នៅឯសកលវិទ្យាល័យ Fudan University។

យ៉ាងណាមិញ ពួកនាងមិនទាន់បានបង្ហើបពីគម្រោងណាមួយឡើយ បន្ទាប់ពីបញ្ចប់ការសិក្សា នៅសាលា Harvard៕