T.O.P កំពុងមានព័ត៌មានក្ដៅគគុក រឿងពាក់ព័ន្ធនឹងគ្រឿងញៀន

2017-06-01 08:39:29
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿងរ៉ាវមួយចំនួនផ្ទុះឡើង ពាក់ព័ន្ធនឹងតារាចម្រៀង T.O.P សមាជិកក្រុម BIG BANG ជុំវិញព័ត៌មានថាលោកបានសេពគ្រឿងញៀន កំពុងល្បីពេញអ៊ីនធឺណិត។

សារព័ត៌មានល្បីៗជាច្រើន របស់កូរ៉េខាងត្បូងបានចុះផ្សាយព័ត៌មានថ្មីៗជាបន្តបន្ទាប់អំពី តារាប្រុសរូបនេះ ក្នុងនោះ វិបសាយ Allkpop បានលើកឡើងថា T.O.P រងការចោទប្រកាន់ ដោយសារសេពគ្រឿងញៀន (ជក់កញ្ឆា)។ ថ្ងៃនេះ នាយកដ្ឋានស៊ើបអង្កេតគ្រឿងញៀនក្រុងសេអ៊ូល (Seoul Drug Criminal Investigation Department) បានធ្វើការស៊ើប និងពិនិត្យរកសារធាតុញៀន តាមរយៈការធ្វើតេស្ត សរសៃសក់របស់តារាចម្រៀងរូបនេះ ហើយលទ្ធផលគឺវិជ្ជមាន។

ការស្រាវជ្រាវដដែលបានបង្ហាញទៀតថា T.O.P បានជក់កញ្ឆា កាលពីខែតុលា ពោលគឺ ប៉ុន្មានខែមុន លោកចូលបម្រើទាហាន ក្នុងខែកុម្ភៈម្ល៉េះ។ ករណីនេះដដែល មេក្រុម BIG BANG G-Dragon ក៏ធ្លាប់ជាប់ចោទដោយសារប្រើប្រាស់គ្រឿងញៀនប្រភេទនេះដែរ កាលពីខែឧសភា ឆ្នាំ ២០១១។

ក្រោយមកមិនយូរ វិបសាយដដែលក៏បានចុះផ្សាយថា ផលិតកម្ម YG បានសុំទោសជាផ្លូវការ ចំពោះបញ្ហានេះ។ ផលិតកម្មនេះបាននិយាយថា ៖ "បន្ទាប់ពីមានការបញ្ជាក់ ពួកយើងក៏បានទទួលស្គាល់ថា T.O.P ពិតជាបានជក់កញ្ឆាមុនពេលលោកចូលបម្រើកងទ័ពមែន ហើយលោកពិតជាមានការសោកស្ដាយចំពោះទង្វើរបស់ខ្លួនណាស់។ ពួកយើងសូមអភ័យទោស ដែលធ្វើឲ្យអ្នកគាំទ្រមានការបារម្ភ" ។

រីឯវិបសាយ Koreaboo វិញក៏បានបន្ថែមថា T.O.P បានជក់ជាមួយ នារីម្នាក់ក្នុងផ្ទះរបស់លោក នៅទីក្រុង សេអ៊ូល។ បើតាមសម្ដីរបស់ប៉ូលីស នារីម្នាក់នោះមានអាយុប្រហែលជាង ២០ឆ្នាំ ហើយ គឺជាអ្នកហ្វឹកហាត់ចំណូលថ្មី ប៉ុន្តែមិនច្បាស់ថា ជាសមាជិករបស់ ផលិតកម្ម YG ឫយ៉ាងណាទេ។ បច្ចុប្បន្ននារីម្នាក់នេះ កំពុងត្រូវបានប៉ូលិសស៊ើបសួរ និងស្រាវជ្រាវជាបន្ត៕