មហាសំណង់ស្ពានអាកាស ២០ខ្សែ ៨ទិស របស់ចិន អ្នកដំណើរល្មមៗវិលមុខ

2017-06-03 09:02:41
ចំនួនមតិ 0 | ចំនួនចែករំលែក 0

ចន្លោះមិនឃើញ

រូបថតស្ពានអាកាសដ៏ស្មុគស្មាញបំផុតមួយក្នុងលោករបស់ចិន កំពុងធ្វើឲ្យមនុស្សជាច្រើនភ្ញាក់ផ្អើលខ្លាំងនៅប៉ុន្មានថ្ងៃនេះ ព្រោះតែមានច្រើនខ្សែ ច្រើនជាន់ និងច្រើនទិស។

ស្ពានអាកាស Huangjuewan ស្ថិតនៅខេត្តឆុងឈីង ភាគនិរតីប្រទេសចិន មានចំនួន ២០ខ្សែ ៥ជាន់ និងឆ្ពោះទៅកាន់ទិញទាំង ៨។ ផ្លូវខ្វាត់ខ្វែងបែបនេះហើយ ទើបអ្នកប្រើប្រាស់អ៊ីនធឺណិត ពេលឃើញរូបរាងរបស់ស្ពានហើយ បានបង្ហាញការព្រួយបារម្ភពីការជិះវង្វេងផ្លូវ ឬខុសទិសដៅខ្លួនចង់ទៅ។

សំណង់ស្ពានអាកាសខាងលើ បានចាប់ផ្ដើមការដ្ឋានតាំងពីឆ្នាំ ២០០៩ និងបញ្ចប់វិញនៅថ្ងៃទី ៣១ ឧសភា ឆ្នាំ ២០១៧។ មន្ត្រីទទួលបន្ទុកផ្នែកគម្រោងបានបញ្ជាក់ប្រាប់អ្នកយកព័ត៌មានថា អ្នកបើកបរតាមផ្លូវនេះ មិនមានភាពលំបាកទេ ព្រោះតាមស្ពាននីមួយៗមានដាក់សញ្ញាប្រាប់ទិសរួចជាស្រេច។

យោងតាមប្រភពដដែលបន្ថែមថា "ប្រសិនបើអ្នកបើកបរខុសទិសដៅ អ្នកមានជម្រើសតែមួយ គឺបើកក្រឡឹងជុំវិញស្ពាន (ហាមបត់ក្រោយ) ប្រមាណ ៥០០ម៉ែត្រ ឬ ១គីឡូម៉ែត្រ អ្នកនឹងឃើញផ្លាកសញ្ញាប្រាប់ថា អ្នកជិះខុសផ្លូវ និងបង្ហាញផ្លូវត្រូវឲ្យអ្នកឃើញវិញ"។ គួរបញ្ជាក់ថា ស្ពាន Huangjuewan មិនទាន់បើកសម្ពោធជាផ្លូវការទេ រង់ចាំរហូតដល់ចុងឆ្នាំ ២០១៨ ៕