រូបភាព​មួយ​សន្លឹក​ដែល​គេ​យល់​ថា​ជា​ Teaser បង្ហាញ​រាង OnePlus 5 បាន​លេច​ឡើង​លើ​បណ្ដាញ​ទំនាក់​ទំនង Weibo ដែល​រូប​នេះ​បង្ហោះ​ដោយ​គណនី​ឈ្មោះ​ slashleaks។

តាម​រូប​ Teaser អាច​ឲ្យ​ឃើញ​ច្បាស់​ពី​រូបរាង​ខាង​ក្រោយ​របស់ OnePlus 5 ដែល​មាន​ប្រើ​ប្រព័ន្ធ​កាមេរ៉ា​ភ្លោះ​​ផ្ដេក។ ប្រព័ន្ធ​កាមេរ៉ា​ភ្លោះ​នេះ​ដែរ​គឺ​ស្ថិត​នៅ​កៀន​ខាង​ឆ្វេង​ នៅ​ពី​ក្រោម​ខ្សែ​អង់តែន​​ផ្នែក​ខាង​លើ។ នៅ​ខាង​ក្រោម​ផ្នែក​ខាង​ស្ដាំ​ក៏​ឃើញ​មាន​ខ្សែ​អង់តែន​មួយ​កង់​នេះ​ដែរ។

កាល​ពី​ម្សិលមិញ​ក៏​មាន​ការ​បង្ហាញ​ពី​រូបភាព​គំរូ​ថត​ដោយ​ប្រើ​កាមេរ៉ា​ភ្លោះ​របស់ OnePlus 5 ដែល​រូប​មួយ​សន្លឹក​គឺ​មាន​ពណ៌​ស-ខ្មៅ ដោយ​ជា​តម្រុយ​បង្ហាញ​ថា​កាមេរ៉ា​ក្នុង​ចំណោម​កាមេរ៉ា​ពីរ​គ្រាប់​គឺ​ជា​ប្រភេទ​កាមេរ៉ា​ថត​រូប​ ស-ខ្មៅ ដូច​ជា​នៅ​លើ Huawei P9​ និង P10 ដែរ។

ចចាមអារ៉ាម​ពី​ OnePlus 5 ថា​ស្មាតហ្វូន​នេះ​មាន​បំពាក់​អេក្រង់​ ៥,៥ អ៊ីញ​ និង ដំណើរ​ការ​ដោយ​បន្ទះ​ឈីប​ Snapdragon 835។ បើ​តាម​ការ​លើក​ឡើង​របស់​​នាយក​ប្រតិបត្តិ​ និង ស្ថាបនិក​ OnePlus លោក​ Pete Lau និយាយ​ថា​ OnePlus 5 នឹង​ជា​ត្រកូល Flagship​ OnePlus ដែល​មាន​កម្រាស់​ស្ដើង​ជាង​គេ៕​

ប្រភព៖ PhoneArena   ប្រែ​សម្រួល៖ សុខហេង