តាមជំនឿយល់សប្ដិ ៥ យ៉ាងនេះបញ្ជាក់ថា កំពុងមានគេនិយាយដើមហុយដី
- 2017-06-05 07:41:13
- ចំនួនមតិ 0 | ចំនួនចែករំលែក 0
តាមជំនឿយល់សប្ដិ ៥ យ៉ាងនេះបញ្ជាក់ថា កំពុងមានគេនិយាយដើមហុយដី
ចន្លោះមិនឃើញ
ប្រជាជនខ្មែរតាំងពីដើមមក តែងមានជំនឿលើការយល់សប្ដិ ហើយកាត់ឃើញល្អ ឬមិនល្អទៀតផង។ តាមការចំណាំការយល់សប្ដិ អាចបញ្ជាក់ពីរឿងហេតុដែលត្រៀមនឹងកើតឡើងនាពេលខាងមុខ អាចមានលាភ ឬអាចមានគ្រោះអាក្រក់។ ជាក់ស្ដែងយល់សប្ដិ ៥យ៉ាងខាងក្រោមនេះ ត្រូវបានចាស់ៗក្នុងសង្គមខ្មែរ ជឿថាកំពុងមានអ្នកយកដើមទៅនិយាយហើយ។ នេះបើតាមការប្រាប់របស់លោកយាយ វ៉ែន រ៉េត ជាឆ្មបបុរាណ និងគ្រូខ្មែររស់នៅក្នុងខេត្តកំពង់ស្ពឺ។
១. យល់សប្ដិឃើញស្លៀកខោអាវរហែក
លោកយាយ វ៉ែន រ៉េត ប្រាប់ថា បើតាមការចំណាំ និងការកាត់យល់សប្ដិរបស់ចាស់ៗ ក្នុងសង្គមខ្មែរ តាំងពីដើមមកមានជំនឿថា បើយល់សប្ដិឃើញស្លៀកខោអាវរហែក មានន័យថា រឿងរ៉ាវដែលខំលាក់បាំង មានអ្នកដឹង ហើយយករឿងនោះទៅនិយាយ ប្រាប់មនុស្សផ្សេងទៀត។ ប៉ុន្តែបើក្នុងយល់សប្ដិនោះ ឃើញថា បានយកម្ជុលអំបោះ មកដេរវិញ នោះរឿងរ៉ាវដែលកំពុងបែកធ្លាយ អាចបញ្ចប់ទៅវិញ។
២. យល់សប្ដិឃើញស្រាតននលគោក
តាមជំនឿរបស់ដូនតាខ្មែរ និងការកត់សម្គាល់យ៉ាងច្បាស់លាស់របស់ចាស់ៗ តែងប្រាប់តៗគ្នាថា បើយល់សប្ដិ ឃើញស្រាតននលគោក មិនមានសំលៀកបំពាក់ជាប់ខ្លួនសោះ នោះមានន័យថា មានអ្នកកំពុងហែកហួររឿងអាស្រូវ និងយកអាថ៌កំបាំងទៅនិយាយគ្មានសល់។ តាមជំនឿពីបុរាណយល់សប្ដិបែបនេះមិនល្អឡើយ ហើយអាចនាំរឿងក្ដៅក្រហាយដល់ខ្លួនឯងទៀតផង។
៣. យល់សប្ដិឃើញភ្លើង
លោកយាយ វ៉ែន រ៉េត ប្រាប់បន្តទៀតថា យល់សប្ដិឃើញភ្លើង គឺមានន័យថា មានកំពុងនិយាយដើមអុចអាល ចាក់រុក ជាមួយអ្នកនេះអ្នកនោះ ហើយអាចនាំឱ្យមានជម្លោះក្នុងគ្រួសារទៀតផង។ លោកយាយ ប្រាប់ថា អ្នកដែលយកដើមទៅនិយាយនោះ គឺមានបំណងនាំរឿងក្ដៅក្រហាយ យកភ្លើងមកបញ្ឆេះ នាំបញ្ហាដល់គ្រួសារ។
៤. យល់សប្ដិឃើញលាមក
យល់សប្ដិឃើញលាមក ក៏មិនល្អដែរ។ តាមការចំណាំ ការយល់សប្ដិ បែបនេះ គឺមានន័យថា មានមនុស្សកំពុងតែច្រណែន ហើយនិយាយនិន្ទាបង្អាប់បន្តុះប្រៀបធៀបអ្នក ជាមួយនឹងលាមក ដើម្បីឱ្យអ្នកឈឺចាប់។ លោកយាយ វ៉ែន រ៉េត លើកឡើង។
៥. យល់សប្ដិឃើញដុសក្អែល
យល់សប្ដិឃើញគេដុសក្អែល គឺមានអ្នកកំពុងនិយាយដើមដូចព្យុះ ឬមួយក៏ត្រូវបានអ្នកដទៃបកអាក្រាត អំពើអាក្រក់ដែលខ្លួនធ្លាប់ប្រព្រឹត្តិគ្មានសល់នោះឡើយ។
ចុងក្រោយ លោកយាយ វ៉ែន រ៉េត តាមជំនឿតាំងពីបុរាណមក បើសិនជាយល់សប្ដិឃើញ ៥យ៉ាងដូចខាងលើ ពេលភ្ញាក់ដំណេកត្រូវយកអង្ករមកប្រាយ (បាច) ហើយអុចធូបនិយាយបណ្ដេញឧបទ្រពចង្រៃនោះ ឱ្យវិនាសខ្ចាត់ខ្ចាយ តែបើនៅមិនស្ងប់ក្នុងចិត្តគួរទៅស្រោចទឹក ដើម្បីលើករាសី៕
ចុចអានអត្ថបទជុំវិញជំនឿ៖
@អ្នកតា ៤កន្លែងស័ក្ដិសិទ្ធិបំផុតនៅកម្ពុជា ចង់ឡើងតំណែង ចង់បានប្ដី បានដូចចិត្ត
@មុនផ្សំដំណេកត្រូវធ្វើ ៥ពិធីនេះសិន មិនមែនចេះតែផ្សំទេ ទើបប្ដីប្រពន្ធរស់នៅបានសុខ
@បម្រាមដូនតាខ្មែរ! ផ្សំដំណេក សង់ផ្ទះ កប់ខ្មោច ដាច់ខាតកុំធ្វើក្នុងថ្ងៃទាំងនេះ