ក្រសួងវប្បធម៌ ត្រៀមចាត់វិធានការណ៍លើបទប្រភេទ "បែកស្លុយ"?

ពុធ, 7 មិថុនា 2017 07:52
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីប្រភេទបទបែកស្លុយ បង្ហាញខ្លួនក្នុងសិល្បៈតន្ត្រីខ្មែរក្នុងរង្វង់២ឆ្នាំចុងក្រោយនេះ ធ្វើឲ្យមានការរីះគន់ខ្លះ ទទួលយកខ្លះ ថ្មីៗនេះមានប្រភពមួយបានបង្ហើបថា ក្រសួងគ្រោងនឹងចាត់វិធានការធ្ងន់លើបទប្រភេទនោះ។

រូបតំណាង

ប្រភពពីផលិតកម្មក្នុងស្រុកមួយ បានបង្ហើបពីបញ្ហានេះ ដោយលោកថា ក្រសួងគ្រោងនឹងមានវិធានការណ៍លើប្រភេទបទចម្រៀង ដែលមានកាយវិការរាំងច្រង៉េងច្រង៉ាងនេះហើយ ដោយសារតែបទប្រភេទនេះ បានធ្វើឲ្យធ្លាក់ចុះបទចម្រៀងប្រជាប្រិយ និងសិល្បៈវប្បធម៌យើងច្រើន។

លោកថា "បងឯងចាំមើល តិចទៀតក្រសួងនឹងមានវិធានការណ៍លើបទបែកស្លុយហើយ ហើយវាត្រូវនឹងផលិតកម្មខ្ញុំដែលមិនមានផែនការធ្វើបទប្រភេទនេះ"។

ប្រភពដែលសុំលាក់អត្តសញ្ញាណ ប្រាប់បន្តថា ផលិតកម្មរបស់លោកមានគោលការណ៍និពន្ធតែបទនិពន្ធថ្មី (Original Song) ដោយមិនមានទំនោរទៅរកការនិពន្ធបទបែកស្លុយនោះទេ។ ដូច្នេះហើយ នេះគឺជារឿងល្អមួយប្រសិនបើក្រសួងចេញវិធានការបែបនោះមែន និងអំណោយផលដល់ស្ថាប័នរបស់លោក។ ជាក់ស្ដែង ផលិតកម្មរបស់លោក បានត្រៀមអាល់ប៊ុមចម្រៀងជាច្រើនដែលសុទ្ធសឹងតែជាបទស្នាដៃនិពន្ធថ្មីសុទ្ធសាធ គ្មានលាយឡំនឹងបទបែកស្លុយនោះទេ។

ប្រភពដដែល បានសង្កត់ធ្ងន់ថា នេះក៏ជាសញ្ញាណវិជ្ជមានមួយ ជំរុញអ្នកនិពន្ធឲ្យមានទំនោរទៅរកបទមិនបែកស្លុយផងដែរ ដែលចុងក្រោយនឹងជះឥទ្ធិពលវិជ្ជមានដល់សិល្បៈតន្ត្រីក្នុងស្រុក។

ចំណែកយុវវ័យមួយក្រុមសុំមិនបង្ហាញអត្តសញ្ញាណបាននិយាយមកកាន់ Sabay ថាពួកគេមិនមែនមិនគាំទ្រ មិនឲ្យមានទាំងស្រុងនោះទេ ប៉ុន្តែសូមឲ្យមានព្រំដែនកំណត់មួយ មិនមែនចេះតែធ្វើតាមតែចិត្តចង់នោះទេ ចង់ឲ្យអ្នកនិពន្ធក៏ដូចជាផលិតកម្មទាំងអស់ពិចារណាចំណុចនេះឡើងវិញ។

"ជាពិសេសគឺចូលឆ្នាំតែម្ដង បទប្រពៃណីជាតិមានតិចតួចបំផុតព្រោះផលិតកម្មធំៗគាត់សម្រុកធ្វើតែបទបែកស្លុយ យើងជាយុវវ័យអត់សប្បាយចិត្ត ហើយក៏មិនពេញចិត្តនឹងសមិទ្ធផលនេះដែរ" ពួកគេបន្ត។

ពួកគេបន្ថែមថា ប្រសិនបើក្រសួងមានវិធានការដូចដែលបានលើកឡើងមែនពួកគេនឹងសប្បាយចិត្តព្រោះបទចម្រៀងប្រភេទបែកស្លុយមិនបានបង្ហាញពីអ្វីដែលជារបស់ខ្លួននោះទេ ប៉ុន្តែវាបានបង្ហាញយ៉ាងមុតមាំថាផលិតករ អ្នកនិពន្ធ និងផលិតកម្មទាំងអស់មានទំនោរទៅរកតន្ត្រីរបស់ប្រទេសជិតខាង ទោះបីពួកគេបញ្ជាក់ថាបទចម្រៀងទាំងនោះជាបទស្នាដៃនិពន្ធថ្មីក៏ដោយ។

ទាក់ទងនឹងបញ្ហានេះឯកឧត្ដម ថៃ នរៈសត្យា រដ្ឋលេខាធិការក្រសួងវប្បធម៌ និង វិចិត្រសិល្បៈ បានតបជាមួយ Sabay ដោយខ្លីថាមិនទាន់មានវិធានការអ្វីទាក់ទងនឹងបទបែកស្លុយនោះទេ។ "ដូចជាអត់ទាន់មានវិធានការទៅលើបទបែបហ្នឹងទេ" ឯកឧត្ដម បញ្ជាក់៕

អត្ថបទ៖ Samedy