អ្នកដំណើរស្លន់ស្លោ ក្រោយយន្តហោះចិន ផ្ទុះ និងធ្លុះម៉ាស៊ីន ត្រូវត្រលប់ក្រោយបន្ទាន់

2017-06-12 01:41:16
ចំនួនមតិ 0 | ចំនួនចែករំលែក 0

ចន្លោះមិនឃើញ

យន្តហោះរបស់ក្រុមហ៊ុនអាកាសចរណ៍ចិន China Eastern Airlines ធ្វើដំណើរពីទីក្រុង Sydney ទៅកាន់ទីក្រុងសៀងហៃ ត្រូវបង្ខំចិត្តបកត្រលប់ក្រោយវិញ បន្ទាប់ពីសមាជិកនាវិកលើយន្តហោះ រកឃើញប្រហោងយ៉ាងធំមួយ នៅត្រង់ម៉ាស៊ីនយន្តហោះ ក្រោយពេលចេញដំណើរបានបន្តិច។

រូបថតជាច្រើនសន្លឹក បានបង្ហាញឲ្យឃើញ យន្តហោះប្រភេទ Airbus A330 ដែលចេញដំណើរនៅវេលាម៉ោង ៨ និង ៣០ នាទីយប់ ថ្ងៃអាទិត្យ ម្សិលមិញនេះ មានប្រហោងដ៏ធំមួយនៅត្រង់ម៉ាស៊ីន។ យន្តហោះដែលស្ថិតនៅលើជើងហោះហើរ Flight MU736 បានធ្វើដំណើរទៅដល់ជាយក្រុង Bulli ដែលមានចម្ងាយប្រហែល ៧០ គីឡូម៉ែត្រពីទីក្រុង Sydney មុនពេលដែលវាធ្វើការហៅចេញបន្ទាន់ ទៅកាន់ព្រលានយន្តហោះ Sydney Airport ដើម្បីចុះចតបន្ទាន់។

អ្នកដំណើរនៅលើយន្តហោះ បានប្រាប់ឲ្យដឹងថា ពួកគេបានឮសំឡេងផ្ទុះ ក្រោយពេលយន្តហោះចេញដំណើរ។ មិនតែប៉ុណ្ណោះ ការផ្ទុះនោះបានបង្កជាសំឡេងយ៉ាងខ្លាំង រហូតឮដល់ប្រជាជននៅភាគខាងលិច ទីក្រុង Sydney ទៀតផង។ ទោះបីជាយ៉ាងណា គេមិនទាន់ដឹងពីមូលហេតុពិតប្រាកដ ដែលបណ្ដាលឲ្យកើតមានការផ្ទុះនេះទេ ខណៈគ្មានអ្នកដំណើរណាម្នាក់រងរបួសឡើយ។

គួរបញ្ជាក់ថា យន្តហោះប្រភេទ Airbus A330 អាចផ្ទុកអ្នកដំណើរប្រមាណជា ២៩៧ នាក់៕