អាំង សំអាត ពេលប៉ះបរទេសម្ដងៗវ៉ៃដាច់ដៃចោល

2017-06-13 04:26:30
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ដែលធ្លាប់ប្រកួតជាង ១០ឆ្នាំមកហើយ អាំង សំអាត ថាពេលប៉ះខ្មែរគ្នាឯងប្រកួតមិនសូវប៉ុន្មានទេ តែបើប្រកួតជាមួយបរទេសវិញវ៉ៃដាច់ដៃ និងទាត់ដៃជើងចោលព្រោះចង់ឈ្នះ។

កីឡាករ អាំង សំអាត ក្រហម

កីឡាករ អាំង សំអាត បាននិយាយឲ្យដឹងថា ពេលលឺគ្រូរបស់ខ្លួនប្រាប់ថានឹងត្រូវឡើងប្រកួតជាកីឡាករបរទេស គេសប្បាយចិត្តខ្លាំង ហើយទោះជាមានការងាររវល់យ៉ាងណាក៏ដោយ ក៏ផ្អាកសិនឆ្លៀតមកហ្វឹកហាត់ដើម្បីប្រកួតនោះដែរ។ បើនិយាយទៅវាខុសពីការប្រកួតជាខ្មែរគ្នាឯង ហ្វឹកហាត់ល្មមៗនិងប្រកួតមិនជាអស់ប៉ុន្មានទេ។

ជើងខ្លាំងវ័យ៣០ឆ្នាំ រូបនេះបន្តថា ហេតុផលដែលពេលប៉ះបរទេសហើយវ៉ៃខ្លាំងដូចនេះ ព្រោះមិនចង់ចាញ់គេនោះឡើយ អាចថាចង់រក្សាស្ថិតិឈ្នះឲ្យបានច្រើន រួមនិងចង់ឲ្យម្ចាស់កម្មវិធីក៏ដូចជាអ្នកគាំទ្រវិស័យប្រដាល់ពេញចិត្តសមត្ថភាពរបស់ខ្លួនផងដែរ ដើម្បីបានឱកាសប្រកួតជាមួយបរទេសច្រើន កាលណាប៉ះបរទេសច្រើនក៏បានតម្លៃខ្លួននិងប្រាក់ចំណូលច្រើនតាមនិងដែរ។

ដៃគូ អាំង សំអាត ត្រូវអាជ្ញាកណ្ដាលរាប់

កីឡាករ អាំង សំអាត ក្រហម

និយាយបណ្ដើរសើចបណ្ដើរ សំអាត ប្រាប់ទៀតថា តែមួយរយៈធំនេះហាក់ដូចជាស្ងាត់ការប្រកួតបន្តិច កីឡាកររូបនេះមិនដឹងថាមកពីមូលហេតុអ្វីនោះទេ អាចថាចាប់គូមិនបានឬខាងប៉ុស្តិ៍គេមិនជ្រើសយកវ៉ៃ ប៉ុន្តែគេនៅតែខំប្រឹងហាត់និងស្វាគមនការឡើងសង្វៀនជានិច្ច។

អាំង សំអាត ជាកូនសិស្សលោកគ្រូ មាស សុខគ្រី មកពីក្លឹបតាព្រហ្មមានជ័យ បច្ចុប្បន្នគេប្រកួតប្រចាំទម្ងន់ ៥៤គីឡូក្រាម សម្រាប់ការប្រកួតចុងក្រោយរបស់គេឈ្នះពិន្ទុជើងខ្លាំងមកថៃនៅសង្វៀន PNN៕

អត្ថបទ៖ នួន ស៊ីណា