បើកំពុងអស់សង្ឃឹម មកស្គាល់យុវជនពីររូបនេះសិន តស៊ូតាំងពីបាតដៃទទេ រហូតក្លាយជាថៅកែលុយស្ដុក

2017-06-13 10:20:43
ចំនួនមតិ 0 | ចំនួនចែករំលែក 0

ចន្លោះមិនឃើញ

មានមនុស្សមិនតិចនាក់ទេ តែងជួបការលំបាកខ្លាំងក្នុងជីវិត រហូតចង់បោះបង់ការតស៊ូ ព្រោះគ្មានសង្ឃឹមនឹងបន្តទៀត។ ប៉ុន្តែមុនចង់បោះបង់ តើបានក្រឡេកមើលអ្នកដែលលំបាកខ្លាំងជាងខ្លួនហើយឬនៅ? ហេតុអ្វីក៏គេអាចតស៊ូ ដើម្បីជីវិតបាន? ចុះហេតុអ្វីត្រឹមបញ្ហាខ្លះចូលមកក្នុងជីវិត បែរជាចង់បោះបង់? ដើម្បីជាកម្លាំងចិត្តដើរទៅមុខបន្តទៀត សូមទៅស្គាល់យុវជនពីររូប ដែលតស៊ូខ្លាំងរហូតទទួលបានជោគជ័យ៖

១. លោក ញឿក ភារុម្យ

ដោយសារធ្វើការទទួលបានប្រាក់ខែតិចពេកគឺត្រឹមតែ៨០ដុល្លារក្នុងមួយខែ លោក ញឿក ភារុម្យ ក៏មានគំនិតមួយ គឺបើកកសិដ្ឋានចិញ្ចឹមចង្រិត។ ដំបូងឡើយលោករៀននៅវិទ្យាស្ថានជាតិពាណិជ្ជសាស្ត្រ ផ្នែកអក្សរសាស្ត្រអង់គ្លេស ហើយឆ្លៀតពេលធ្វើការបានប្រាក់ខែតែ៨០ដុល្លារតែប៉ុណ្ណោះ។

ថ្ងៃមួយលោកបានឃើញវីដេអូមួយតាមអ៊ីនធើណេត ដែលបង្ហាញពីកសិដ្ឋានចិញ្ចឹមចង្រិត ពេលនោះបានចាប់អារម្មណ៍ខ្លាំងលើមុខរបរនោះ។ បន្ទាប់មកលោកក៏ទៅរៀនសូត្របច្ចេកទេសបន្ថែមទៀតនៅប្រទេសថៃ និង វៀតណាម ព្រមទាំងបាននាំយកពូជចង្រិតដែលល្អមកពីប្រទេសថៃដើម្បីមកចិញ្ចឹមសាកល្បងទៀតផង។

ចាប់ផ្ដើមដំបូង លោក មានដើមទុនត្រឹមមួយពាន់ដុល្លារទេ សម្រាប់ការសាងសង់កសិដ្ឋាននៅឯស្រុកកំណើតក្នុងខេត្តតាកែវ។ ការចាប់ផ្ដើមលោកត្រូវឆ្លងកាត់ឧបសគ្គ និងការខាតបង់ជាច្រើន តែលោកមិនដែលគិតចង់បោះបង់នោះឡើយ។

ការតស៊ូពិតជាមិនអត់ប្រយោជន៍ អាជីវកម្មរបស់លោកក៏ចាប់ផ្ដើមទទួលបានចំណូលកើនឡើងបន្តិចម្ដងៗចាប់ពីខែទី៤នៃការចិញ្ចឹម ហើយរហូតមកទល់សព្វថ្ងៃគឺមានរយៈពេល៧ឆ្នាំហើយ។ បច្ចុប្បន្នកសិដ្ឋានការចិញ្ចឹមចង្រិតរបស់លោក អាចប្រមូលផលបាន ប្រមាណ១តោនក្នុងរយៈពេល៤៥ថ្ងៃ។ លើសពីនេះលោកបានបង្រៀនកសិករដទៃទៀតមួយចេះ យកតែ១០ម៉ឺនរៀលប៉ុណ្ណោះ។

យុវជនតស៊ូក្នុងជីវិតរូបនេះ ប្រាប់ថា ក្នុងមួយខែៗ លោកបានផ្គត់ផ្គង់ចង្រិតប្រមាណជាង១០តោនដែរ ទៅអោយទីផ្សារក្នុងប្រទេសកម្ពុជា។

២. លោក ទេពកេន វណ្ណកន

ងាកមកកាន់យុវជនរូបនេះ ក៏មានជីវិតតស៊ូមិនធម្មតាដែរ។ លោក ទេពកេន វណ្ណកន គឺជាសហគ្រិនវ័យក្មេងមួយរូប ធ្លាប់ឆ្លងកាត់ការលំបាកជាច្រើនក្នុងជីវិត រាប់ទាំងគ្មានលុយបង់ថ្លៃសាលា និងស្នាក់អាស្រ័យនៅព្រះវិហារគ្រិស្ត រហូតក្លាយជាCEO នៃក្រុមហ៊ុនព័ត៌មានវិទ្យា CAMWP DEV។

បុរសតស៊ូរូបនេះ មានស្រុកកំណើតនៅខេត្តកំពង់ធំ ជាកូនក្នុងគ្រួសារដែលមានជីវភាពខ្វះខាតខ្លាំង។ ក្រោយប្រឡងមធ្យមសិក្សាទុតិយភូមិហើយ លោកគ្មានលទ្ធភាព ដើម្បីបង់ថ្លៃសាលា ថ្នាក់បរិញ្ញាបត្រនោះទេ តែជាឱកាសល្អ លោកបានជាប់អាហារូបករណ៍សិក្សានៅសកលវិទ្យាល័យកម្ពុជាផ្នែកព័ត៌មានវិទ្យា។ មកនៅភ្នំពេញ លោកបានស្នាក់នៅក្នុងបន្ទប់តូចមួយរបស់វិហារគ្រិស្តមួយកន្លែង ព្រោះគ្មានលទ្ធភាពជួលបន្ទប់ជួលទេ។

ក្រោយមកដោយសារមិត្តភក្តិរបស់លោកបាននាំលោកអោយស្គាល់ពី Internet និង Website ពេលនោះហើយដែលលោកចាប់ផ្ដើមចូលចិត្ត និងតស៊ូរៀនសូត្រដោយមិនបោះបង់ចោល។ ម្យ៉ាងទៀតដោយសារលោកជាអតីតសិស្សពូកែគណិតវិទ្យាប្រចាំខេត្តមួយរូបស្រាប់ ដូចនេះមិនបង្កជាបញ្ហាអ្វីសម្រាប់ការរៀនជំនាញមួយនេះឡើយ។

ក្រោយពីបញ្ចប់ថ្នាក់បរិញ្ញាបត្រនៅឆ្នាំ២០១២ លោក ទេពកេន វណ្ណកន បានចូលបម្រើការងារអោយក្រុមហ៊ុនធំៗ ក្នុងនាមជាWeb Developer ជាបន្តបន្ទាប់រហូតដល់ពាក់កណ្ដាលឆ្នាំ២០១៦ ទើបលោកសម្រេចចិត្តបើកក្រុមហ៊ុនផ្នែកវេបសាយ និង ព័ត៌មានវិទ្យាមួយដោយខ្លួនឯង។ គោលដៅសំខាន់គឺដើម្បីបង្កើតស្នាដៃសម្រាប់ជីវិតរបស់ខ្លួន ម៉្យាងដោយសារលោកមានជំនាញការងារនេះច្បាស់លាស់ រួមផ្សំនឹងមានគេស្គាល់ច្រើនផងដែរ។ ជាពិសេសបានបង្កើតឱកាសការងារសម្រាប់អ្នកក្រីក្រដូចជារូបលោក

សព្វថ្ងៃ បុរសមានវ័យ ២៧ឆ្នាំរូបនេះបានលើកឡើងថា ថ្វីបើក្រុមហ៊ុនរបស់លោកទើបបើកដំណើរការបានរយៈពេលជាង៤ខែក៏ពិតមែន ប៉ុន្តែលោកបានទទួលគម្រោងពីអតិថិជនច្រើនឥតដាច់។

សហគ្រិនវ័យក្មេងរូបនេះ បានផ្ដល់ជាគំនិតថា អ្នកដែលចង់សម្រេចគោលដៅរបស់ខ្លួន ត្រូវហ៊ានតស៊ូពុះពាររាល់ឧបសគ្គ មានគោលដៅ តែគ្មានសកម្មភាព មិនអាចជោគជ័យបានឡើយ។ លុះត្រាមានគោលដៅហើយ អនុវត្តឲ្យបានល្អ ហ៊ានប្រឈមភាពបរាជ័យ ទើបធ្វើឲ្យ គោលដៅនោះចេញជាលទ្ធផលផ្លែផ្កាបាន៕

អត្ថបទ៖ វឌ្ឍនៈ