ភ្លើងឆេះព្រៃដ៏ធំសម្បើមនៅព័រទុយហ្កាល់ មានអ្នកស្លាប់ខ្លះត្រូវដុតកម្លោចក្នុងរថយន្ត

2017-06-18 03:39:42
ចំនួនមតិ 0 | ចំនួនចែករំលែក 0

ចន្លោះមិនឃើញ

យ៉ាងហោចណាស់មនុស្ស ២៤នាក់ បានបាត់បង់ជីវិត និងជាច្រើននាក់ផ្សេងទៀតបានរងរបួសដោយឥទ្ធិពលភ្លើងឆេះព្រៃនៅប្រទេសព័រទុយហ្គាល់ភាគកណ្ដាល។ នេះបើតាមប្រសាសន៍របស់នាយករដ្ឋមន្ត្រី Antonio Costa។

ក្រុមអ្នកពន្លត់អគ្គីភ័យប្រមាណ ៤០០នាក់ត្រូវបានគេបញ្ជូនទៅកន្លែងកើតហេតុនៅតំបន់ជួរភ្នំ Pedrogão Grande ចម្ងាយប្រមាណ ២០០គីឡូម៉ែត្រភាគអាគ្នេយ៍ទីក្រុង Lisbon។

បើយោងទៅតាមសេចក្ដីរាយការណ៍បឋម ក្នុងចំណោមជនរងគ្រោះទាំងអស់ មាន ១៦នាក់ស្លាប់ដោយសារជាប់ក្នុងរថយន្តពួកគេ រួចត្រូវភ្លើងដុតកម្លោចទាំងរស់ និង ៣នាក់ ដោយសារឈ្លក់ផ្សែង។ មនុស្ស ២នាក់ កំពុងបាត់ខ្លួន។

ហេតុការណ៍បានកើតឡើងកាលពីថ្ងៃសៅរ៍ម្សិលមិញ ត្រូវបានគេចាត់ទុកថាជាសោកនាដកម្មភ្លើងឆេះព្រៃអាក្រក់បំផុតក្នុងរយៈពេលជាច្រើនទសវត្សចុងក្រោយក្នុងប្រទេសព័រទុយហ្គាល់។

មន្ត្រីរដ្ឋាភិបាលអះអាងថា រលកកម្ដៅ និងកម្លាំងខ្យល់បក់ខ្លាំងបានធ្វើឲ្យអំណាចភ្លើងឆេះកាន់តែខ្លាំង។ មកទល់ពេលនេះ គេនៅមិនទាន់ដឹងមូលហេតុធ្វើឲ្យឆេះនៅឡើយទេ តែផ្ទះច្រើនខ្នងត្រូវភ្លើងលេបត្របាក់៕