គ្រូបង្រៀនរ៉េបភាសាចិនល្បីឈ្មោះ៖ “អ្នកខ្លះថា ខ្ញុំបង្រៀនឆ្កួតៗ ជារឿងត្រឹមត្រូវ ពីព្រោះ…” (មានវីដេអូ)

2017-06-20 01:55:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងតួនាទីជាអ្នកអប់រំ និងបណ្តុះបណ្តាលភាសាចិននៅសាលាឯកជនមួយ នាក្រុងតាខ្មៅខេត្តកណ្តាល ប្រហែលមិនមែនជារឿងចៃដន្យពេកទេ ដែលលោកគ្រូបង្រៀនម្នាក់អាចរិះរក ឃើញវិធីសាស្ត្របង្រៀនភាសាចិនបែបរ៉េប ហើយនាំអោយផ្ទុះការចាប់អារម្មណ៍ខ្លាំងនៅលើបណ្តាញសង្គម Facebook ខណៈវិធីសាស្រ្តបង្រៀនភាគច្រើនគេនិយមប្រើវិធី ស្ដាប់ និយាយ អាន និងសរសេរតែប៉ុណ្ណោះ។

បុរសវ័យ ៣៦ ឆ្នាំ រូបនេះគ្មានអ្នកក្រៅពី លោកគ្រូ ចៅ សុជាតិ នោះទេ។ រយៈពេលច្រើនឆ្នាំកន្លងមកនេះ លោកបានចូលរួមចំណែកយ៉ាងសកម្ម ក្នុងការបណ្តុះបណ្តាលធនធានមនុស្សផ្នែកភាសាចិន ខណៈតម្រូវការទីផ្សារការងារភាសាចិនកំពុងឈរលេខរៀងមួយខ្ពស់ បន្ទាប់ពី ភាសាអង់គ្លេស។

មានទីកន្លែកកំណើតនៅភូមិ ជ័យឧដ្តុង្គ សង្កាត់លេខ ២ ក្នុងទីរួមខេត្តកំពតលោកបានធំធាត់នៅក្នុងគ្រួសារមួយ ដែលឱ្យតម្លៃទៅលើការសិក្សា ត្បិតថា លោកឪពុក គឺជាគ្រូបង្រៀនភាសាចិននៅក្រុងតាខ្មៅ។

នៅឆ្នាំ ១៩៩៨ លោកបានប្តូរមករស់នៅជាមួយ លោកឪពុក និងជាពេលវេលាធ្វើឲ្យផ្តោតទៅលើការសិក្សាភាសាចិន។ “ដំបូងឡើយខ្ញុំធ្លាប់ជាមនុស្សប្រើប្រាស់ពេលវេលាឥតប្រយោជន៍ដើរសប្បាយ ប៉ុន្តែបន្ទាប់ពីទទួលរងការវាយប្រហារ ខ្ញុំបានភ្ញាក់រលឹក និងខិតខំស្វ័យសិក្សាភាសាចិនដោយខ្លួនឯង”។

រៀនចប់ថ្នាក់ទី ៩ (ថ្នាក់ភាសាចិន) លោកបានទទួលអាហារូបករណ៍ជាច្រើនលើកពីសមាគម ខ្មែរចិនឲ្យបន្តការសិក្សារយៈពេលខ្លីនៅប្រទេសចិន ដែលផ្តោលើគរុកោសល្យបង្ហាត់បង្រៀនភាសាចិន។ នៅដើមឆ្នាំ ២០០២ លោកបានចេញបង្រៀនគួរនៅសាលាឯកជនមួយ។ បន្ទាប់មកជួលបន្ទប់បង្រៀន ចាប់សិស្សពីរអង្គ (ព្រះសង្ឃ) រហូតកើតដល់ចន្លោះពី ៣០ នាក់ទៅ៤០ នាក់។

ផ្ដើមគិតពីផែនការអនាគត និងអ្វីដែលស្ថិតនៅជុំវិញខ្លួន គួបផ្សំទៅនឹងចំនួនសិស្សកាន់តែមានការកើនឡើងឥតឈប់ផងនោះ មជ្ឈមណ្ឌលបង្រៀនភាសាចិនមួយត្រូវបានបង្កើតឡើងកាលពីថ្ងៃទី៣ ខែមីនា ឆ្នាំ២០០៩។ មជ្ឈមណ្ឌលនោះមានឈ្មោះ មជ្ឈមណ្ឌលភាសាចិន ហេងតុង ដែលស្ថិតនៅក្នុងបរិវេណសាលាហេងតុងតែម្តង និងដំណើរការបង្រៀន តែពីរម៉ោងប៉ុណ្ណោះ ៥៖៣០នាទី ដល់ ៧៖៣០នាទី។ ក្រោយមកមជ្ឈមណ្ឌលភាសានេះ បានប្តូរឈ្មោះមកជាសាលាភាសាចិន អ៊ិឈីន រហូតមកដល់បច្ចុប្បន្ននេះ។ សាលាភាសា អ៊ិឈីន ដែលមានទីតាំងក្នុងក្រុងតាខ្មៅកំពុង ទទួលបានការគាំទ្រពីឪពុកម្តាយ និងអាណាព្យាបាលសិស្សជាច្រើន។

វិលមកកាន់វិធីសាស្ត្របង្រៀនបែបរ៉េប ដែលនាំឲ្យអ្នកប្រើប្រាស់បណ្តាញសង្គម Facebook ជាច្រើនស្គាល់លោកនោះត្រូវបានលោកគ្រូ ចៅ សុជាតិ លើកឡើងថា វិធីសាស្រ្តនេះបានកើតចេញពីការសង្កេត បច្ចេកទេស និងច្បិចយកគន្លឹះសំខាន់ ដែលសិស្សចាប់ អារម្មណ៍។ ការបង្រៀនត្រូវសិក្សាពីការវិវត្តទៅតាមសម័យកាល។ សិស្សត្រូវការអ្វីដែលប្លែក និង សប្បាយ ស្របទៅតាមសម័យបច្ចេកវិទ្យា អ៊ីនធឺណេត ក៏ចាប់ផ្តើមអនុវត្តន៍ វិធីសាស្ត្របង្រៀន បែបរ៉េបនៅឆ្នាំ២០១០។

“ដំបូងខ្ញុំបង្រៀនលក្ខណៈអានមេរៀនតាមធម្មតា បកប្រែប្រើ វិធីសាស្រ្ត structure ដោះដូរពាក្យ ។ ដល់ក្រោយមកខ្ញុំហាក់ដូចជាពិបាកឲ្យ គាត់អាន មេរៀន ព្រោះពួកគេមិនស្តាប់ ខ្ញុំគិតថា ម្ង៉ៃៗពួកគេមើលតែទូរសព្ទ ស្ដាប់តែចម្រៀងហើយ ពេលខ្លះក្បាលក៏ញ៉ាក់ចុះញ៉ាក់ឡើង អញ្ចឹងទៅក៏មានអារម្មណ៍ថា ចុមនេះពួគគាត់ចូលចិត្តភ្លេងតាស៎ ។ ការ៉េបជាភាសាអង់គ្លេសមើលទៅពិរោះ ចុះបើប្តូរមកភាសាចិនវិញអាចអោយពួកគេចាប់អារម្មណ៍ទេ? ខ្ញុំក៏ចាប់ផ្តើមធ្វើការស្រាវជ្រាវ ដោយចាប់ពីឆ្នាំ ២០១០ បង្កើត និងអនុវត្ត…ពួកគេចាប់អារម្មណ៍មករៀនច្រើន ប៉ុន្តែមិនទាន់ជោគជ័យនៅឡើយទេ ខ្ញុំត្រូវធ្វើយ៉ាងម៉េចអោយ មានពាក្យជួន ធ្វើសំលេងម៉េចឲ្យចាប់អារម្មណ៍ សប្បាយ នឹងការអាន សប្បាយក្នុងការទន្ទេញ។ ដល់ឆ្នាំ ២០១៤ ទើបមានប្រសិទ្ធិភាពមែនទែន”។

ការបង្រៀនរយៈពេលមួយម៉ោង លោកគ្រូអនុវត្តវិធីសាស្រ្តបង្រៀនបែបរ៉េបតែ ៥នាទី ១០ នាទីប៉ុណ្ណោះ នៅរៀងរាល់ចុងម៉ោងពេលសិស្សល្វើយ ខណៈវិធីសាស្រ្តនេះត្រូវបានលោកគ្រូចាត់ទុកជាថ្នាំម្យ៉ាង ដែលអាចព្យាបាលទៅលើអារម្មណ៍ និងផ្លូវចិត្តរបស់សិស្ស។

“ខ្ញុំមានតិចនិច និងវិធីសាស្រ្ត ត្រឹមត្រូវច្បាស់លាស់ មិនអាចចេះតែ Copy ហើយយកទៅបង្រៀនសិស្សដូចខ្ញុំដែរ មិនអាច ទៅរួចទេ។ ការអាន មេរៀនតាមចង្វាក់ភ្លេងពួកគាត់សប្បាយមែន តែការអានត្រឹមត្រូវ ឬមិនត្រឹមត្រូវ បើគ្រូមិនពត់ទេ ចោលលុយតែម្តង អញ្ចឹងបានថា វិធីសាស្រ្តនេះមានតែសាលាខ្ញុំទេទើបអាចធ្វើបាន ព្រោះខ្ញុំជាអ្នកបង្កើត”។

យ៉ាងនេះក្តីអ្នកប្រើប្រាស់បណ្តាញសង្គមខ្លះបានរិះគន់ វិធីសាស្រ្តបង្រៀនរបស់លោករហូត ចាត់ទុកថា នេះគឺជាវិធីបង្រៀនបែបឆ្កួតៗ។ មិនយល់ទាស់ចំពោះអ្នករិះគន់ លោកគ្រូថែមទាំងយល់ស្របចំពោះមតិអ្នករិះគន់ទៀតផង។

“កត្តាដែលគេថា ខ្ញុំឆ្កូតជារឿងត្រឹមត្រូវ ពីព្រោះថា នៅក្នុងខួរក្បាលរបស់មនុស្សផ្ទុកដោយព័ត៌មានជាច្រើន ព័ត៌មានដែលយើងដឹង គឺយើងស្គាល់ ព័ត៌មានដែលយើងមិនដឹងគឺយើងមិនស្គាល់ បើកាលយើងមិនស្គាល់ ហើយគេធ្វើ យើងមានអារម្មណ៍ថា វាមិនដែលៗ យើងនឹងឲ្យតម្លៃអ្នកនោះថា ឆ្កួត។ ខ្ញុំឧទាហរណ៍ទៅលើការពិសាទឹកអញ្ចឹង ទឹកដែលយើងស្គាល់ម៉ាក និងទឹកដែលយើងមិនស្គាល់ម៉ាក់ យើងជ្រើសរើយយកមួយណា? យើងច្បាស់ជាយកទឹកស្គាល់ម៉ាកហើយ…អាហារ ក៏ដូចគ្នាដែរ។ អញ្ចឹងមានតែអ្នកទទួលបានព័ត៌មានពីខ្ញុំទេ ទើបដឹងច្បាស់ ពិសេសអ្នកដែលបានរៀនជាមួយខ្ញុំ”។

បច្ចុប្បន្នលោកគ្រូ ចៅ សុជាតិ ដែលជាអ្នកគ្រប់គ្រងទូទៅនៅសាលាភាសាចិន អ៊ិឈីន បានបណ្តុះបណ្តាលសិស្សរាប់ពាន់នាក់អោយមានការងារធ្វើសមរម្យ ជាពិសេសក្លាយជាអ្នកបកប្រែនៅតាមរោងចក្រនានាស្ទើរទូទាំងប្រទេស។ ទៅថ្ងៃអនាគតលោកមានបំណងពង្រឹងវិធីសាស្រ្តបង្រៀននេះមិនឲ្យសាបសូន្យនោះទេ ខណៈ មហិច្ឆតាមួយទៀត លោកចង់បង្កើតសាលា និងបញ្ជ្រាបវិធីសាស្រ្តបង្រៀននេះ ឲ្យបានទូទាំងប្រទេស។ ប៉ុន្តែមិនប្រាកដថា ពេលវេលានឹងមកដល់នៅពេលណានោះទេ។

លោកគ្រូ បានចែករំលែកបទពិសោធន៍ផ្ទាល់ខ្លួនថា ការដែលលោកបានដើរមកដល់ចំណុចនេះ អ្វីៗគឺកើតឡើងពីភាពបរាជ័យ។ ចង់ធ្វើអ្វីអោយទទួលជោគជ័យ ត្រូវធ្វើចិត្តឲ្យស្រស់ ស្រាយ បង្កើតចំណង់ចំណូលចិត្ត ត្រូវចេះរៀបចំផែនការជីវិត គួរធ្វើខ្លួនឯងអោយរវល់ តែរវល់នឹងរឿងមានប្រយោជន៍ និងបែងចែកពេលវេលាអោយបានច្បាស់លាស់។ ប្រើប្រាស់ពេល វេលាឲ្យបានត្រឹមត្រូវ និងលើសគេ។ ត្រូវចេះមើលចំណុចខ្សោយ ដើម្បីអភិវឌ្ឍន៍ខ្លួន។ ចំណុចខ្សោយរបស់យើង ជាគ្រាប់ពេជ្រមិនអាចកាត់ថ្លៃបាន៕

អត្ថបទ៖ សុផល