OnePlus 5 កាមេរ៉ាភ្លោះថតព្រាលដូច iPhone 7 Plus តម្លៃវិញញាក់សាច់

2017-06-21 01:56:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ទីបំផុត OnePlus 5 ដែលមានរូបរាងស្រដៀងនឹង iPhone 7 Plus បានបង្ហាញវត្តមានជាផ្លូវការកាលពីយប់មិញ។

ក្រៅពីមានរូបរាងស្រដៀងហើយ OnePlus 5 នេះក៏មានបំពាក់ប្រព័ន្ធកាមេរ៉ាភ្លោះដែលមានដំណើរការដូចកាមេរ៉ាភ្លោះលើ iPhone 7 Plus អ៊ីចឹងដែរ។ កាមេរ៉ាពីរគ្រាប់ខាងក្រោយរបស់ OnePlus 5 មួយជាប្រភេទឡេនធម្មតាមានទំហំ ១៦ MP Aperture f/1.7 និង មួយទៀតជាប្រភេទឡេន Telephoto ដែលមានទំហំ ២០ MP Aperture f/2.6។ ប្រព័ន្ធនេះអាចឲ្យ OnePlus 5 ថតរូបប្រភេទព្រាលផ្ទៃខាងក្រោយ (Portrait Mode) បាន ហើយអាចថតរូបដោយ Zoom មិនបែកសាច់រូបភាពឡើយ។

OnePlus 5 ក៏មានបំពាក់ដោយអេក្រង់ AMOLED ៥,៥ អ៊ីញ កម្រិត Full HD និង មានកម្រាស់ ៧,២៥ ម.ម ដែលជាត្រកូល OnePlus ប្រភេទ Flagship មានកម្រាស់ស្ដើងជាងគេ។ ដំណើរការដោយបន្ទះឈីប Snapdragon 835, RAM ៦ GB/ ៨ GB និង មានអង្គផ្ទុកទិន្នន័យ ៦៤ GB ឬ ១២៨ GB ដែលគ្មានរន្ធសម្រាប់ដោតមេមូរីកាតឡើយ។

ចំពោះការ Selfie វិញគឺអាចប្រើកាមេរ៉ាខាងមុខដែលមានកម្រិតដល់ ១៦ MP ជាមួយ Aperture f/2.0។ OnePlus 5 ដើរដោយប្រព័ន្ធប្រតិបត្តិការ Android 7.1.1 Nougat ជាមួយនឹង OxygenOS, មានថ្មថាមពល ៣៣០០ mAh រួមជាមួយបច្ចេកវិទ្យា Dash Charge អាចសាកថ្មបានលឿនតាមរន្ធ USB Type C 2.0។

នៅថ្ងៃទី ២៧ ខែមិថុនា OnePlus 5 នឹងមានលក់នៅអាមេរិកខាងជើងក្នុងតម្លៃចាប់ពី ៤៧៩ ដុល្លារ និងនៅអឺរ៉ុបតម្លៃចាប់ពី ៤៩៩ អឺរ៉ូ (ប្រហែល ៥៥៥ ដុល្លារ)។ ចំណែកនៅទីផ្សារអាស៊ីដូចជាចិន និង ហុងកុង នឹងមានលក់នៅពេលបន្តបន្ទាប់៕