ត្រណម ៥យ៉ាងហាមធ្វើដាច់ខាត ពេលប្ដីប្រពន្ធឈ្លោះគ្នា អាចនាំហេតុមិនល្អដល់គ្រួសារ
- 2017-06-25 08:19:16
- ចំនួនមតិ 0 | ចំនួនចែករំលែក 0
ត្រណម ៥យ៉ាងហាមធ្វើដាច់ខាត ពេលប្ដីប្រពន្ធឈ្លោះគ្នា អាចនាំហេតុមិនល្អដល់គ្រួសារ
ចន្លោះមិនឃើញ
ក្នុងជីវិតរស់នៅជាប្ដីប្រពន្ធតែងជៀសមិនផុតរឿងឈ្លោះទាស់ទែងគ្នា តែទោះយ៉ាងណាក្រោយឈ្លោះហើយនៅតែជាប្ដីប្រពន្ធដដែល។ តាមជំនឿដូនតាខ្មែរតាំងពីបុរាណមក ពេលប្ដីប្រពន្ធឈ្លោះទាស់ទែងគ្នា ហាមធ្វើរឿង ៥យ៉ាងនោះដាច់ខាត ព្រោះអាចនាំហេតុមិនល្អដល់គ្រួសារ។ នេះបើតាមការប្រាប់របស់លោកតា អាចារ្យ អែម ចន រស់នៅខេត្តកំពង់ស្ពឺ។
១. ជេរប្រទេចផ្ដាសា
តាមជំនឿតាំងពីបុរមបុរាណមកពេលប្ដីប្រពន្ធឈ្លោះគ្នា ហាមជេរប្រទេច ដាក់បណ្ដាសាដាច់ខាត ព្រោះនឹងនាំតែរឿងឧបទ្រពចង្រៃដល់គ្រួសារមិនចេះចប់ ប្ដីប្រពន្ធរស់នៅមិនបានសុខនោះទេ។ បើតាមលោកតា អែម ចន អាចារ្យក្នុងពិធីមង្គលការ ប្រាប់ទៀតថា បើប្ដីប្រពន្ធឈ្លោះគ្នា អត់ទ្រាំជេរមិនបាន អាចជេរឧបកិច្ចទៅដូចជា ជេរ ឆ្មា ឆ្កែ ជាដើម តែកុំជេរចំឈ្មោះប្ដីប្រពន្ធដាច់ខាត។
២. ស្បថឬដាក់ទំនាយ
លោកតា អែម ចន ប្រាប់ទៀតថា ស្បថ ឬដាក់ទំនាយ ក៏ចាស់ៗពីដើមហាមមិនឱ្យកូនចៅនិយាយដាច់ខាត ព្រោះវានឹងក្លាយជាការពិតដូចពាក្យនិយាយ។ ដូច្នេះហើយឱ្យតែមានកូនចៅស្បថ ឬដាក់ទំនាយគ្នា ចាស់ៗតែងឱ្យទៅវត្តអុជធូបសុំខមាទោស ឬសែនព្រេនលាពាក្យសម្ដី។ ដូចនេះទោះជាមានរឿងឈ្លោះទាស់ទែងធំប៉ុណ្ណាក៏ដោយហាមស្បថ ឬដាក់ទំនាយដាច់ខាត។
៣. គេងបែកគ្រែ
គេងបែកគ្រែនេះ ដូនតាខ្មែរ ហាមដាច់ខាតហើយ ព្រោះជាប្រផ្នូលមិនល្អ ប្ដីប្រពន្ធអាចបែកគ្នារហូតក៏ថាបាន។ លោកតា អែម ចន និយាយថា ទោះជាឈ្លោះគ្នាពីថ្ងៃខ្លាំងយ៉ាងណាក៏ដោយ តែពេលយប់ត្រូវតែគេងរួមគ្រែ មិនត្រូវប្រកាន់ចិត្តខឹងរៀងខ្លួន គេងបែកគ្នាទេ ព្រោះអាចធ្វើឱ្យពីរនាក់ប្ដីប្រពន្ធមិនងាយនឹងត្រូវគ្នាទេ។
៤. ប្រើអំបោស ឬសម្ភារៈស្មោកគ្រោកវាយដំគ្នា
អំបោស ឬសម្ភារៈស្មោកគ្រោក ហាមយកមកវាយដំគ្នាដាច់ខាត ពេលប្ដីប្រពន្ធឈ្លោះគ្នា ព្រោះអាចនាំរឿងអពមង្គលដល់គ្រួសារ។ ចាស់ៗក្នុងសង្គមខ្មែរជឿថា អំបោស ជាសម្ភារៈសម្រាប់បោសសម្អាត តែបើយកមកវាយគ្នា អាចនាំមនុស្សនោះចង្រៃបាន រកស៊ីមិនឡើង ឬរហូតដល់ឆ្កួតលីលាទៀតផង។ ប្ដីប្រពន្ធគួររកដំណោះស្រាយដោយសន្តិវិធី មិនមែនជាការប្រើអំពើហិង្សារលើគ្នានោះឡើយ។
៥. យកសំលៀកបំពាក់ដុតចោល
លោកតា អាចារ្យ អែម ចន បានប្រាប់ទៀតថា ចាស់ៗពីដើមហាមដាច់ខាត មិនឱ្យយកសំលៀកបំពាក់ទៅដុតចោល ពេលប្ដីប្រពន្ធឈ្លោះគ្នានោះទេ។ ដូនតាខ្មែរ មានជំនឿថា ជាការនាំរឿងហេតុ ឬប្រផ្នូលមិនល្អដល់គ្រួសារ ប្ដីប្រពន្ធអាចមានជំងឺឈឺថ្កាត់ រស់នៅមិនបានសុខ ចេះតែមានបញ្ហា ឬអាចមានគ្រោះថ្នាក់ដល់អាយុជីវិតទៀតផង៕