ក្រុមហ៊ុនផលិតពោងសុវត្ថិភាព Takata ប្រកាសក្ស័យធន
- 2017-06-26 02:51:12
- ចំនួនមតិ 0 | ចំនួនចែករំលែក 0
ក្រុមហ៊ុនផលិតពោងសុវត្ថិភាព Takata ប្រកាសក្ស័យធន
ចន្លោះមិនឃើញ
ក្រុមហ៊ុនផលិតពោងសុវត្ថិភាពរថយន្តដ៏ធំរបស់ជប៉ុន Takata បានប្រកាសក្ស័យធនទាំងនៅសហរដ្ឋអាមេរិក និង ប្រទេសជប៉ុន។
ដើមហេតុនៃការប្រកាសនេះដោយសារក្រុមហ៊ុនប្រឈមមុខនឹងបំណុលរាប់ពាន់លានដុល្លារ ដែលពាក់ព័ន្ធនឹងពោងសុវត្ថិភាពមានបញ្ហា នាំឲ្យមានការបាត់បង់ជីវិតមនុស្ស ១៧ នាក់នៅជុំវិញពិភពលោក។ ភ្លាមៗនេះដែរក្រុមហ៊ុន Key Safety Systems ដែលមានទីតាំងនៅសហរដ្ឋអាមេរិកបានចំណាយ ១,៦ ពាន់លានដុល្លារទិញយកទ្រព្យសម្បត្តិទាំងអស់របស់ Takata លើកលែងតែផ្នែកជាប់ពាក់ព័ន្ធពោងសុវត្ថិភាព។
នាយកប្រតិបត្តិ Key Safety Systems លោក Jason Luo លើកឡើងថា ៖ "ត្បិតថា Takata រងការប៉ះពាល់ដោយសារបញ្ហាពោងសុវត្ថិភាពមែន ប៉ុន្តែបុគ្គលិកដែលមានសមត្ថភាពខ្ពស់របស់ក្រុមហ៊ុននេះ, កេរ្តិ៍ឈ្មោះ, ការផលិតចង្កូតរថយន្ត, ខ្សែក្រវាត់ និង ផលិតផលសុវត្ថិភាពដទៃទៀតមិនបានកប់ទៅជាមួយនឹងបញ្ហានេះឡើយ”។
រំលឹកថារថយន្តជាង ១០០ លានគ្រឿងដែលប្រើពោងសុវត្ថិភាព Takata ត្រូវបានហៅចូលត្រឡប់មកវិញចាប់តាំងពីឆ្នាំ ២០០៧ មកដោយសារការព្រួយបារម្ភលើបញ្ហាពោងសុវត្ថិភាព។ វាជាការហៅចូលផ្នែកសុវត្ថិភាពដ៏ធំមួយក្នុងប្រវត្តិសាស្ត្រសហគ្រាសយានយន្ត។
នៅខែមករាឆ្នាំនេះ Takata យល់ព្រមបង់ថ្លៃការពិន័យ ១ ពាន់លានដុល្លារក្នុងសហរដ្ឋអាមេរិក ចំពោះការបិទបាំងពីកំហុសដ៏គ្រោះថ្នាក់ និង បានសារភាពទោសកំហុសលើបទឧក្រិដ្ឋមួយផងដែរ។ ក្រុមហ៊ុននេះបានបង់ពិន័យ ២៥ លានដុល្លារ, ១២៥ លានដុល្លារបង់ឲ្យជនរងគ្រោះដោយសារពោងសុវត្ថិភាព រួមទាំង ៨៥០ លានដុល្លារទៀតបង់ឲ្យក្រុមហ៊ុនរថយន្តដែលប្រើពោងសុវត្ថិភាពរបស់ខ្លួន៕
ចុចអាន៖
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
