ដូណាល់ ត្រាំ៖ «អាល់អាសាដ ទំនងកំពុងរៀបចំ ការវាយប្រហារអាវុធគីមី ថ្មីមួយទៀត»

2017-06-27 04:08:53
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ដូណាល់ ត្រាំ៖ ការវាយប្រហារអាវុធគីមីមួយនេះ ស្រដៀងទៅនឹង ការវាយប្រហារអាវុធគីមី កាលពីខែមេសា
លោក អាសាដ នឹងសងសំណងដ៏ធំមួយ ប្រសិនបើវាកើតឡើង
ការវាយប្រហារអាវុធគីមីថ្មី នឹងនាំមកនូវការសម្លាប់ប្រជាជនស៊ីវិល យ៉ាងរង្គាល រួមទាំងកុមារគ្មានកំហុសផងដែរ

សេតវិមាន បានប្រាប់ឲ្យដឹង កាលពីរាត្រីថ្ងៃច័ន្ទ (ត្រូវនឹងព្រឹកថ្ងៃអង្គារនៅកម្ពុជា) ថា ប្រធានាធិបតីស៊ីរី លោក បាសា អាល់អាសាដ (Bashar al-Assad) ហាក់បីដូចជា កំពុងត្រៀមរៀបចំការវាយប្រហារអាវុធគីមីមួយផ្សេងទៀត និងបានព្រមានប្រធានាធិបតីរូបនេះថា លោកនឹងសងសំណងដ៏ធំមួយ ប្រសិនបើវាកើតឡើង។

នៅក្នុងសេចក្ដីថ្លែងការណ៍មួយ ពីលេខាធិការនៃសេតវិមាន ប្រធានាធិបតីអាមេរិក លោក ដូណាល់ ត្រាំ បានប្រាប់ឲ្យដឹងថា លោក អាសាដ កំពុងរៀបចំការវាយប្រហារអាវុធគីមីមួយ ដែលស្រដៀងទៅនឹង ការវាយប្រហារអាវុធគីមី កាលពីខែមេសា កន្លងទៅនេះ ដែលបានសម្លាប់ប្រជាជនស៊ីរីស្លូតត្រង់ ជាច្រើននាក់ ក្នុងនោះរួមមានទាំងកុមារ ផងដែរ។

បើយោងតាមសេចក្ដីថ្លែងការណ៍របស់សេតវិមាន បានឲ្យដឹងថា «ដូចដែលយើងធ្លាប់បានលើកឡើងពីមុនមកថា សហរដ្ឋអាមេរិក ស្ថិតនៅក្នុងប្រទេសស៊ីរី ដើម្បីកម្ចាត់រដ្ឋឥស្លាមអ៊ីរ៉ាក់ និងស៊ីរី។ បើសិនជា លោក អាសាដ ធ្វើការវាយប្រហារដោយប្រើមហាអំណាចនៃអាវុធគីមី នោះ លោក និង យោធារបស់លោក នឹងត្រូវសងសំណងធំមួយ ជាមិនខាន»។

ទោះបីជាយ៉ាងណាក៏ដោយ គេមិនបានដឹងច្បាស់ឡើយថា រដ្ឋាភិបាលអាមេរិក ទទួលបានភស្តុតាង នៃគម្រោងការណ៍វាយប្រហារអាវុធគីមីខាងលើ បានយ៉ាងដូចម្ដេច។ ប៉ុន្តែ សេចក្ដីថ្លែងការណ៍ពីសេតវិមាន បានបង្ហាញថា ការវាយប្រហារអាវុធគីមីថ្មី នឹងនាំមកនូវការសម្លាប់ប្រជាជនស៊ីវិល យ៉ាងរង្គាល រួមទាំងកុមារគ្មានកំហុសផងដែរ៕