យុវជនបច្ចុប្បន្ន ចាប់អារម្មណ៍លើការរកស៊ី ជាងធ្វើការឱ្យគេ

2017-06-30 03:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មានយុវជនជាច្រើននាក់ក្នុងប្រទេសកម្ពុជាបច្ចុប្បន្ន តែងលើកឡើងថា ឱ្យតែមានដើមរកស៊ី មិនចង់ធ្វើការឱ្យគេទេព្រោះមិនងាយមានទេ។ ចំណែកអ្នកខ្លះនិយាយថា ធ្វើការឱ្យគេពីរបីឆ្នាំឈប់ធ្វើហើយចង់ទៅរកស៊ីវិញ។ រីឯយុវជនមួយចំនួន គឺចាប់ផ្ដើមប្រថុយរកស៊ីតែម្ដងទៅមុខជំនួញផ្នែកភេសជ្ជៈ និងអាហារជាដើម។ ដូច្នេះយុវជនភាគច្រើនលែងចង់ធ្វើការឱ្យគេហើយ? ខាងក្រោមនេះជាការលើកឡើងរបស់យុវជនមួយចំនួនជុំវិញបញ្ហានេះ៖

ជួបជាមួយយុវជន ហេង បញ្ញារិទ្ធិ បច្ចុប្បន្ននេះមានរទេះលក់កាហ្វេតូចមួយនៅម្ដុំវិមានឯករាជ្យ រាជធានីភ្នំពេញបានលើកឡើងថា៖ "ហ្នឹងហើយបងតាមគំនិតខ្ញុំ ធ្វើការឱ្យប៉ុន្មានឆ្នាំក៏មិនងាយសល់លុយដែរ ព្រោះគ្មានក្រុមហ៊ុនណាហ៊ានឱ្យប្រាក់ខែរាប់ពាន់ដុល្លារទេបង។" យុវជនវ័យក្មេងនេះបន្តទៀតថា តាមពិតទៅពីរូបលោកក៏ជាអ្នកធ្វើការក្នុងក្រុមហ៊ុនដែរ ក្រោយពេលបញ្ចប់ការសិក្សា តែហាក់មិនសល់លុយសោះ បានត្រឹមតែមួយគ្រប់ចាយ។ លុះក្រោយមកក៏បែកគំនិតចង់រកស៊ីវិញដោយសារ មានលុយសន្សំខ្លះ និងលុយគ្រួសារខ្លះ លោកក៏ចាប់ផ្ដើមបើកកន្លែងលក់កាហ្វេនេះតែម្ដង ព្រោះគិតថា ចំណាយទុនតិច មិនសូវប្រឈមហានិភ័យ។

ចុងក្រោយ បញ្ញារិទ្ធិ និយាយថា៖ ចំណេញតិចចំណេញច្រើនអី ក៏យើងមិនបានធ្វើការគ្រាប់បង្គាប់នរណា គឺធ្វើជាថៅកែខ្លួនឯង ទោះជាហត់បន្តិចតែនេះជាក្ដីស្រឡាញ់របស់ខ្ញុំ។ ថ្ងៃណាមួយខ្ញុំនឹងពង្រីកមុខរបរនេះឱ្យកាន់តែធំ ព្រោះបច្ចុប្បន្នហាក់ជោគជ័យបណ្ដើរៗហើយ។

ដោយឡែកចំពោះ លោក ហាក់ សីហា បុគ្គលិកក្នុងក្រុមហ៊ុនឯកជនមួយកន្លែង បានលើកឡើងថា នរណាក៏ចង់រកស៊ីដែរ តែទាស់ត្រង់ថា មិនមានដើមទុន ម្យ៉ាងវិញទៀតមិនទាន់ហ៊ានប្រថុយ ព្រោះរកស៊ីខុសពីការធ្វើការឱ្យគេ។ សីហានិយាយថា ធ្វើការឱ្យគេទោះល្អមិនល្អក៏នៅតែមានប្រាក់ខែចាយ តែបើរកស៊ីក្ស័យធុនវិញគឺអត់លិឍតែម្ដង។ ដូច្នេះការរកស៊ីអាចនិយាយងាយ ប៉ុន្តែក៏ត្រូវសិក្សាឱ្យល្អិនល្អន់ដែរ។ ចំពោះរូបលោកចាំធ្វើការឱ្យគេបានយ៉ាងតិច៣ឆ្នាំសិន ចាំចាប់ផ្ដើមគិតគូរពីការរកស៊ី ព្រោះត្រូវការពេលវេលាដើម្បីប្រមូលផ្ដុំបទពិសោធន៍។

មកជួបជាមួយយុវតី ប៊ិន សុជាតា វិញលើកឡើងថា ជាការពិតយុវវ័យឥឡូវចូលចិត្តរកស៊ីខ្លួនឯងជាងធ្វើការឱ្យគេ សូម្បីតែរាល់ថ្ងៃកញ្ញាផ្ទាល់ក៏ចាប់ផ្ដើមរកស៊ីដែរ តាមរយៈការលក់ផលិតផលតាមអនឡាញ។ សុជាតា និយាយថា មុខរបរជាច្រើនមិនចំណាយដើមទុនច្រើន ហើយយុវជនអាចចាប់ផ្ដើមបាន ដូចជាការលក់កាហ្វេ អាហារ ឬផលិតផលតាមអនឡាញជាដើម ព្រោះមិនទាមទារឱ្យមានបទពិសោធន៍ច្រើន ដូចមុខជំនួញដើមទុនរាប់ម៉ឺនដុល្លារនោះទេ៕

ចុះចំណែកប្រិយមិត្តវិញ យល់យ៉ាងណាដែរ?

អត្ថបទ៖ វឌ្ឍនៈ