Canon 6D Mark II បង្ហាញខ្លួនហើយ តែឯណាលុយ?

2017-06-29 07:13:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ទីបំផុត Canon 6D Mark II ដែលមនុស្សជាច្រើនទន្ទឹងរង់ចាំបានបង្ហាញខ្លួនជាផ្លូវការហើយ អមជាមួយនឹងកាមេរ៉ាស៊េរីថ្មីតម្លៃធូរថ្លៃ Rebel SL2 ផងដែរ។

6D Mark II ដែលទើបប្រកាសចេញនេះមានតម្លៃ ១ ៩៩៩ ដុល្លារ ធូរថ្លៃជាង 5D បន្តិច ហើយនឹងមានចេញលក់នៅខែកក្កដាខាងមុខនេះ។ 6D ស៊េរីថ្មីមានបន្ថែមសមត្ថភាពមួយចំនួនដូចជាមាន Sensor CMOS ទំហំដល់ ២៦,២ MP រួមជាមួយនឹង Image Processor DIGIC 7 ផងដែរ។ ចំពោះ ISO វិញក៏បានដំឡើងរហូតដល់ ៤០ ០០០ ជួយឲ្យថតរូបពេលខ្វះពន្លឺបានកាន់តែល្អ។

6D Mark II ថែមទាំងមានប្រើបច្ចេកវិទ្យា Dual Pixel Autofocus របស់ Canon ទៀតផង ហើយកាមេរ៉ានេះមាន Autofocus Point ឡើងដល់ 45 Cross-Type។ អាចថតរូបក្នុងល្បឿនលឿនបំផុត ៦,៥ ប្លង់ក្នុងមួយវិនាទី ហើយចំពោះល្បឿនថតរូប Burst អាចបានច្រើនបំផុត ២១ សន្លឹកសម្រាប់រូប RAW និង រូប JPEG បាន ១៥០ សន្លឹក។

អេក្រង់ LCD ទំហំ ៣ អ៊ីញលើ 6D Mark II គឺជាប្រភេទអេក្រង់ Touchscreen ដែលអាចទាញចេញក្រៅបាន និង អាចធន់នឹងអាកាសធាតុច្រើនប្រភេទបានដូចជាការការពារមានលើ 5D Mark IV ដែលជាម៉ូដែលថ្លៃជាងយ៉ាងអ៊ីចឹង។ ចំពោះប្រព័ន្ធតភ្ជាប់មានដូចជា Wi-Fi, NFC, Bluetooth និង ប្រព័ន្ធ GPS។

ដោយឡែកងាកទៅមើល Rebel SL2 វិញជាកាមេរ៉ាកម្រិតធូរថ្លៃដែលមានតម្លៃត្រឹម ៥៤៩ ដុល្លារប៉ុណ្ណោះ។ វាមានបំពាក់ Sensor CMOS ទំហំ ២៤,២ MP ហើយប្រើ DIGIC 7 និង Dual Pixel Auto Focus ផងដែរ។ មិនតែប៉ុណ្ណោះក៏មានបំពាក់អេក្រង់ Touchscreen អាចទាញចេញបាន, Wi-Fi, Bluetooth និង NFC ផងដែរ។