ស្រាយចម្ងល់ ទន្លេអាយុកាល ៥០លានឆ្នាំ ប្រែជាពណ៌ចម្រុះគ្នាគួរឲ្យភ្ញាក់ផ្អើល

2017-07-05 03:44:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ទន្លេមួយនៅក្នុងប្រទេសចិន បានធ្វើឲ្យមនុស្សជាច្រើន ជាពិសេសអ្នកធ្វើដំណើរឆ្លងកាត់ មានការភ្ញាក់ផ្អើលព្រោះតែវាបានប្ដូរពណ៌ទឹកខុសគ្នាតាមអាងនីមួយៗ តែវាបានបង្កើតជាទស្សនីយភាពគួរឲ្យចាប់អារម្មណ៍ផ្សេងមួយទៀត។

ទន្លេ Yanhu ជាទន្លេមានទឹកប្រៃស្ថិតនៅខេត្តសានស៊ី ភាគខាងជើងប្រទេសចិន បានប្រែជាពណ៌ចម្រុះគ្នាមានពណ៌ទឹកប៊ិច ស្វាយស្រាល ស្វាយដិត ផ្កាឈូក ឈាមជ្រូក បៃតង ឬទឹកក្រូចជាដើម។

ទន្លេ Yanhu គ្របដណ្ដប់លើផ្ទៃ ១៣២គីឡូម៉ែត្រការ៉េ និងប្រវែង ៣០គីឡូម៉ែត្រ។ ក្រុមអ្នកវិទ្យាសាស្ត្រចិនបានសិក្សាស្រាវជ្រាវរកឃើញថា ទន្លេបានកកើតឡើងតាំងពី ៥០លានឆ្នាំមុនមកម្ល៉េះ។ ទន្លេនេះស្ថិតក្នុងចំណោមទន្លេមានទឹកប្រៃកំពូលទាំង ៣ ក្នុងលោក និងមានអំបិលអាចយកមកទទួលទានបានទៀតផង។ អំបិលនៅទីនេះមានផ្ទុកសារធាតុសូដ្យូមស៊ុលផាត និងម៉ាញ៉េស្យូមស៊ុលផាត។

ក្រុមអ្នកជំនាញអះអាងថា ការកើនឡើងសីតុណ្ហភាពបណ្ដាលឲ្យកើតមានសារធាតុអាល់ហ្គែ (សារាយ) និងបង្គាទឹកប្រៃម្យ៉ាងក្នុងបឹង។ ដោយសារតែប្រភេទអាល់ហ្គែមានពណ៌ខុសៗគ្នា និងពពួកសត្វបង្គា ទើបកែប្រែពណ៌ទឹកទន្លេទៅជាទស្សនីយភាពគួរឲ្យចង់គយគន់បែបនេះ។

ទោះបីជាវាមានពណ៌ខុសប្រក្រតី តែគេក៏អាចហែលទឹកលេងបានធម្មតា និងមិនមានគ្រោះថ្នាក់អ្វីឡើយ៕