ហុក សុចិត្រា នាំក្រុម POSENCHEY FC លើកពាន KMH Cup រង្វាន់៥ពាន់ដុល្លារ

2017-07-11 02:47:44
ចំនួនមតិ 0 | ចំនួនចែករំលែក 0

ចន្លោះមិនឃើញ

POSENCHEY FC បានលើកពាន KMH CUP រដូវកាលទី៤ហើយ ក្រោយពីបញ្ចប់៣៨ប្រកួតឈរនៅលើក្រុម PISNOKA FC ដែលប្រកួតចាញ់ក្រុម CSSC Rolling FC កាលពីយប់មិញក្នុងលទ្ធផល ៣-៤។

POSENCHEY FC

ក្រោយពីចំណាយពេលជិត១ឆ្នាំក្នុងការប្រកួតពានខាងលើនេះ ចុងក្រោយក្រុមដែលទទួលបានជើងឯកនោះគឺបានទៅលើក្រុម POSENCHEY FC មាន៩៤ពិន្ទុឈរកំពូលតារាង។ ខណៈដែលក្រុមត្រូវគេរំពឹងខ្ពស់ PISNOKA FC នោះ បែរជាធ្វើឱ្យបាត់បង់ឱកាសលើកពានទៅវិញ ពោលគឺបែរជាចាញ់ក្រុម CSSC Rolling FC នៅប្រកួតចុងក្រោយ ធ្វើឱ្យពួកគេមានត្រឹមតែ៩២ពិន្ទុប៉ុណ្ណោះ។ បរាជ័យ១ប្រកួតនេះហើយ ទើបធ្វើឱ្យក្រុម POSENCHEY FC របស់លោក ហុក សុចិត្រា មានឱកាសហក់ឡើងកំពូលតារាង និងកាន់ពានរង្វាន់សម្រាប់រដូវកាលនេះតែម្ដង។

លោក ហុក សុចិត្រា

ក្រោយចប់ការប្រកួតនេះដែរ លោក ហុក សុចិត្រា ដែលជាកីឡាករលេងនៅក្នុងក្រុម POSENCHEY FC បាននិយាយថានេះជាការប្រកួតពានរង្វាន់មិនអាជីព ដែលអាចនិយាយបានថាធំជាងគេបំផុតនៅកម្ពុជា។ លោក សប្បាយចិត្តពេលឃើញវិស័យបាល់ទាត់រីកចម្រើនយ៉ាងនេះ ហើយក៏ចូលរួមអបអរដល់សមាជិកទាំងអស់ទទួលបានជ័យជម្នះនេះផងដែរ។ ក្រុម POSENCHEY FC ជាក្រុមចំណូលថ្មីមួយក្នុងពាននេះ ប៉ុន្តែលេងសហការគ្នាបានល្អ ហើយគ្មានកីឡាករបរទេសជួយនោះទេ។

លោក សាមិត្ត វឌ្ឍនៈឧត្តម តំណាងអ្នករៀបចំការប្រកួតខាងលើបានបញ្ជាក់ដែរថានេះជារដូវកាលជោគជ័យថ្មីមួយទៀតសម្រាប់ពាន KMH CUP ។ ដូចដែលអ្នកគាំទ្រទាំងអស់បានដឹង ពាននេះបង្កើតឡើងដើម្បីសប្បុរសធម៌ ហើយក្រុមកីឡាករទាំងអស់ក៏លេងដោយមានទំនុកចិត្តនិងសាមគ្គីគ្នាដែរ។ លោក សង្ឃឹមថារដូវកាលទី៥ នឹងកាន់តែធំជាងរដូវកាលនេះទៀត ដើម្បីអភិវឌ្ឍវិស័យបាល់ទាត់នៅកម្ពុជា។

ពាន KMH CUP រដូវកាលទី៤ ចាប់ផ្ដើមឡើងតាំងពីខែតុលាឆ្នាំ២០១៦ ដោយមាន២០ក្រុមចូលរួម។ ចំពោះប្រាក់រង្វាន់វិញ លេខ១ Posenchey FC បាន៥ ០០០ដុល្លារ លេខ២ Pisnoka FC បាន ១ ៥០០ដុល្លារ លេខ៣ Anachak Baitong FC បាន ១ ០០០ដុល្លារ លេខ៤ Mekong Materials FC បាន៥០០ដុល្លារ និងមានប្រាក់លើកទឹកចិត្តសម្រាប់អ្នកចាំទីល្អ ក្រុមលេងល្អ អ្នកស៊ុតបញ្ចូលទីបានច្រើនជាងគេ ផងដែរ៕

ចុចអានអត្ថបទបន្ដ៖

កីឡាករនីហ្សេរីយ៉ាម្នាក់មកលេងក្រុមតូចដើម្បីឈានចូលលីគកម្ពុជា

FFC សម្រេចដាក់បាល់ទាត់ក្នុងសាលក្នុងសាលាតម្រង់ទិសកីឡា ២៥ ខេត្ត-ក្រុង

អត្ថបទ៖ មុន្នីរម្យ