Zaman ទទួលបានលិខិតមួយពីឯកឧត្ដម ហង់ ជួនណារ៉ុន ក្រោយជួយសាលាកំពុងខ្វះខាត

2017-07-12 10:26:30
ចំនួនមតិ 0 | ចំនួនចែករំលែក 0

ចន្លោះមិនឃើញ

សាលាអន្តរជាតិហ្សាម៉ាន់ (Zaman) បានទទួលចំណារថ្លែងអំណរគុណពីឯកឧត្ដមបណ្ឌិត ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ស្ដីអំពីសមិទ្ធផលនានា ដែលឧបត្ថម្ភដោយបុគ្គលិក សិស្ស និងមាតាបិតាសិស្ស នៃសាលា Zaman ក្នុងពិធីប្រគល់ និងទទួលសមិទ្ធផលរបស់ Zaman កាលពីថ្ងៃទី១៤ មិថុនា ២០១៧ នៅសាលាបឋមសិក្សាទួលស្នោរ។

មូលហេតុដែលឯកឧត្ដមបណ្ឌិត ហង់ ជួនណារ៉ុន ប្រគល់លិខិតនេះព្រោះ Zaman បានចូលរួមយ៉ាងសំខាន់ក្នុងការអភិវឌ្ឍវិស័យអប់រំនៅកម្ពុជា តាមរយៈការជួយ ជាសម្ភារៈសិក្សា ជួសជុលអាគារសិក្សា និងសាងសង់បង្គន់អនាម័យ ដល់សាលាដែលកំពុងជួបប្រទះការលំបាក និងកំពុងត្រូវការចាំបាច់សម្រាប់ដំណើរការសិក្សា។

សម្រាប់ថវិកាដែលបានបរិច្ចាគសម្រាប់ការងារមនុស្សធម៌នេះ គឺបានមកពីកម្មវិធីសប្ដាហ៍សប្បុរសធម៌ប្រចាំឆ្នាំនៅតាមសាខាសាលា Zaman និមួយៗ ដោយសិស្សបានបង្កើតគម្រោងសកម្មភាពផ្សេងៗគ្នាជាច្រើនក្រោមការជ្រោមជ្រែងពីបុគ្គលិក គ្រូ និងមាតាបិតាសិស្ស។

ក្នុងឱកាសចែកប័ណ្ណសរសើរក្រោមអធិបតីភាពលោក ហែម ស៊ីណារ៉េត ប្រធានមន្ទីរអប់រំយុវជន និងកីឡា រាជធានីភ្នំពេញ ដែលធ្វើឡើងកាលពីម្សិលមិញនៅមន្ទីរអប់រំ យុវជន និងកីឡា រាជធានីភ្នំពេញ Zaman បានទទួលប័ណ្ណសរសើរ ២ លើការងារគ្រប់គ្រង-រដ្ឋបាល បរិស្ថាន និងបច្ចេកទេសបង្រៀន និងរៀន ដោយប័ណ្ណសរសើរមួយសម្រាប់សាលាបឋមសិក្សា Zaman និងមួយទៀត សម្រាប់សាលាមធ្យមសិក្សា Zaman៕