ថ្មី! រថយន្តក្រុងសាធារណៈទំនើបបំផុត នឹងរត់លើផ្លូវជាតិលេខ ៤ ដល់កំពង់ស្ពឺ

2017-07-13 10:30:47
ចំនួនមតិ 0 | ចំនួនចែករំលែក 0

ចន្លោះមិនឃើញ

បើតាមការឱ្យដឹងពីឯកឧត្ដម ឃួន ស្រេង អភិបាលរាជធានីភ្នំពេញ បានឱ្យដឹងថា រថយន្តក្រុងសាធារណៈ ទំនើបបំផុតជាបច្ចេកវិទ្យាចុងក្រោយរបស់ប្រទេសចិន នឹងចាប់ផ្ដើមរត់លើផ្លូវជាតិលេខ ៤ ដល់ខេត្តកំពង់ស្ពឺ ក្នុងពេលខាងមុខនេះ។

ឯកឧត្ដម បានឱ្យដឹងទៀតថា រថយន្តក្រុងទាំង ៩៨គ្រឿង នឹងត្រូវរត់នៅលើផ្លូវថ្មីចំនួន ៥ខ្សែទៀតនៅភ្នំពេញ ប៉ុន្តែមិនទាន់កំណត់ផ្លូវណានៅឡើយនោះទេ គឺកំពុងសិក្សាឱ្យបានច្បាស់លាស់សិនថា ផ្លូវណាដែលកំពុងមានស្ថានភាពកកស្ទះខ្លាំង។ មិនត្រឹមតែប៉ុណ្ណោះរថយន្តទំនើបនេះ នឹងត្រូវរត់តាមបណ្ដាខេត្តដែរ ក្នុងនោះ កំពង់ស្ពឺ អាចចាប់ផ្ដើមមុនគេ។ ដោយឡែកខេត្តដទៃទៀតនឹងត្រូវសិក្សាឱ្យបានល្អិតល្អន់សិនថា គួរកំណត់ថ្លៃបែបណា ហើយរត់យ៉ាងដូចម្ដេចខ្លះ? បច្ចុប្បន្នគឺរត់ដល់តាខ្មៅ និងកំពង់ស្ពឺសិន។

គួរឱ្យដឹងដែរថា រថយន្តទាំង ១០០គ្រឿង ក្នុងនោះមានរថយន្តសម្រាប់ស្ទួច២គ្រឿង គឺជាជំនួយឥតសំណងរបស់ប្រទេសផ្ដល់មកកាន់កម្ពុជា ហើយទើបតែធ្វើពិធីទទួលនៅថ្ងៃនេះ នៅទីក្រុងកោះពេជ្រ។ អ្វីដែលពិសេសរថយន្តទាំងនោះ មានបំពាក់ដោយម៉ាស៊ីនត្រជាក់ កាមេរ៉ាសុវត្ថិភាព ទូរទស្សន៍ ប៊ូតុងសម្រាប់អ្នកជិះចុចនៅពេលចង់ឈប់ ទូរសុវត្ថិភាពដាក់លុយជាដើម។ តំណាងប្រទេសចិនម្នាក់ក៏បានឱ្យដឹងដែរថា រថយន្តទាំងនេះជាបច្ចេកវិទ្យាចុងក្រោយរបស់ ប្រទេសចិន ហើយកម្ពុជាជាប្រទេសទី១ ហើយដែលទទួលបានមុនគេបង្អស់។

អភិបាលរាជធានីភ្នំពេញ ក៏បានអំពាវនាវឱ្យបងប្អូនប្រជាពលរដ្ឋទាំងអស់ ងាកមកជិះរថយន្តក្រុងសាធារណៈជាជាងជិះយានយន្តផ្ទាល់ខ្លួន ដើម្បីកាត់បន្ថយការកកស្ទះក្នុងទីក្រុង ពីមុនរថយន្តនៅមានចំនួនតិចតួច និងមិនសូវទំនើប។ ដូច្នេះនៅពេលនេះមានរថយន្តទំនើបហើយ សង្ឃឹមមានការគាំទ្រកាន់តែច្រើន ពីសំណាក់បងប្អូនប្រជាពលរដ្ឋ៕

អត្ថបទ៖ វឌ្ឍនៈ