ទស្សនាភូមិអ្នកនេសាទ ល្បីមានទឹកថ្លាដូចកញ្ចក់

2017-07-14 08:39:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ភូមិអ្នកនេសាទក្រីក្រមួយនៅប្រទេសម៉ាឡេស៊ី ត្រូវគេមើលឃើញថា មានទឹកថ្លាដូចកញ្ចក់ធ្វើឲ្យអ្នកដំណើរទៅទស្សនាដល់ទីនោះហើយ តែងតែជាប់ចិត្តមិនចង់ត្រលប់មកវិញ។

អ្នកថតរូបសញ្ជាតិស្វីស លោក Claudio Sieber បានទៅដល់សហគមន៍ជនជាតិ Bajau ក្បែរទីក្រុង Semporna ប្រទេសម៉ាឡេស៊ី ដោយបានឃើញទិដ្ឋភាពផ្ទះឈើរបស់ប្រជានេសាទតូចៗសង់នៅលើផ្ទៃសមុទ្រដែលមានទឹកថ្លាឈ្វេងដ៏ធំល្វឹងល្វើយ ប្រៀបបាននឹងកញ្ចក់ក្បែរកូនកោះតូចៗ។

សហគមន៍ Bajau បានរួមបញ្ចូលជនជាតិភាគតិចជាច្រើនមកពីប្រទេសហ្វីលីពីន និងអាស៊ីអាគ្នេយ៍។ អ្នកភៀសខ្លួនពីហ្វីលីពីន គឺដោយសារកើតមានជម្លោះរវាងរដ្ឋាភិបាល និងក្រុមឧទ្ទាមមូស្លីមម៉ូរ៉ូ។

ផ្ទះរបស់ពួកគេសង់តូចៗពីឈើមិនមានភាពរឹងមាំឡើយ។ មូលហេតុដែលមិនសង់ផ្ទះលើដីគោក ព្រោះពួកគេមិនមានសិទ្ធិជាពលរដ្ឋម៉ាឡេស៊ី ហើយកូនៗក៏មិនអាចចូលរៀនបានដែរ។ ពួកគេបានត្រឹមតែរៀនមុជទឹក នេសាទ បរបាញ់សត្វ និងសុំរបស់របរបន្តិចបន្តួចពីភ្ញៀវទេសចរ។

មុខរបរប្រចាំថ្ងៃ គឺពួកគេចេញនេសាទនៅពេលព្រឹកក្បែរៗកោះ និងត្រលប់ចូលផ្ទះវិញរៀបចំអាហារនាពេលល្ងាច៕ តោះទៅទស្សនាទិដ្ឋភាពដូចខាងក្រោម៖