កម្រងសៀវភៅរឿងផ្តល់ភាពអង់អាចដល់ក្មេងស្រី ឥឡូវនេះ អាចរកបានពីកម្មវិធីតោះអាន!
- 2017-07-15 07:53:42
- ចំនួនមតិ 0 | ចំនួនចែករំលែក 0
កម្រងសៀវភៅរឿងផ្តល់ភាពអង់អាចដល់ក្មេងស្រី ឥឡូវនេះ អាចរកបានពីកម្មវិធីតោះអាន!
ចន្លោះមិនឃើញ
កាលពីពេលថ្មីៗនេះ គំនិតផ្តួចផ្តើម តោះអាន! នៃមូលនិធិអាស៊ី ទើបតែបានបញ្ចេញសៀវភៅសម្រាប់កុមារពោរពេញដោយរូបភាពរស់រវើកចំនួន ៨ ក្បាលបន្ថែមទៀត ក្រោមប្រធានបទ “ក្មេងស្រីអាចធ្វើអ្វីក៏បាន”។ តួអង្គនាំមុខសំខាន់ក្នុងសៀវភៅជាភាសាខ្មែរទាំងនេះ គឺតួអង្គស្រីដែលពោរពេញដោយភាពរឹងមាំ ហ៊ានជម្នះឧបសគ្គគ្រប់បែបយ៉ាង ប្រកបដោយភាពក្លាហាន និងភាពប៉ិនប្រសប់។
ក្នុងសាច់រឿងទាំងនេះ តួអង្គស្រីគឺជាអ្នកបើកយានអវកាសដើម្បីជួយសង្គ្រោះភូមិរបស់នាង រារាំងមនុស្សពិភពក្រៅមិនឲ្យសាងសង់ទីក្រុងដែកលើកោះដ៏ស្រស់ស្អាត រៀបចំគម្រោងការបន្លាចចាបចិត្តកំណាចឲ្យហើរចេញទៅឆ្ងាយ និងដើរដំណើរផ្សងព្រេងផ្សេងទៀត។
អ្នកនិពន្ធ អ្នកគូររូបភាព និងអ្នករចនាក្រាហ្វិកជាជនជាតិខ្មែរ ដែលមានសាវតារចម្រុះ បានចូលរួមសហការគ្នាក្នុងព្រឹត្តិការណ៍ “ហាក់កាសន” ផលិតសៀវភៅរឿង រយៈពេលមួយថ្ងៃ ដើម្បីបង្កើតរឿងជាមួយនឹងស្នាដៃគំនូរដើម។ ក្រៅពីលើកទឹកចិត្តឲ្យមានការបង្កើតសៀវភៅរឿងកុមារដែលមានគុណភាពខ្ពស់ គម្រោងនេះក៏មានគោលបំណងបណ្ដុះ និងផ្ដល់ការលើកទឹកចិត្តដល់អ្នកដែលមានជំនាញផលិតសៀវភៅសម្រាប់កុមារផងដែរ។
ក្រុមហ៊ុន Smart Axiata ដែលជាអ្នកឧបត្ថម្ភធំសម្រាប់គម្រោង តោះអាន! នេះ បានផ្ដល់រង្វាន់ជាទូរសព្ទស្មាតហ្វូន ដល់អ្នកដែលចូលរួមក្នុងកម្មវិធី ហាក់កាសន នេះ ដោយបែងចែកជាប្រភេទដូចតទៅ៖ ក្រុមការងារ ហាក់កាសន ឆ្នើមបំផុត អ្នកគូររូបឆ្នើមបំផុត អ្នកនិពន្ធឆ្នើមបំផុត និងអ្នកដែលផ្ដល់គំរូភាពប្រចាំថ្ងៃ។
សៀវភៅទាំងនេះមានសម្រាប់ដោនឡូតដោយមិនគិតថ្លៃពីគេហទំព័រតោះអាន! សៀវភៅអេឡិចត្រូនិកជាភាសាខ្មែរ គ្រូកម្ពុជា OER កម្ពុជា និងបណ្ណាល័យឌីជីថលផ្សេងទៀត។ សៀវភៅទាំងនេះប្រើប្រាស់អាជ្ញាប័ណ្ណប្រភេទ non-commercial Creative Commons មិនសម្រាប់គោលបំណងពាណិជ្ជកម្ម មានន័យថា គ្រប់គ្នាអាចយកខ្លឹមសារសៀវភៅទាំងនេះទៅកែសម្រួល ឬប្រើប្រាស់ឡើងវិញបាន។
លោក ថូម៉ាស ហ៊ុន នាយកប្រតិបត្តិក្រុមហ៊ុនទូរសព្ទចល័ត Smart Axiata បានចូលរួមអបអរសាទរ មូលនិធិអាស៊ី និងជយលាភីទាំងអស់ ក្នុងការបញ្ចប់សៀវភៅអេឡិចត្រូនិកចុងក្រោយនេះ។ “ក្នុងនាមជាដៃគូចម្បងនៃកម្មវិធី យើងមានមោទនភាពខ្លាំងណាស់ចំពោះអ្នកនិពន្ធកម្ពុជា វិចិត្រករ និង អ្នករចនា ដែលបានចូលរួមបង្កើតសៀវភៅអេឡិចត្រូនិកទាំងអស់នេះ ដែលនឹងត្រូវដាក់ឲ្យប្រើប្រាស់ដោយសេរីលើបណ្ណាល័យឌីជីថលជាច្រើន។ ក្រុមហ៊ុន Smart ជឿជាក់ថា ប្រព័ន្ធឌីជីថល គឺជាអនាគត! ខ្ញុំសង្ឃឹមថា សៀវភៅអេឡិចត្រូនិកទាំងអស់នេះ និង សៀវភៅដែលបង្កើតឡើងនៅថ្ងៃខាងមុខ ក្រោមប្រធានបទដ៏មានឥទ្ធិពល នឹងជំរុញទឹកចិត្តអ្នកអានកម្ពុជា និង អ្នកអភិវឌ្ឍន៍ជាច្រើនទៀតឲ្យចូលរួមក្នុងកិច្ចផ្ដួចផ្ដើមនេះ។”
គំនិតផ្ដួចផ្ដើមតោះអាន! ជាគម្រោងដែលផលិតសៀវភៅប្រកបដោយគុណភាពខ្ពស់ សម្រាប់ឲ្យកុមារអាននៅគ្រប់ពេល គ្រប់ទីកន្លែងជាភាសាដែលពួកគេប្រើប្រាស់ក្នុងផ្ទះ និងក្នុងសាលារៀន។ វេទិកាក្នុងទម្រង់ឌីជីថល និងឧបករណ៍ដែលងាយស្រួលប្រើប្រាស់ ផ្តល់លទ្ធភាពឲ្យសហគមន៍អាចបង្កើតបណ្ណាល័យរបស់ខ្លួនយ៉ាងមានប្រសិទ្ធភាព អស់ថវិកាតិច និងមានការចូលរួមយ៉ាងទូលំទូលាយ។ សូមអានព័ត៌មានបន្ថែមអំពីគំនិតផ្ដួចផ្ដើមតោះអាន!
ចាប់តាំងពីឆ្នាំ ១៩៥៤ មក កម្មវិធីសៀវភៅសម្រាប់អាស៊ីរបស់មូលនិធិអាស៊ី បានផ្ដល់អំណោយជាសៀវភៅបោះពុម្ពដល់គ្រឹះស្ថានអប់រំរាប់ពាន់កន្លែង ដែលជួបការខ្វះខាតសៀវភៅ ក្នុងប្រទេសចំនួន ២១ នៅអាស៊ី ជារៀងរាល់ឆ្នាំ។ ខណៈពេលដែលសៀវភៅបោះពុម្ពនៅតែជាមធ្យោបាយដ៏មានប្រសិទ្ធភាពបំផុត ក្នុងការផ្ដល់ព័ត៌មាន នៅតាមប្រទេសកំពុងអភិវឌ្ឍជាច្រើន ដោយសារតែបច្ចេកវិទ្យាទូរស័ព្ទចល័តកាន់តែមានតម្លៃសមរម្យមានន័យថា សៀវភៅអេឡិចត្រូនិកនឹងក្លាយជាមធ្យោបាយដែលចំណាយអស់តិច មានប្រសិទ្ធភាពខ្ពស់ និងអាចពង្រីកទៅកន្លែងផ្សេងទៀតបាន។សូមអានបន្ថែមពីការងាររបស់មូលនិធិអាស៊ី។