"War for the Planet of Apes" បំបាក់ Spider-Man ក្នុងសប្ដាហ៍ដំបូង

2017-07-17 04:09:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីចាប់ដាក់បញ្ចាំងនៅសប្ដាហ៍នេះភាពយន្តរឿង "War for the Planet of Apes” រកប្រាក់ចំណូលបាន ៥៦.៥លានដុល្លារ តែក្នុងរយៈពេល៣ថ្ងៃតែប៉ុណ្ណោះ ធ្វើឲ្យរឿងនេះជាប់ចំណាត់លេខ១ជារឿងដែលរកចំណូលបានច្រើនជាងគេប្រចាំសប្ដាហ៍នៅសហរដ្ឋអាមេរិក។

Poster សម្រាប់រឿង "War for the Planet of Apes"

រឿងនេះគឺជារឿងទី៣ហើយសម្រាប់ខ្សែរឿង “Planet of the Apes” ដែលរឿងទី១របស់ខ្សែរឿងនេះគឺរឿង "Rise of the Panet of the Apes” រកចំណូលបាន ៥៤.៨សម្រាប់សប្ដាហ៍ទី១ និងរឿងទី២ "Dawn of the Planet of the Apes” រកចំណូលបាន ៧២.៦លានដុល្លារសម្រាប់សប្ដាហ៍ទី១។

មិនត្រឹមតែប៉ុណ្ណោះរឿងនេះអាចចាត់ទុកថាជារឿងមួយដែលជោគជ័យសម្រាប់ផលិតកម្ម "Fox” ដោយអាចរកចំណូលបានដល់ទៅ ១០២.៥លានដុល្លារឯណោះ។ ដូច្នេះបើបូកសរុបចំណូលរឿងនេះទូទាំងពិភពលោកគឺអាចរកចំណូលបាន ១៧៥.១លានដុល្លារឯណោះសម្រាប់ចុងសប្ដាហ៍ដំបូង។

នេះអាចជារឿងដ៏គួរឲ្យភ្ញាក់ផ្អើលសម្រាប់អ្នកស្នេហាវិស័យភាពយន្តព្រោះរឿងនេះត្រូវប្រកួតប្រជែង នឹងរឿង "Spider-Man: Homecoming” ដែលជារឿងដ៏ល្បីមួយ ប៉ុន្តែអាចយកឈ្នះបានដោយសប្ដាហ៍នេះ Spider-Man អាចរកចំណូលបានតែ ៤៥.២លានដុល្លារតែប៉ុណ្ណោះគឺថយចុះ ៦១ភាគរយបើប្រៀបធៀបនឹងសប្ដាហ៍មុន សរុបទៅគឺរកចំណូលបាន ២០៨.២លានដុល្លារនៅសហរដ្ឋអាមេរិក។

សម្រាប់ចំណាត់ថ្នាក់លេខ៣គឺរឿង "Despicable Me 3” អាចរកចំណូលបាន ១៨.៩លានដុល្លារជាមួយនឹងចំណូលសរុប ១៨៧.៩លានដុល្លារ។ ចំណែកឯរឿងដែលរកចំណូលបានចំណាត់ថ្នាក់លេខ៤គឺរឿង “Baby Driver” ដែលរកចំណូលបាន ៨.៧លានដុល្លារសម្រាប់សប្ដាហ៍ទី៣ ចំណូលសរុប៧៣.១លានដុល្លារ។ រឿងដែលបានចំណាត់ថ្នាក់លេខ៥គឺរឿង "The Big Sick” ដែលរកចំណូលបាន ៧.៦លានដុល្លារ។