ជយលាភីមេដាយមាស មិនហ៊ានគិតដល់ ក្រោយឈ្នះពាន ICT Award 2017

2017-07-23 05:41:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុម DirexPlay ដែលបានយកស្នាដៃផលិតហ្គេម JAILBREAK The Game ទៅប្រកួតប្រជែងក្នុងកម្មវិធី ICT Award 2017 មិនហ៊ានគិតដល់ ក្រោយពេលគណៈកម្មការប្រកាសគម្រោងរបស់ពួកគេជាប់ជាជយលាភីមេដាយមាសឈ្នះអស់គម្រោងដទៃទៀតដែលចូលរួមប្រកួតប្រជែង។

លោក ឈួម ពិសិដ្ឋ ប្រធានក្រុម DirexPlay មុនពេលប្រកាសលទ្ធផលប្រាប់ Sabay ថា លោកមិនសង្ឃឹមច្រើនទេ សម្រាប់ការប្រជែងនេះ។ ប៉ុន្តែស្រាប់តែលទ្ធផលប្រកាសមក ធ្វើឲ្យសមាជិកក្រុមទាំងមូលភ្ញាក់ផ្អើលតែម្តង។

Cambodia ICT Award ឆ្នាំ ២០១៧ ជាពានរង្វាន់ថ្នាក់ជាតិលើកទី ៣ ដែលរៀបចំឡើងក្រសួងប្រៃសណីយ៍និងទូរគមនាគមន៍ ដើម្បីជម្រុញលើកទឹកចិត្តដល់សិស្សនិស្សិត បណ្ដាក្រុមហ៊ុនឯកជន និងស្ថាប័នពាក់ព័ន្ធដែលមានផលិតផលនិងសេវាកម្មនៃគំនិតបង្កើតថ្មីលើវិស័យបច្ចេកវិទ្យា អាចចូលរួមដាក់ពាក្យប្រកួតប្រជែងគ្នាដើម្បីដណ្ដើមយកពានរង្វាន់ និងជួយលើកកម្ពស់អភិវឌ្ឍវិស័យ ICT នៅកម្ពុជា។

ការប្រកួតឆ្នាំនេះ មានគម្រោងចំនួន ៣៧ ចូលរួមប្រកួតប្រជែង ដោយចែកចេញជាប្រភេទពានរង្វាន់ និងវិញ្ញាសាប្រកួតខុសៗគ្នាចំនួន ០៦។ មានវិស័យសាធារណៈ, វិស័យឯកជន, ការរួមចំណែកទទួលខុសត្រូវក្នុងសង្គម, មាតិកាឌីជីថល (Digital Content), ការបង្កើតធុរកិច្ច និងការស្រាវជ្រាវ និងការអភិវឌ្ឍន៍។

ជាលទ្ធផល ជយលាភីមេដាយមាសបានលើក្រុម DirexPlay ដែលបង្កើតគម្រោង Jailbreak The Game, មេដាយប្រាក់បានលើវិទ្យាស្ថានបើកទូលាយ (Open Institute) ដែលបង្កើតគម្រោង Bong Pheak និងមេដាយសំរិទ្ធិបានលើគម្រោងប្រព័ន្ធចុះបញ្ជីរថយន្តស្វ័យប្រវត្តិរបស់ក្រសួងសាធារណការនិងដឹកជញ្ជូន។

សម្រាប់រង្វាន់មេដាយមាសទទួលបានទឹកប្រាក់ ១០ ០០០ ដុល្លារ, មេដាយប្រាក់ទទួលបានទឹកប្រាក់ ៣ ០០០ ដុល្លារ និងមេដាយសំរិទ្ធិទទួលបានប្រាក់រង្វាន់ ១ ០០០ ដុល្លារ។

ក្រៅពីជយលាភីប្រចាំកម្មវិធី ក៏មានពានរង្វាន់ល្អបំផុតប្រចាំផ្នែកនីមួយៗផងដែរ។

គួរបញ្ជាក់ថា JAILBREAK The game ជាហ្គេមទូរសព្ទផ្លូវការមួយដែលបានរចនាឡើងបន្ទាប់ពីខ្សែភាពយន្តខ្មែរមានចំណងជើងថា Jailbreak។

វាជាហ្គេមសកម្មមួយដែលមាននៅលើប្រព័ន្ធប្រតិបត្តិការ iOS និង Android ហើយត្រូវបានអភិវឌ្ឍន៍នៅប្រទេសកម្ពុជា ដោយអ្នកអភិវឌ្ឍជាជនជាតិខ្មែរ ក្នុងភាពជាដៃគូជាមួយផលិតករខ្សែភាពយន្ត។ គិតត្រឹមរយៈពេល ៤៨ ម៉ោងបន្ទាប់ពីការដាក់បង្ហាញ ហ្គេមនេះទទួលបានការដោនឡូតរហូតដល់ ២០K ហើយបច្ចុប្បន្នមានអ្នកលេងហ្គេមនេះជាង 104k។

អត្ថបទ៖ ប៊ុណ្ណារ៉ា