ច្រឡំស្មានតែគេស្រឡាញ់
- 2017-07-25 01:29:25
- ចំនួនមតិ 0 | ចំនួនចែករំលែក 0
ច្រឡំស្មានតែគេស្រឡាញ់
ចន្លោះមិនឃើញ
ធ្លាប់ទេដែលតែងមានអារម្មណ៍ថា រំភើបពេលឃើញគេផ្ញើសារមក? ធ្លាប់ទេដែលតែងតែរង់ចាំ Missed Call គេ? ធ្លាប់ទេដែលតែងចង់ឱ្យគេហៅទៅញាំនេះញ៉ាំនោះជាមួយគេ? ធ្លាប់ទេតែងមួម៉ៅក្ដៅក្រហាយពេលឃើញគេនៅក្បែរអ្នកដទៃ?
គិតសព្វៗទៅ ហេតុអ្វីបានជាខ្ញុំឆ្កួតយ៉ាងនេះ ហើយក៏មិនដឹងថា មនុស្សប៉ុន្មាននាក់ដូចខ្ញុំ? ឫមួយមានតែខ្ញុំទេនៅលើលោកនេះ? ខ្ញុំបាក់ចិត្តស្រឡាញ់មនុស្សម្នាក់ខ្លាំង ហើយតែងស្រមៃថា មានគេនៅក្បែរ តែងស្រមៃថា គេថ្នាក់ថ្នម រហូតពេលខ្លះស្រមៃបានថើបគេទៀតផង។ តាំងខ្លួនធ្វើជាសង្សារគេ ទាំងគេមិនដែលនិយាយថា ស្រឡាញ់សូម្បីមួយម៉ាត់ តែងគិតថា រាល់ទង្វើដែលគេធ្វើដាក់មកលើខ្លួន ជាក្ដីស្រឡាញ់ក្នុងន័យស្នេហា ទាំងការពិតដឹងហើយថា គេមិនអាចស្រឡាញ់យើងបានទេ តែនៅតែកុហកខ្លួនឯង។
ពេលខ្លះខ្ញុំលួចអន់ចិត្តសូម្បីតែគេថតរូបបង្ហោះជាមួយអ្នកផ្សេង ហើយធ្វើមិននិយាយរកគេ មិនឆាតទៅគេ ដើម្បីឱ្យគេចាប់អារម្មណ៍ តែចុងក្រោយគេគ្មានខ្វល់អីបន្តិច បែរជាឆាតទៅរកគេមុនធ្វើដូចគ្មានរឿងអី ដែលការពិតកំពុងតែខឹងគេខ្លាំង។ នេះមកពីខ្លាចបាត់បង់គេ ទើបបានជាទៅទ្រគេ តាំងចិត្តថា ឈប់ទាក់ទងគេ មិនបានប៉ុន្មានថ្ងៃផង ក៏ទៅរកគេមុន សឹងក្លាយជាទម្លាប់ទៅហើយ ហឹមម...តើធ្វើចឹងដើម្បីអ្វី? បានអីមកវិញ? តើម្នាក់ហ្នឹងមានអីអស្ចារ្យបានជាយើងទៅទ្រគេបែបនេះ?
តែងលួចស្រមៃថា ថ្ងៃណាមួយនឹងមានឱកាសបាននៅជាមួយគេតែ ២នាក់ ហើយគេកាន់ដៃខ្ញុំយ៉ាងណែនហើយប្រាប់ថា ខ្ញុំស្រឡាញ់អ្នក តែគ្រាន់ជាក្ដីស្រមៃគ្មានថ្ងៃក្លាយជាការពិតនោះទេ។ នៅចាំបានថា ពេលដែលខ្ញុំសម្រេចចិត្ត Block គេចោលនៅពេលដែលខ្ញុំឃើញគេបង្ហោះ ថាគេរកឃើញមនុស្សដែលគេស្រឡាញ់ហើយ ចំណែកខ្ញុំស្មានតែជាខ្លួនឯងខំរំភើបចិត្ត តែពេលមើលក្នុង Comment ទើបដឹងថាម្នាក់នោះជាអ្នកផ្សេងមិនមែនខ្ញុំឡើយ។ ពេលនោះ ជាពេលដែលខ្ញុំឈឺចាប់បំផុត លួចស្រក់ទឹកភ្នែកខឹងចិត្តខ្លួនឯង ហេតុអ្វីអំពើល្អរបស់យើងជាច្រើនរាប់មិនអស់នៅតែមិនអាចធ្វើឱ្យគេស្រឡាញ់បាន?
Block គេចោលជាង១ខែ គេគ្មានដែលអើពើសួរនាំអីបន្តិច ដូច្នេះមានន័យថា ខ្ញុំមិនធ្លាប់ជាមនុស្សសំខាន់របស់គេសូម្បីម្ដង ហើយកន្លងមកគេមកក្បែរយើង ក៏ព្រោះតែគេត្រូវការឱ្យយើងជួយប៉ុណ្ណោះ។ តើហេតុអ្វីឱ្យតែនឹកដល់ឈ្មោះគេ ខ្ញុំឈឺចាប់ ខ្ញុំនឹកគេខ្លាំងម្ល៉េះ? ឫមួយមកពីខ្ញុំខុសខ្លួនឯង ដែលយល់ច្រឡំលើគេ? ហេតុអ្វីបានជាខ្ញុំធ្វើមិត្តជាមួយគេមិនបាន? យ៉ាងណាក៏ដោយ គ្រប់យ៉ាងបានចប់អស់ហើយ គេក៏មានមនុស្សដែលគេស្រឡាញ់ ចំណែកយើងក៏បានផ្ដាច់ទំនាក់ទំនងពីគេហើយ តែខ្ញុំចង់ប្រាប់ថា ខ្ញុំស្រឡាញ់អ្នក បើសិនជាអាចមានអព្ភូតហេតុ អាចផ្លាស់ប្ដូរចិត្តអ្នក ខ្ញុំនៅតែចង់ធ្វើជាសង្សាររបស់អ្នកជានិច្ច៕
ប្រសិនបើមានរឿងរ៉ាវចង់ចែករំលែកសូមទាក់មកកាន់ក្រុមការងារសប្បាយតាមរយៈលេខ ០១៥ ៨២ ៨៥ ៩៥ ឫ thor.chanreth@Sabay.com សូមអានអត្ថបទ មនុស្សដែលខ្ញុំចងចាំ ដើម្បីដឹងពីរបៀបសរសេរផ្សេងៗគ្នា!
អរគុណបងសប្បាយ!
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
