IMF គាំទ្ររដ្ឋាភិបាលកម្ពុជា លើកស្ទួយ ការប្រើប្រាស់លុយរៀល

2017-07-26 08:14:59
ចំនួនមតិ 0 | ចំនួនចែករំលែក 0

ចន្លោះមិនឃើញ

សេដ្ឋវិទូមកពីមូលនិធិរូបិយវត្ថុអន្តរជាតិ (IMF) កាលពីថ្ងៃអង្គារបានស្វាគមន៍ចំណាត់ការរបស់រដ្ឋាភិបាលកម្ពុជា ដែលលើកកម្ពស់ឲ្យមានការប្រើប្រាស់រូបិយវត្ថុក្នុងស្រុកកាន់តែច្រើនជាងមុន ដើម្បីជួយបង្កើនភាពរឹងមាំសេដ្ឋកិច្ច។

ថ្លែងក្នុងសន្និសីទសារព័ត៌មានបន្ទាប់ពីទស្សនកិច្ច ២ សប្ដាហ៍ នៅកម្ពុជា (IMF) ក៏បានជំរុញឲ្យមានការអភិវឌ្ឍទីផ្សារហិរញ្ញវត្ថុបន្ថែមដែរ និងពន្លឿនកំណែទម្រង់។

ការផ្លាស់ប្ដូរផ្នត់គំនិត ជារឿងសំខាន់ ធ្វើឲ្យ «ប្រាក់រៀល» មានតម្លៃ

ក្រសួងពាណិជ្ជកម្មបានចេញសេចក្ដីប្រកាសមួយកាលពីថ្ងៃទី ២០ ខែកក្កដា តម្រូវឱ្យអាជីវកម្មទាំងអស់ដាក់ស្លាកតម្លៃលើផលិតផល និងសេវាកម្មរបស់ពួកគេជាប្រាក់រៀលដើម្បីបង្កើនតម្លាភាពសម្រាប់អ្នកប្រើប្រាស់ និងបង្កើនការប្រើប្រាស់រូបិយប័ណ្ណក្នុងស្រុក។

យោងតាមធនាគារជាតិបច្ចុប្បន្ននេះ ចរាចរប្រាក់ដុល្លារអាមេរិកមានប្រហែល ៨៣% នៃរូបិយប័ណ្ណដែលប្រើនៅក្នុងសេដ្ឋកិច្ចរបស់កម្ពុជា។

លោក Jarkko Turunen ដែលជាប្រធានក្រុម IMF នៅកម្ពុជាបានអះអាងថា អាជ្ញាធរបានចាត់វិធានការដើម្បីលើកកម្ពស់ការប្រើប្រាស់លុយរៀល រួមមានតម្រូវឱ្យមានចំនួន១០% យ៉ាងតិចក្នុងប្រាក់កម្ចីនានា។

លោក Jarkko Turunen ក៏បានជំរុញអោយមានវិធានការបន្ថែមទៀតដូចជាអភិវឌ្ឍអន្តរធនគារ មូលប័ត្ររដ្ឋាភិបាល និងអភិវឌ្ឍទីផ្សារប្ដូរប្រាក់បរទេស ដែលចាំបាច់ដើម្បីលើកទឹកចិត្តដល់ការប្រើប្រាស់ប្រាក់រៀល។

លោក Jarkko Turunen ក៏បាននិយាយថា សេដ្ឋកិច្ចកម្ពុជានឹងមានកំណើនប្រហែល ៧% នៅឆ្នាំនេះនិង ឆ្នាំក្រោយ៕

អត្ថបទ៖ ជ័យ ជំនោរ