មាស ចាន់ណា ថា ណាហ្គា បើមានសំណាងមិនមែនស្មើបឹងកេតទេ

2017-07-31 02:01:36
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក មាស ចាន់ណា គ្រូបង្វឹកក្រុមណាហ្គាវើល លើកឡើងថា ការលេងស្មើបឹងកេត ១-១ មកពីក្រុមរបស់ខ្លួនខ្វះសំណាង សម្រាប់ការប្រកួតលីគកំពូលកម្ពុជាសប្ដាហ៍ទី១៤ នៅពហុកីឡដ្ឋានជាតិ។

លោក មាស ចាន់ណា

ការប្រកួតរវាង ណាហ្គាវើល និងបឹងកេតបញ្ចប់ត្រឹមលទ្ធផល ១-១។ គ្រាប់បាល់ទី១ បឹងកេងធ្វើការនាំមុខមុនដោយការទាត់បាល់ពិន័យ១១ម៉ែត្រដោយខ្សែបម្រើ Maycon នៅចុងវគ្គទី១ ខណៈមួយគ្រាប់របស់ ណាហ្គាវើល រកបានដោយខ្សែប្រយុទ្ធ Kipson ដោយការទាត់បាល់ពិន័យ១១ម៉ែត្រដូចគ្នានៅចុងវគ្គទី២។

ក្រោយប្រកួតចប់លោក មាស ចាន់ណា បានឲ្យដឹងថា កូនក្រុមរបស់លោកពិតជាធ្វើបានល្អ ទោះមិនអាចរកជ័យជម្នះបានក៏ដោយ យ៉ាងហោចណាស់ក៏អាចជួយក្រុមដណ្ដើមបាន១ពិន្ទុពីបឹងកេត។ លោកគិតថា ប្រកួតនេះប្រសិនបើ ណាហ្គា មានសំណាងប្រហែលជាអាចឈ្នះ ពីព្រោះឱកាសមានច្រើនមែនទែន។

លោកបន្ថែមថា បឹងកេតលេងដោយមានភាពមោះមុតចង់ឈ្នះការប្រកួត ដោយសារពួកគេចង់ដណ្ដើមតំណែងឡើងមក Top 4 ។ ទោះជាយ៉ាងណាលោកពិតជាសប្បាយចិត្ត ដែលកូនក្រុមទាំងអស់លេងតាមការគ្រោងទុក ដោយលេចចេញនូវទម្រង់ដ៏ល្អមួយ។

បច្ចុប្បន្ន ណាហ្គាវើល ស្ថិតនៅលេខ ៣ក្នុងតារាងលីគកំពូលកម្ពុជា ដោយមាន ២៦ ពិន្ទុក្នុងចំណោមការប្រកួត ១៤លើក។ ខណៈ បឹងកេត ស្ថិតនៅលេខ ៥ ដោយមាន ២៤ពិន្ទុក្នុងចំណោមការប្រកួត ១៤លើកដូចគ្នា៕