ទើបអាយុ ១ខួបទេ តែ PaoPao អាចរកលុយជូនមូលនិធិសប្បុរសធម៌រាប់ម៉ឺនដុល្លារ

2017-07-31 23:39:15
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធីសប្បុរសធម៌មួយបានបង្កើតឡើងដើម្បីប្រមូលមូលនិធិជួយកុមារជាច្រើននាក់ ដែលមកព្យាបាលនៅមន្ទីរពេទ្យ និងខ្វះខាតក្នុងការព្យាបាលជំងឺ។

“Hug of Hope” គឺជាកម្មវិធីសប្បុរសធម៌ រៀបចំឡើងដោយមូលនិធិមន្ទីរពេទ្យដើម្បីជួយកុមារ នៅមជ្ឈមណ្ឌលពាណិជ្ជកម្មដ៏ធំមួយក្នុងប្រទេសថៃ ២ថ្ងៃជាប់គ្នា គឺកាលពីថ្ងៃ២៩ និង ៣០ ខែកក្កដា សប្ដាហ៍មុន។ គោលបំណងរបស់កម្មវិធីនេះ គឺដើម្បីប្រមូលថវិកាជួយកុមារៗមានជំងឺទាំងឡាយ ដែលមកសម្រាកព្យាបាលក្នុងមន្ទីរពេទ្យ។

ជាកាយវិការមនុស្សធម៌ដ៏អស្ចារ្យមួយ ដែលកុមារីតូចទើបមានអាយុ ១ខួប ប៉ុន្តែបានចូលរួមជាតួអង្គសំខាន់ម្នាក់ក្នុងកម្មវិធីនេះ។ អ្នកចូលរួម បើសិនចង់ឱបក្មេងតូច PaoPao ពួកគេត្រូវដេញថ្លៃ ដើម្បីមានឱកាសឱបក្មេងស្រីដ៏គួរឲ្យស្រលាញ់រូបនេះ។

ដោយឡែក ថវិកាដែលប្រមូលបាន ក្នុងថ្ងៃទី ១ គឺបានចំនួន ៤៥០ ០០០ បាត (ប្រមាណជាង ១៣ ៥០០ដុល្លារ) និងថ្ងៃទី ២បានចំនួន ៥០០ ០០បាត (ប្រមាណជាង ១៥ ០០០ដុល្លារ)។ ដូចនេះសរុបថវិកាដែលប្រមូលបាន ទាំង ២ថ្ងៃ គឺមានចំនួន ៩៥០ ០០០បាត (ប្រមាណជាង ២៨ ៥០០ដុល្លារ)។

តារាស្រី Gubgib ក្នុងនាមជាម្ដាយបាននិយាយថា ខ្លួនចង់បង្រៀនកូន ឲ្យចេះលះបង់ និងចេះចែករំលែកក្ដីស្រលាញ់ជាមួយមិត្តភ័ក្ដិជុំវិញពិភពលោក ហើយនាងផ្ទាល់តែងបណ្ដុះកូនពីតូចទៅ ដើម្បីឲ្យក្មេងធ្លាប់ជាមួយសុជីវធម៌នេះ៕

ចុចអាន៖

ប្រភព៖ posttoday ប្រែសម្រួល៖ យី សុធារី