នឹកស្មានមិនដល់! ហេតុការណ៍ចម្លែកកើតលើតួអង្គហ្លួងព្រះស្ដេចកន

2017-08-03 07:53:04
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅព្រឹកមិញនេះទូរទស្សន៍ PNN បានធ្វើសន្និសីទសារព័ត៌មានស្ដីអំពីខ្សែភាពយន្តប្រវត្តិសាស្ត្រខ្មែររឿង "ហ្លួងព្រះស្ដេចកន" នៅស្ថានីយទូរទស្សន៍PNN ផ្ទាល់តែម្ដង។ ក្នុងកម្មវិធីនេះដែរលោក រស់ សោភ័ណ ដែលជាតួអង្គស្ដេចកនបានលើកឡើងថា ខ្លួនបានយល់សុបិនឃើញស្ដេចកនមកលេងព្រមទាំងបបួលទទួលទានអាហារជាមួយគ្នា។

តួអង្គហ្លួងព្រះស្ដេចកនរូបនេះបន្ថែមថា៖"ខ្ញុំមានការណ៍មួយចម្លែកក្រោយពេលថតរឿង "ហ្លួងព្រះស្ដេចកន" ព្រោះខ្ញុំបានយល់សប្ដិឃើញ ស្ដេចកនបានមកបបួលខ្ញុំញ៉ាំបាយជុំគ្នា និងដើរលេងជុំវិញផ្ទះ។ រឿងនេះនិយាយទៅមិនគួរឲ្យជឿខ្ញុំមិនដែលស្គាល់គាត់ថាមានមុខមាត់យ៉ាងម៉េចផង បែរជាយល់សប្ដិឃើញគាត់ ខ្ញុំអត់សូវចំណាំមុខគាត់ទេ តែបើកម្ពស់ខ្ញុំចាំគាត់មានរាងខ្ពស់ហើយមាឌក្រអាញ"។

សន្និសីទសារព័ត៌មាននេះដែរឯកឧត្ដម ម៉ៅ អាយុទ្ធ ដែលជាផលិតករ និងជាអ្នកដឹកនាំរឿង "ហ្លួងព្រះស្ដេចកន" បានថ្លែងថា លោកសំណូមពរ ឲ្យប្រជាពលរដ្ឋខ្មែរ ជាពិសេសយុវវ័យ គួរតែចូលទស្សនាខ្សែភាពយន្តរឿង "ហ្លួងព្រះស្ដេចកន" ដែលជាភាពយន្តប្រវត្តិសាស្ត្ររបស់ខ្មែរ។ ឯកឧត្ដមក៏បានបញ្ជាក់ដែរថា ការចូលរួមទស្សនាពីបងប្អូនប្រជាពលរដ្ឋខ្មែរ ជាផ្នែកមួយមួយដែលជួយលើកស្ទួយភាពយន្តខ្មែរឲ្យកាន់តែល្បីល្បាញ និងជាការលើកទឹកចិត្តដល់ផលិតករខ្មែរ ក្នុងការផលិតរឿងឲ្យកាន់តែល្អថែមទៀត។

“ខ្ញុំសង្ឃឹមថា នឹងទទួលបានការគាំទ្រច្រើន ពីទស្សនិកជនបន្ទាប់ពីចាកបញ្ចាំង នៅតាមបណ្ដារោងភាពយន្តនានា ដោយសារតែខ្សែភាពយន្តនេះ បង្ហាញពីប្រវត្តិសាស្ត្រខ្មែរយើង ព្រមទាំងបានចំណាយទុនដល់លានដុល្លារ។ ហើយបើតាមការស្ទាបស្ទង បន្ទាប់ពីចាកបញ្ចាំងឈុតឆាកខ្លីៗ នៅលើកញ្ចក់ទូរទស្សន៍PNN និងហ្វេសប៊ុក មកឃើញថា មានប្រិយមិត្តជាច្រើនបានបង្ហាញនៅភាពសប្បាយរីករាយ និងទន្ទឹងរង់ចាំទស្សនាដល់ថ្ងៃចាក់បញ្ចាំង"។ នេះបើតាមឯកឧត្ដមបានមានប្រសាសន៍។

គួរបញ្ជាក់ថា រឿង "ហ្លួងព្រះស្ដេចកន" ចូលរួមសម្ដែងដោយ ទេព រិនដារ៉ូ ស៊ិន សក្កដា រស់ សោភ័ណ ឆុំ វត្តី ហេង ប៊ុនលាភ ឌី សាវ៉េត ជា សំនៀង សុខ ដែន ព្រមទាំងតារាប្រុសស្រីជាច្រើនរូបទៀត។រឿងនេះគ្រោងនឹងចាក់បញ្ចាំងនៅតាមរោងភាពយន្តទំនើបៗក្នុងប្រទេសកម្ពុជាចាប់ពីថ្ងៃទី ១៨ ខែ សីហា ឆ្នាំ២០១៧ ទាំងរោងភាពយន្តនៅរាជធានីភ្នំពេញ និងនៅខេត្តសៀមរាប៕