ចំណុចធំៗធ្វើឲ្យ Neymar សម្រេចចិត្តដើរចេញពី Barcelona

2017-08-03 08:12:43
ចំនួនមតិ 0 | ចំនួនចែករំលែក 0

ចន្លោះមិនឃើញ

៩០% Neymar ជិតផ្ទេរពី Barcelona ទៅ Paris Saint-Germain មែនទែនហើយក្នុងតម្លៃកប់ពពក១៩៨លានផោន។ តាមព័ត៌មានចុងក្រោយប្រសិនកីឡាករប្រេស៊ីលរូបនេះទៅមែន Javier Pastore របស់ PSG ព្រមប្រគល់ឲ្យអាវលេខ១០របស់គេទៅ Neymar។

អ្វីដែលគេចម្ងល់និងធ្វើឲ្យគ្រប់គ្នាចង់ដឹងបំផុតនោះ ហេតុអ្វីបានជាសុខៗ Neymarចង់ចេញពីក្លឹបយក្សអេស្ប៉ាញមួយនេះ ស្របពេលធ្លាប់ជួយក្រុមឈ្នះពានជាច្រើន និងរីករាយនៅទីនោះ។ លោក Tim Vickery ដែលជាអ្នកជំនាញខាងបាល់ទាត់សញ្ជាតិប្រេស៊ីលដ៏ល្បីនិងជាអ្នកតាមដានអាជីពបាល់ទាត់របស់ Neymar តាំងពីចាប់ផ្ដើមលេងបានលើកហេតុផលមួយចំនួនទៅកាន់សារព័ត៌មាន Sky Sports អំពីការចាកចេញរបស់ Neymar។

ចំណុចទី១៖ Neymar ចង់បង្កើតមហិច្ឆតាផ្ទាល់ខ្លួន ព្រោះនៅ Barcelona គេមានឈ្មោះត្រឹមតួរងប៉ុណ្ណោះនៅពីក្រោម Messi។ Neymar មកប្រទេសអេស្ប៉ាញគឺចង់ជំនួសតំណែង Messi នៅ Barca ប៉ុន្តែគ្រប់គ្នាដឹងហើយ Messi ទើបតែចុះក្រុងត្រាថ្មី៤ឆ្នាំទៀតជាមួយក្លឹប ដូច្នេះបើបន្តនៅ គឺត្រឹមជាតួរងដដែល។

ចំណុចទី២៖ ផ្លាស់ទៅ PSG អតីតកីឡាករ Santos រូបនេះនឹងបានប្រាក់បដិវត្តន៍ច្រើន ហើយអាចឈ្នះពានកីឡាករល្អប្រចាំឆ្នាំទៀត។ តាមការចុះផ្សាយ Neymar នឹងទទួលថ្លៃនឿយហត់ ៨៦៥០០០ផោន ក្នុងមួយសប្ដាហ៍ ឬជាង៤០លានផោនក្នុងមួយឆ្នាំ។ កាលពីឆ្នាំ២០១៥ កីឡាកររូបនេះបានស្ថិតនៅបញ្ជីឈ្មោះដណ្ដើមពាន Ballon d'Or ៣នាក់ចុងក្រោយ ប៉ុន្តែគេបានត្រឹមជាប់លេខ៣ នៅក្រោម Messi និង Cristiano Ronaldo។ ប្រសិនជាដើរចេញ គេអាចមានឱកាសឈ្នះពានធំនេះដូចសិស្សច្បងប្រេស៊ីលមុនៗដូចជា Rivaldo, Ronaldinho និង Kaka ជាដើម។

ចំណុចទី៣៖ Neymar អាចរៀនពីរបៀបទំនួលខុសត្រូវលើខ្លួនឯង។ កីឡាករប្រេស៊ីលរូបនេះតែងតែដើរតួសំខាន់និងទទួលបានការសរសើរ ពេលដែល Messi អវត្តមានក្នុងក្រុម។ ជាពិសេសកាលលេងប៉ះ PSG នៅ Champions League កាលពីរដូវកាលមុន Neymar ជាកីឡាករសំខាន់ជាងគេជួយក្រុមឈ្នះដល់ទៅ ៦-១ បានឡើងទៅវគ្គបន្ត។ នេះអាចបញ្ជាក់ថា ប្រសិនប្ដូរក្លឹបនោះគេនឹងក្លាយជាតួឯក៕