គូដណ្ដឹង សុខ ជំនោរ ជានរណា?

2017-08-07 06:51:05
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកនិពន្ធ និងជាអ្នកដឹកនាំរឿង លោក សុខ ជំនោរ បានសម្រេចភ្ជាប់ពាក្យ ជាមួយនារីវ័យក្មេងម្នាក់ កាលពីថ្ងៃទី៦ ខែ សីហា ឆ្នាំ ២០១៧ កន្លងទៅ។ តើអនាគតភរិយារបស់កវីរូបនេះជានរណា?

តាមឲ្យបញ្ជាក់ពីលោក សុខ ជំនោរ អនាគតភរិយារបស់លោកមានឈ្មោះថា ស្រី សុរង្សី អាយុ២៦ឆ្នាំ ជាបុគ្គលិកធនាគារឯកជនមួយ ដោយអ្នកទាំងពីរបានស្គាល់គ្នា២ឆ្នាំមកហើយ។ កញ្ញា ស្រី សុរង្សី គឺជាកូនពៅ ក្នុងចំណោមបងប្អូន៣នាក់ ប្រុស២ ស្រី១ ដែលមានម្ដាយជាសាស្ត្រាចារ្យ និង ឪពុកជាវិស្វករ មានស្រុកកំណើតនៅរាជធានីភ្នំពេញនេះតែម្ដង។

លោក សុខ ជំនោរ បានរៀបរាប់ឲ្យដឹងថា លោកបើកក្រុមហ៊ុន ដែលកាលណោះលោកពឹងគូដណ្ដឹងរបស់ខ្លួនឲ្យជួយរៀបចំឯកសារឲ្យដើម្បីបង់ពន្ធ ដែលដំបូងឡើយរាប់អានគ្នាធម្មតាប៉ុណ្ណោះ។ ទំនាក់ទំនងស្នេហ៍ទៅទើបកើតឡើងនៅដើមឆ្នាំ២០១៧នេះប៉ុណ្ណោះ បន្ទាប់ពីសិក្សាចិត្តគ្នា មួយរយៈមក។

លោកបានលើកឡើងថា មូលហេតុដែលនាំឲ្យបាក់ចិត្តស្រលាញ់កញ្ញា ស្រី សុរង្សី ហើយសម្រេចចិត្តឲ្យចាស់ទុំចូលស្ដីដណ្ដឹងនេះ ក៏ព្រោះការស្រលាញ់ និងអារម្មណ៍ប្រហាក់ប្រហែលគ្នា។ ចំណុចពិសេសនោះ គឺអនាគតភរិយារបស់លោក គឺមានចំណេះដឹងខ្ពស់ផ្នែកគិតលេខខ្លាំង ដែលចំណុចនេះលោកមិនមាន ប៉ុន្តែលោកចូលចិត្ត ហើយចំណុចមួយទៀតគឺ ជាមនុស្សចូលចិត្តរស់នៅបែបស្ងប់ស្ងាត់ស្រដៀងទៅនឹងលោក។

បច្ចុប្បន្នលោក សុខ ជំនោរ មានអាយុ៤០ឆ្នាំហើយ ពោលគឺអាយុច្រើនជាងអនាគតភរិយារបស់លោក១៤ឆ្នាំ។ អ្នកទាំងពីរបានកំណត់ថ្ងៃចូលរោងការរួចហើយ គឺធ្វើនៅថ្ងៃទី២៦ ខែ វិច្ឆិកា ឆ្នាំ ២០១៧ នៅមជ្ឈមណ្ឌលកោះពេជ្រ។ ក្រោយរៀបការរួចលោក សុខ ជំនោរ ប្រាប់ថា លោកនៅតែឲ្យភរិយារបស់ខ្លួនបន្តការងារគាត់ដដែល ហើយបើមានពេលអាចមកជួយការងាររបស់លោកបាន។ ចំពោះគម្រោងបើកជំនួញផ្សេងទៀត មិនទាន់គិតទេ៕

អត្ថបទៈ ស៊ុនហួត