ងាយៗ ចង់គ្រប់គ្រងក្រុមហ៊ុន និងបុគ្គលិកជោគជ័យ ត្រូវសួរខ្លួនឯង ៣សំណួរនេះសិន
- 2017-08-08 09:43:00
- ចំនួនមតិ 0 | ចំនួនចែករំលែក 0
ងាយៗ ចង់គ្រប់គ្រងក្រុមហ៊ុន និងបុគ្គលិកជោគជ័យ ត្រូវសួរខ្លួនឯង ៣សំណួរនេះសិន
ចន្លោះមិនឃើញ
ការគ្រប់គ្រងអ្វីមួយឲ្យជោគជ័យ គឺវាអាស្រ័យទៅលើភាពប៉ិនប្រសប់របស់អ្នកដឹកនាំ។ តាមធម្មតាសិល្បៈ នៃអ្នកដឹកនាំមានផ្សេងៗគ្នា ប៉ុន្តែ លោក ច្រឹក សុខនីម អគ្គនាយកក្រុមហ៊ុន Century 21 Mekong បានចែករំលែកបទពិសោធន៍ភាពជាអ្នកដឹកនាំក្រុមហ៊ុនផង និង វិធីសាស្ត្រគ្រប់គ្រងបុគ្គលិកផង។ ម៉្លោះហើយ លោកបានបង្ហើបថា ចង់គ្រប់គ្រងក្រុមហ៊ុន ឬ បុគ្គលិក ឲ្យជោគជ័យនោះត្រូវផ្ដើម សំណួរ ៣ ជាមុនសិន៖
១. យើងជានរណា? Who we are?
២. យើងកំពុងធ្វើអ្វី? What we are doing?
៣. យើងធ្វើវាដោយវិធីណា? How we do it?
៣ សំណួរនេះ គឺជាមូលដ្ឋានគ្រឹះ នៃការគ្រប់គ្រង។ «ដូច្នេះខ្ញុំតែងតែចាប់ផ្ដើមគ្រប់គ្រងក្រុមក៏ដោយ ក្រុមតូចៗក៏ដោយ ខ្ញុំចាប់ផ្ដើមដោយ ៣សំណួរនេះសិន»។ លោក ច្រឹក សុខនីម និយាយ។
អ្នកវិភាគវិស័យអចលនទ្រព្យជិត ១០ឆ្នាំរូបនេះ បានពន្យល់ទៀតថា នៅពេលយើងស្គាល់អំពីសមត្ថភាពខ្លួនឯងហើយ នោះយើងនឹងដឹងថា អ្វីដែលយើងកំពុងធ្វើ និងធ្វើវាដោយវិធីណា?
អំពីគ្រប់គ្រងបុគ្គលិក៖
១. ស្វែងយល់ពីបុគ្គលិក៖ នៅពេលយើងច្បាស់ខ្លួនឯងហើយ យើងត្រូវស្វែងយល់អំពីបុគ្គលិកដែរ។ នៅពេលនិយាយពីបុគ្គលិកយើងត្រូវនិយាយពីអារម្មណ៍ ទស្សនៈ និង គំនិតរបស់ពួកគេ ហើយត្រូវធ្វើម៉េចឲ្យពួកគេធ្វើការជាមួយយើងបាន។
២. បង្រៀនបុគ្គលិក៖ យើងត្រូវលះបង់ពេលវេលាបង្រៀនពួកគេ ឲ្យចេះដូចយើង។ ក្រៅពីប្រាក់ខែបុគ្គលិកគេចង់ចេះជំនាញ នៅពេលគេចេញពីយើងទៅគេអាចរស់បាន ដូច្នេះយើងក៏ត្រូវផ្ដល់ជំនាញនិងបង្រៀនគេឲ្យចេះធ្វើការងារជាក្រុមល្អមួយ។
៣. ភាពស្មោះត្រង់៖ យើងត្រូវផ្ដល់ចំណេះជំនាញឲ្យពួកគេ ហើយត្រូវធ្វើយ៉ាងណាឲ្យគេយល់ថា យើងជាមនុស្សមិនកិបកេងគេ ហើយការប្រកាន់ជំហរស្មោះត្រង់ និង ក្រមសីលធម៌នេះ ខ្ញុំតែងតែជោគជ័យនៅអំឡុងនៃការគ្រប់គ្រងរបស់ខ្ញុំកន្លងមក។
៤. កិត្តិយស៖ បើយើងជាអ្នកដឹកនាំថាម៉េចត្រូវធ្វើអីចឹង! បើយើងធ្វើមិនបានយើងប្រាប់ថាធ្វើមិនបាន តែបើថាធ្វើបានគឺធ្វើបាន នេះជាតម្លៃកិត្តិយសរបស់មេដឹកនាំ។
៦. ប្រឹក្សាយោបល់៖ ការស្វែងរកការប្រឹក្សាយោបល់ក៏សំខាន់ដែរ។ ដូច្នេះខ្ញុំតែងតែជួបអ្នកមានចំណេះជំនាញជាងយើង ទាំងអ្នកចាស់ ឬ អ្នកថ្មី ដើម្បីឲ្យគេផ្ដល់យោបល់។ យើងដឹងហើយថា ការងារមានទាំងការប្រឈម និង ការងារខ្លះមិនប្រឈម ដូច្នេះបើប្រឈមយើងត្រូវស្វែងរកអ្នកចេះជាងយើង ឲ្យផ្ដល់យោបល់ដើម្បីដោះស្រាយបញ្ហា។ ប៉ុន្តែ រាល់ការផ្ដល់យោបល់មិនមែនសុទ្ធតែយើងយកទាំងអស់នោះទេ។
៧. ការអានសៀវភៅ៖ ការអានសៀវភៅគឺជាផ្នែកមួយទៀត ដើម្បីបង្កើនចំណេះជំនាញរបស់យើងដែលកំពុងធ្វើការងាររាល់ថ្ងៃ។ ដូច្នេះ ខ្ញុំអានសៀវភៅភាគច្រើន ប្រភេទសៀវភៅ គ្រប់គ្រង គ្រប់គ្រងធនធានមនុស្ស អាជីវកម្ម និង ជំនួញជាដើម។
លោក ច្រឹក សុខនីម បានចាប់ផ្ដើមក្រុមហ៊ុន Century 21 Mekong នៅអំឡុងឆ្នាំ ២០១៥ ដោយផ្ដើមហ៊ុនគ្នាចំនួន ៣នាក់ និង ក្រុមហ៊ុននេះបានរីកចម្រើនរហូតមកទល់នឹងពេលបច្ចុប្បន្ន មានបុគ្គលិករាប់សិបនាក់ និងដើមទុនរាប់ម៉ឺនដុល្លារ ផងដែរ៕
ចង់ដឹងពីប្រវត្តិសង្ខេបលោក ច្រឹក សុខនីម ចុច Link ខាងក្រោម៖