អេ ភូថង៖ ចង់ឲ្យមានការលើកទឹកចិត្តដល់អត្តពលិកច្រើនដូចនេះជារៀងរហូត

2017-08-09 01:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រូប្រដាល់ជម្រើសជាតិគុនខ្មែរលោក អេ ភូថង ថាពិតជាសប្បាយចិត្តដែលបានចូលរួមកម្មវិធីច្រើនមុនចេញទៅព្រឹត្តិការកីឡាស៊ីហ្គេមនេះ។ លោកចង់ឲ្យមានក្រុមហ៊ុនផ្សេងៗទៀតបន្តជួយជ្រោមជ្រែង និងលើកទឹកចិត្តដល់កីឡាករ កីឡាការិនីកម្ពុជាដែលនឹងចេញទៅប្រទេសម៉ាឡេស៊ី នាពេលប៉ុន្មានថ្ងៃខាងមុខនេះទៀត។

លោកគ្រូ អេ ភូថង

លោកគ្រូ អេ ភូថង បានប្រាប់ឲ្យដឹងថា មុនចេញទៅចូលរួមក្នុងកីឡាស៊ីហ្គេម លើកទី២៩ ខែសីហា ខាងមុខនេះ អត្តពលិកកម្ពុជាបានការលើកទឹកចិត្តច្រើនតាមរយៈកម្មវិធីជួបជុំសំណេះសំណាល និងជួបជុំពិសាអាហារផងដែរ ដូចជាកាលពីថ្ងៃទី៣ សីហា ជួបសម្ដេចតេជោ ហ៊ុន សែន និងថ្ងៃទី៤ សីហា ជួបជុំជាមួយក្រុមហ៊ុនស្របៀរអង្គរ និងព្រឹកមិញនេះជួបជុំជាមួយក្រុហ៊ុនណាហ្គាលវើល។

កីឡាករប្រដាល់គុនខ្មែរ

គ្រូជម្រើសជាតិខាងលើបន្តថា ការជួបជុំទាំងនេះគឺជាការលើកទឹកចិត្តដ៏សំខាន់សម្រាប់កីឡាករ កីឡាការិនីកម្ពុជា ដែលធ្វើឲ្យពួកគេរឹតតែមានទឹកចិត្តខំប្រឹងបន្ថែមទៀតដើម្បីយកជ័យជម្នះក្នុងការប្រកួតនានារបស់ពួកគេ។ លោកក៏សូមអរគុណដល់បណ្ដាក្រុមហ៊ុនទាំងនោះដែលបង្កើតឲ្យមានកម្មវិធីទាំងនេះឡើង ហើយអតីតអ្នកប្រដាល់ជើងខ្លាំងរបស់កម្ពុជារូបនេះចង់ឲ្យមានកម្មវិធីទាំងនេះនៅលើកក្រោយៗទៀត។

កីឡាករ ឃីម ឌីម៉ា អាវខៀវវាលឃ្លៀក

គូបញ្ជាក់ថាអត្តពលិកកម្ពុជាទាំងអស់នឹងត្រូវចេញទៅជាបន្តបន្ទាប់ចាប់ពីថ្ងៃទី១២ ខែសីហា ទៅតាមប្រភេទកីឡារៀងៗខ្លួនដើម្បីចូលរួមប្រកួតប្រជែងយកមេដាយនៅស៊ីហ្គេមលើកទី២៩នាប្រទេសម៉ាឡេស៊ី។ ចំពោះប្រភេទកីឡាគុនខ្មែរនឹងត្រូវទៅជួបនិងទទួលទានអាហារជាមួយលោកឧកញ៉ា ស្រី ចាន់ថន អនុប្រធានកិត្តិយសសហព័ន្ធគុនខ្មែរនៅថ្ងៃទី១១ ខែសីហា នេះជាបន្តទៀតផងដែរ៕

អត្ថបទ៖ នួន ស៊ីណា