តស៊ូពីប្រាក់ខែ ៥០ដុល្លារ រហូតបង្កើតក្រុមហ៊ុននាំចេញអង្ករកម្ពុជាទៅជាង ៤០ប្រទេស

2017-08-09 01:40:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាកូនស្រីកំព្រាឪពុក លោកស្រី ឃី មុនី សុខចិត្តចាកចេញពីគ្រួសារ មកបន្តការសិក្សា និងស្វែងរកការងារនៅភ្នំពេញ ក្រោយបញ្ចប់ថ្នាក់វិទ្យាល័យ។ ការចាកចេញនោះដោយសារ ភាពក្រីក្រនិងមើលឃើញទុក្ខលំបាកម្ដាយ ដើរតួជាម្ដាយផង ឪពុកផង រួមទាំងរ៉ាប់រងបន្ទុកកូនៗជាច្រើននាក់។ ភាពក្រីក្របានក្លាយជាកម្លាំងចិត្តដ៏រឹងមាំ រហូតទទួលពានរង្វាន់សហគ្រិនស្ត្រីវ័យក្មេងដ៏ឆ្នើមប្រចាំឆ្នាំ ២០១៧ កាលពីពេលថ្មីៗនេះ។

លោកស្រី ឃី មុនី កំពុងផ្ដល់បទសម្ភាសន៍

ចង់ដឹងថា រឿងរ៉ាវពីក្រោយភាពជោគជ័យរបស់សហគ្រិនរូបនេះ បែបណានោះ សូមអានប្រវត្តិសង្ខេបខ្លះដូចខាងក្រោមនេះ៖

ជីវិតក្រោយបែកម្ដាយលើកដំបូង

លោកស្រី ឃី មុនី ជាអ្នកខេត្តកំពង់ចាម ដែលមានបងប្អូនចំនួន ៧នាក់ និងជាកូនស្រីពៅ មានតែម្ដាយជាមេគ្រួសារ។ បន្ទាប់ពីលោកស្រីប្រឡងជាប់បាក់ឌុប ក៏សម្រេចចាកចេញពីស្រុកកំណើត មកបន្តការសិក្សាជំនាញផ្នែកសេដ្ឋកិច្ច នៅរាជធានីភ្នំពេញ នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច។ លោកស្រីរៀបរាប់ថា ៖ «ពេលនោះជាលើកដំបូងដែលត្រូវបែកពីម្ដាយ អារម្មណ៍ពិតជាពិបាក»។ លោកស្រីថា អ្វីដែលលោកស្រីប្រាប់ខ្លួនឯងឲ្យប្រឹងបន្តឡើងនោះ គឺដោយសារភាពក្រីក្រ បានជម្រុញទឹកចិត្តលោកស្រីត្រូវតែតស៊ូសម្រេចគោលដៅឲ្យបាន។

នឿយមុន ស្រណុកក្រោយ

ចូលដល់ឆ្នាំទី២ភា្លម លោកស្រីទទួលបានការងារដំបូងផ្នែករដ្ឋបាល ជាការងារហាត់ការ ឬហៅថា Internship រយៈពេល ០៦ខែ លោកស្រីទទួលបានប្រាក់ឈ្នួល៥០ដុល្លារក្នុង១ខែ ត្រឹមបង្គ្រប់ថ្លៃសាំងប៉ុណ្ណោះ។ ប៉ុន្តែលោកស្រីពេញចិត្តនឹងធ្វើ ព្រោះជាកន្លែងដែលលោកស្រីបានរៀនសូត្រពីមនុស្សជំនាញជាច្រើន និងអនុវត្តជាក់ស្តែង ធ្វើឲ្យលោកស្រីលែងខ្លាច និងបានស្គាល់ពីសង្គមកាន់តែច្បាស់។ ទន្ទឹមនឹងការងារលំបាកៗជាច្រើន បានចូលក្នុងជីវិតស្ត្រីវ័យក្មេងរូបនេះ បានប្រាប់ខ្លួនឯងនូវពាក្យចាស់បុរាណតែងពោលថា " ស៊ូនឿយមុនស្រណុកក្រោយ" ហេតុដូច្នេះ លោកស្រីមិនដែលទុកខ្លួនឲ្យទំនេរឡើយ។

Commission ជាដើមទុនដំបូង

ការងារ និងជីវិតឯកជនត្រូវបានផ្លាស់ប្ដូរ ក្រោយពីបញ្ចប់ការងារហាត់ការ លោកស្រីបានធ្វើការជាគណនេយ្យក្នុងក្រុមហ៊ុនអចលទ្រព្យមួយ និងឆ្លៀតពេលរកម៉ូយជួយជាលក់ផ្ទះឲ្យគេបន្ថែម។ លក់ផ្ទះដំបូងលោកស្រី រកប្រាក់បាន ៣ពាន់ដុល្លារ ជាកម្រៃជើងសារ (Commission) រួចក៏មានបែកគំនិតរកស៊ីនាំចូលសំបកកង់ឡាន។ ជាពេលវេលាមួយដែលលោកស្រីភ័យខ្លាច តែដោយមានចំណេះដឹងភាពជាសហគ្រិន គឺត្រូវតែហ៊ានប្រថុយ។ មកដល់ឆ្នាំ ២០១៣ លោកស្រី បានងាកមកចាប់របររកស៊ីស្រូវអង្ករមានឈ្មោះថា Amru Rice និងបង្កើតរោងចក្រផលិតអង្ករសរីរាង្គរបស់ខ្មែរ នាំចេញទៅក្រៅជាង ៤០ប្រទេស និងជួយកសិករខ្មែរប្រមាណ ៥ពាន់គ្រួសារ ប្ដូរមកធ្វើស្រូវបែបសរីរាង្គទល់បច្ចុប្បន្ន៕

អត្ថបទ៖ ស៊ិន សាវ៉េត