មុនទិញ Lexus ត្រូវដឹងប្រភេទ Half និង Full Option ឲ្យច្បាស់សិន

2017-08-11 07:44:53
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅក្នុងទីផ្សាររថយន្តមួយទឹកមានការពេញនិយមច្រើនពីពលរដ្ឋទូទៅ ក៏ព្រោះតែវាមានតម្លៃធូរថ្លៃ ស្របតាមការរស់នៅរបស់ពលរដ្ឋ។ ក្នុងនោះរថយន្តម៉ាក Lexus មានទីផ្សារប្រើប្រាស់ច្រើនជាងគេ។

រថយន្ត Lexus មានការបែងចែកតាមប្រភេទឆ្នាំផលិត ពណ៌ និងសម្ភារៈដែលភ្ជាប់ស្រាប់ចេញពីរោងចក្រ (option) ហើយតម្លៃក៏ខុសគ្នាដែរ។

បើតាមម្ចាស់ការ៉ាសលក់រថយន្តដែលមានឈ្មោះថា បាត់ដំបងលក់រថយន្ត មុខផ្សារភូពុយក្នុងក្រុងបាត់ដំបង បានប្រាប់ Sabay ថា រថយន្ត Lexus មួយទឹកចែកជា ៣ ប្រភេទគឺ ប្រភេទធម្មតា ប្រភេទ Half option និងប្រភេទ full option ហើយម៉ូដែលពេញនិយមមានដូចជា Lexus 300 និង 330។

លក្ខណៈសំគាល់សម្រាប់ Lexus 330 full option មានអេក្រង់ចុចបញ្ជា និងភ្ជាប់ DVD ឯ Half Option មានតែអេក្រង់ចុចបញ្ជា តែគ្មាន DVD។ ឯ Lexus 330 ធម្មតាគ្មានទាំងអេក្រង់ចុចបញ្ជា និងDVD ឯលក្ខណៈសម្បត្តិផ្សេងទៀតមានដូចគ្នា។

លោកបានបន្តថា “បើនិយាយពីតម្លៃនាំចូលគឺដូចគ្នាមិនថា Half Options ឫ full option។ ដោយឡែកនៅស្រុកខ្មែរ គេឲ្យតម្លៃលើចំណុចនេះច្រើន ទើបតម្លៃរបស់វាមានភាពខុសគ្នាទៅតាមនឹង”។

ម្ចាស់ការ៉ាសខាងលើបានបន្ថែមទៀតថា តម្លៃខុសគ្នាន្លោះពី ២ ០០០ ទៅ ២ ៥០០ដុល្លារ (ពីធម្មតា ទៅពាក់កណ្តាល full) និងខុសគ្នាចន្លោះពី ២ ៥០០ ដុល្លារ ទៅ ៣ ០០០ ដុល្លារ (ពី Half ទៅ full option)។

ចំណែកឯ Lexus ៣០០ វិញប្រភេទ Half option និង full option ឡើងទៅ មានភ្លើងឡាស៊ែរ ដែលវាអាចរេតាមស្ថានភាពផ្លូវ ហើយលក្ខណៈសំគាល់មួយទៀតគឺអេក្រង់។ សម្រាប់ full option មានអេក្រង់អាចប៉ះបញ្ជាដោយផ្ទាល់ តែចំពោះប្រភេទ Half Options វិញ មានអេក្រង់ដែរ តែមិនអាចបញ្ជាបានទេ គឺគេប្រើប៊ូតុងចុច ឯប្រភេទធម្មតាអត់មានអេក្រង់ទេ ឯលក្ខណៈផ្សេងទៀតដូចគ្នា ឫខុសគ្នាតិចតួច។

ជាទូទៅមានការលើកឡើងថា រថយន្ត Full options សំដៅលើរថយន្តប្រភេទប្រណិត ដែលមានការរចនាឡើងយ៉ាងពិសេសជាមួយការបំពាក់គ្រឿងបរិក្ខារនិងបច្ចេកវិទ្យាទំនើបច្រើនលើសពីរោងចក្រកំណត់ អាស្រ័យតាមការកុម្ម៉ង់ពិសេសរបស់អតិថិជន។ រោងចក្រផលិតជាស្តង់ដារលក់លើទីផ្សារដូចជា គ្រឿងប្រព័ន្ធបច្ចេកទេសខាងក្នុង ប្រព័ន្ធកម្សាន្ត ប្រព័ន្ធគ្រឿងបញ្ជា ប្ដូរយ៉ាន់កង់ថ្មី ចង្កូត ប្រព័ន្ធកាមេរ៉ាក៏ដូចជាចំណុចបច្ចេកទេសដទៃទៀតលើសពីលក្ខណៈដើមដែលផលិតចេញពីរោងចក្រ។

បើមានចំណុចអ្វីដែលមិនទាន់រៀបរាប់អស់ទេ? អ្នកអាចបញ្ចេញមតិយោបល់ នៅប្រអប់ comment ខាងក្រោមបាន៕

អត្ថបទ៖ គឹមសាយ